YaNGI TEXNIKALAR – DEHQONGA QOʻL-QANOT

Mamlakatimizda barcha sohalar qatori qishloq xoʻjaligi sohasida ham islohotlar jadal surʼatlar bilan olib borilmoqda. Natijada Oʻzbekistonda gʻalla, poliz va sabzavot kabi oziq-ovqat mahsulotlari, shuningdek paxta yetishtirish koʻlami ham sezilarli darajada oshdi.

Agrar sohada erishayotgan yutuqlarimizda avvalambor mamlakatimizda fermerlikni rivojlantirishga alohida eʼtibor berilayotgani muhim omil boʻlmoqda.Tobora rivojlanib borayotgan fermerlik harakatini albatta biz yuksak unum bilan ishlaydigan texnikalarsiz tasavvur qila olmaymiz. Shu boisdan ham mamlakatimizda fermer xoʻjaliklarining zamonaviy texnikalar bilan taʼminlanishiga alohida eʼtibor berilmoqda.

Ayniqsa, Oʻzbekiston Respublikasi Vazirlar Mahkamasining 2013-yil 7-maydagi "Qishloq xoʻjaligi uchun gusenitsali traktorlarni sotib olish chora-tadbirlari toʻgʻrisida”gi 121-sonli qarori ijrosini taʼminlash boʻyicha tumanimizda ham koʻpgina ishlar amalga oshirildi.

2002-yildan keyingi davr mobaynida tumanimizga bir qancha yuqori unum bilan ishlaydigan qishloq xoʻjaligi texnikalari – 13 ta Orion-630, 8 ta MX-140, 8 ta MX-135 va 6 dona TS60/70, zanjirli surim traktorlaridan 71 ta VT-150D, 32 ta YTO, 450 ta TTZ-80-11 rusumli chopiq va 42 dona yuk tashish traktorlari keltirilib, fermer xoʻjaliklariga lizing asosida berildi.

Shuningdek, oʻtgan yil davomida tumanimizga 20 ta TTZ-100 NS, 3 ta T60-70 Orion traktorlari va 3 ta Dominator kombayni keltirildi.

Tumanimizga yuqori unum bilan ishlaydigan bunday texnika va mexanizmlarning keltirilishida masʼuliyati cheklangan jamiyat shaklidagi "Davr mashlizing” qoʻshma korxonasining yordami katta boʻldi.

Biz tuman davlat texnika nazorati inspektsiyasi inspektori Davronbek Bobojonov bilan chet davlatlardan keltirilayotgan texnikalar boʻyicha suhbatlashganimizda u quyidagilarni gapirdi:

- Tumanimiz fermer xoʻjaliklariga Xitoy Xalq Respublikasida ishlab chiqarilgan YTO rusumli surim traktorining olib kelinishi ham yoʻlga qoʻyildi. Bu traktorda buldozer qurilmasining mavjudligi, uning yerlarni haydash bilan birgalikda chellarni tekislash, dala chetlarini toʻgʻrilash kabi ishlarni amalga oshirishda ham qulayligi eʼtiborga loyiq.

Ekish mavsumiga tayyorgarlik koʻrish va ekish davrida ishtirok etadigan texnikalar parkini takomillashtirishda, qishloq xoʻjaligi sohasini jahon talablariga  javob beradigan zamonaviy zanjirli haydov traktorlari bilan taʼminlashda, fermer xoʻjaliklari texnikalariga koʻrsatiladigan  servis xizmatlarining turlari va sifatini yaxshilashda  masʼuliyati cheklangan jamiyat shaklidagi "Davr mashlizing” qoʻshma korxonasi rahbarlari katta yordam berishayapti.

Xorijiy davlatlardan olib kelingan traktorlar haydovchilarining malakasini oshirish maqsadida "Agrotexservis MTP” MChJda har yili oʻqishlar tashkil etilib kelinmoqda. Bu oʻquv mashgʻulotlarida chet el traktorlari mavjud boʻlgan fermer xoʻjaliklari rahbarlari va traktor operatorlariga chet elda ishlab chiqarilgan texnikalarga servis xizmati koʻrsatish va taʼmirlash, texnika vositalaridan foydalanish samaradorligini oshirish, traktorlarni qishloq xoʻjaligi ishlarini bajarishga tayyorlash, traktorga qishloq  xoʻjalik agregatlarini oʻrnatish  qoidalari va texnik  talablari, boshqaruv tizimlari va ularni ishlatish, oʻlchov-nazorat asboblari bilan tanishish, ulardagi maʼlumotlarni tahlil qilish boʻyicha tushunchalar beriladi.

"Davr mashlizing” qoʻshma korxonasi mutaxassislari tumanimizga tez-tez kelishib, chet el traktorlarining ishlashini koʻzdan kechiradilar, ayrim masalalar yuzasidan tushunchalar beradilar. Shu bilan birgalikda ushbu korxona rahbarlari bizga zarur boʻlgan traktorlar ehtiyot qismlarini olishimizga ham katta yordam berishayapti.

Darhaqiqat, mutaxassis aytganidek, tumanimiz qishloq xoʻjaligini mexanizatsiyalash, mavjud texnika va mexanizmlardan foydalanish samaradorligini oshirish yoʻlidagi bunday harakatlar tumanimizda qishloq xoʻjaligi ekinlaridan olinadigan hosildorlikni yanada oshirishga omil boʻlishi shubhasiz.

Texnika – dehqonning qoʻl-qanoti. Shu boisdan ham tumanimiz qishloq mehnatkashlari zamonaviy texnikalardan unumli foydalangan holda qishloq xoʻjaligi mahsulotlari yetishtirishni yanada koʻpaytirish yoʻlida astoydil harakat qilmoqdalar.

Allambergan JUMANIYoZOV,

                                "Taraqqiyot koʻzgusi” gazetasi muxbiri.

Suratda: "Choʻtboy bobo” fermer xoʻjaligi raisi Olimboy Safarboyev ham YTO rusumli traktordan ish jarayonida samarali foydalanmoqda.