БИЗ ЎЗБЕК ОИЛАСИДА КАМОЛ ТОПГАН ЁШЛАРМИЗ
Оила – муқаддас. Бу чиройли жумла кимларнингдир қулоғига хуш ёқиши учун ўйлаб топилган эмас, балки йиллар давомида асрлар синовидан чидам билан ўтиб келаётган юксак тушунчадир.
Оиланинг муқаддас эканлигини англаш учун аввало инсон ҳар томонлама етук бўлмоғи лозим. Етуклик эса одамни комилликка етаклайди. Шубҳасиз, комил инсон оиланинг аҳил ва иноқ яшаши тарафдори. Бунинг учун у жон куйдиради, ҳар бир қилган ишида оиласини эслайди, оила аъзоларининг кўмаги билан улкан марраларга эришади. Оилада ота-онанинг ўрни беқиёс, ота-она аҳил бўлса, болалар ҳам улардан ўрнак олишади. Ахир "Қуш уясида кўрганини қилади”, - дейдилар-ку. Шундай экан, баркамол авлод – аҳил оила меваси. Аҳиллик ўз мевасини бермасдан қўймайди.
Муҳтарам Юртбошимиз шундай деган эдилар: "Менинг энг катта ишончим ёш авлоддир. Замонавий билимга эга, одобли, илмли, кўрсанг ҳавасинг келадиган баркамол ва шижоатли фарзандларимиздир. Мен ўзимнинг тақдиримни ҳам, мамлакатимиз ва мустақиллигимиз тақдирини ҳам ана шуларнинг қиёфасида кўраман”. Киши ана шундай фарзандлари борлигидан куч олади, онги тиниқлашади, рағбатланади, кўкси тоғдай кўтарилади. Шундай экан, Юртбошимизнинг юксак ишончини оқлашимиз даркор. Бугунги кунда илм-фан чўққиларини эгаллашимиз, орзуларимизни рўёбга чиқариш, салоҳиятимизни кенг намоён этишимиз учун барча шароит ва имкониятлар мавжуд. Ҳар қандай давлатнинг қудрати соғлом фикрли, билимли, Ватан тақдири учун жонини тикишга тайёр фарзандларнинг кўплиги билан ўлчанар экан, биз ҳам қудратли давлатлар сафидан муносиб ўрин эгаллаймиз!
Соғломлик ва баркамолликни бунёдкорлик туйғусисиз тасаввур этиб бўлмайди. Бунёдкорлик улуғ фазилат бўлиб, инсон ҳар куни, ҳар соатда эзгу ишлар қилиб яшаши, нимадир яратиши, ниманидир кашф қилиши, қўлни ишга, мияни фикрлашга, қалбни олижаноб ҳисларга тинимсиз ўргатиб бориши эзгу фазилатидир. Замон билан ҳамнафас бугунги ўзбек йигитларини Алпомишдан андоза олган, десак муболаға бўлмайди. Қизларини эса, Зулфиядан илм-у заковатни, Увайсийдан сабр-у қаноатни, Нодирадан гўзаллигу малоҳатни мерос қилиб олган. Бунинг исботини улар қилаётган ишлар мисолида яққол кўриш мумкин. Бу ишларни санаб адо этолмайсиз. Оддий мисол: "Маde in Uzbekistаn” савдо белгиси Японияда тобора машҳур бўлиб бормоқда. Бу эса тадбиркорликнинг юксак чўққиларда эканидан далолат беради. Тадбиркорлик соҳаси билимдонлари орасида эса ўзбек оиласида камол топган, ўзбекона таълим-тарбия олган ёшлар жуда кўп. Азиз тенгдошлар! Келинг, ҳозирданоқ яхши ўқиб, ҳар бир дарсни қунт билан тинглаб, диққат билан тушуниб, эртага муносиб шахс бўлиб етишайлик. Юртимиз, Юртбошимиз, қолаверса, оиламиз ва ота-онамизнинг ишончини оқлайлик!
Света ШОМУРОДОВА,
11-сонли мактаб ўқувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
