BIZ OʻZBEK OILASIDA KAMOL TOPGAN YoShLARMIZ

Oila – muqaddas. Bu chiroyli jumla kimlarningdir qulogʻiga xush yoqishi uchun oʻylab topilgan emas, balki yillar davomida asrlar sinovidan chidam bilan oʻtib kelayotgan yuksak tushunchadir.

Oilaning muqaddas ekanligini anglash uchun avvalo inson har tomonlama yetuk boʻlmogʻi lozim. Yetuklik esa odamni komillikka yetaklaydi. Shubhasiz,  komil inson oilaning ahil va inoq yashashi tarafdori. Buning uchun u jon kuydiradi, har bir qilgan ishida oilasini eslaydi, oila aʼzolarining koʻmagi bilan ulkan marralarga erishadi. Oilada ota-onaning oʻrni beqiyos, ota-ona ahil boʻlsa, bolalar ham ulardan oʻrnak olishadi. Axir "Qush uyasida koʻrganini qiladi”, - deydilar-ku. Shunday ekan, barkamol avlod – ahil oila mevasi. Ahillik oʻz mevasini bermasdan qoʻymaydi.

Muhtaram Yurtboshimiz shunday degan edilar: "Mening eng katta ishonchim yosh avloddir. Zamonaviy bilimga ega, odobli, ilmli, koʻrsang havasing keladigan barkamol va shijoatli farzandlarimizdir. Men oʻzimning taqdirimni ham, mamlakatimiz va mustaqilligimiz taqdirini ham ana shularning qiyofasida koʻraman”. Kishi ana shunday farzandlari borligidan kuch oladi, ongi tiniqlashadi, ragʻbatlanadi, koʻksi togʻday koʻtariladi. Shunday ekan, Yurtboshimizning yuksak ishonchini oqlashimiz darkor. Bugungi kunda ilm-fan choʻqqilarini egallashimiz, orzularimizni roʻyobga chiqarish, salohiyatimizni keng namoyon etishimiz uchun barcha sharoit va imkoniyatlar mavjud. Har qanday davlatning qudrati sogʻlom fikrli, bilimli, Vatan taqdiri uchun jonini tikishga tayyor farzandlarning koʻpligi bilan oʻlchanar ekan, biz ham qudratli davlatlar safidan munosib oʻrin egallaymiz!

Sogʻlomlik va barkamollikni bunyodkorlik tuygʻusisiz tasavvur etib boʻlmaydi. Bunyodkorlik ulugʻ fazilat boʻlib, inson har kuni, har soatda ezgu ishlar qilib yashashi, nimadir yaratishi, nimanidir kashf qilishi, qoʻlni ishga, miyani fikrlashga, qalbni olijanob hislarga tinimsiz oʻrgatib borishi ezgu fazilatidir. Zamon bilan hamnafas bugungi oʻzbek yigitlarini Alpomishdan andoza olgan, desak mubolagʻa boʻlmaydi. Qizlarini esa, Zulfiyadan ilm-u zakovatni, Uvaysiydan sabr-u qanoatni, Nodiradan goʻzalligu malohatni meros qilib olgan. Buning isbotini ular qilayotgan ishlar misolida yaqqol koʻrish mumkin. Bu ishlarni sanab ado etolmaysiz. Oddiy misol: "Made in Uzbekistan” savdo belgisi Yaponiyada tobora mashhur boʻlib bormoqda. Bu esa tadbirkorlikning yuksak choʻqqilarda ekanidan dalolat beradi. Tadbirkorlik sohasi bilimdonlari orasida esa oʻzbek oilasida kamol topgan, oʻzbekona taʼlim-tarbiya olgan yoshlar juda koʻp. Aziz tengdoshlar! Keling, hozirdanoq yaxshi oʻqib, har bir darsni qunt bilan tinglab, diqqat bilan tushunib, ertaga munosib shaxs boʻlib yetishaylik. Yurtimiz, Yurtboshimiz, qolaversa, oilamiz va ota-onamizning ishonchini oqlaylik!

Sveta ShOMURODOVA,

11-sonli maktab oʻquvchisi.