Жайхун илҳомлари

Ҳақнинг кўмагисиз орзулар бекор,

Кўнглингда ҳар неча хаёл бўлмасин.

Ахир "насиб этсин” деган гаплар бор,

Таоминг қанчалар ҳалол бўлмасин.

Инсон – улуғ, бўлса илм-у аъмоли,

Ярамас ишлардан бўлар у холи.

Йўлдан оздиролмас дунёнинг моли,

Гарчи кўпга оддий бир ҳол бўлмасин.

Қудратинг мислсиз юксак бўлса ҳам,

Сўнгги кас эмассан, ўйлаб бос қадам.

Фарзандлар борлигин унутма ҳар дам,

Улар келажаги увол бўлмасин.

Ҳар кимнинг кўнглига ўзи тарози,

Шунга ярашадир ризқнинг кўп-ози.

Хизмат-ла қилолгин элингни рози,

Бад дуодан қаддинг-да дол бўлмасин.

Турфа тақдирларга тўла бу олам –

Кўрдингки, бир ғариб турар боши хам.

Тайёр бўл беришга доимо ёрдам,

Кўнглингга қанчалар малол бўлмасин.

Гарчи талаб қилар чидам ва сабот,

Эл ичра ололгин доим яхши от.

Зеро, ёмонликни қилишга исбот,

Анжуманда номинг мисол бўлмасин.

Шоирлик касб эмас - бу асли тақдир,

Қалбингнинг қаъридан сўз ўтар бир-бир.

Мухлис қалбига йўл топмасанг, ахир,

Шеъринг-пуч, ҳар сўзинг гар бол бўлмасин.

Илм ривожида қадамлар илдам,

Бугун билганингга қаноатдир кам.

Илғорлар сафида юролгин сен ҳам,

Замон ўтиб, армонли ҳол бўлмасин.

Десанг, агар менга инсонийлик хос,

Аҳмад, керак сенга илмдан либос.

Бу ҳикмат донишманд зотлардан мерос,

Амал қил, умрингда завол бўлмасин.

Аҳмад  НАФАСОВ.

Аёллар

Бу дунёда бор экан,

Аёл деган улуғ зот.

Турмушимиз фаровон,

Лаззатли, демак ҳаёт.

Она меҳри бўлакча,

Меҳр йўқ, ундан ортиқ.

Ўрнин боса олмайди,

Неки қилса-да тортиқ.

Ҳатто ёзга айланар,

Қишнинг совуқ палласи.

Айтилганда бир лаҳза,

Ширин она алласи.

Тунлари бешик узра,

Фарзандим, деб куяди.

Бари бир бола ширин,

Минг ўргилиб, суяди.

Кулганимизни кўрса,

Доим қувонч юзида.

Йиғлаганда онанинг

Ёш айланар кўзида.

Кам бўлмаймиз бир умр,

Дуо олиб яшасак.

Қарзимизни онадан

Қанийди уза олсак.

Фикримни чулғаб олар

Ғала-ғовур ҳаёллар

Бир умрга соғ бўлинг,

Сиз мўътабар оналар!

Шомурод ХЎЖАНОВ.

ТЕНГДОШИМ

Ўғил-қизинг айтганингни қилмаса,

Хизматларинг унутса-ю, билмаса.

Койишингдан қўрқиб, нари жилмаса,

Бундан баттар хўрлик йўқдир, тенгдошим.

Кампиринг ҳам койиса-ю тергаса,

Айб-нуқсонинг қатор қилиб тиркаса,

Обрўнг топтаб, қора қурум суркаса,

Кул тагида ётган чўғдир, тенгдошим.

Узатганда калта бўлса қўлларинг,

Юрсанг ҳамки унмай турса йўлларинг.

Харжинг учун етмай қолса пулларинг,

Юрагингга теккан ўқдир, тенгдошим.

Бўш юрганда топилмаса эрмагинг,

Қийин кечар ризқ-у рўзинг  термагинг.

Мушкул эрур пулдан ёрдам бермагинг,

Гап мағзини англаб, уқдир, тенгдошим.

Сал ишласанг, "оҳ-воҳ” қилиб қолсанг-ей,

Чарчаш нима, анча ҳолдан толсанг-ей,

Ён-верингдан шу он дашном олсанг-ей,

Чақиртиргин дарров дўхтир, тенгдошим.

Саксон-тўқсон ёшга етсанг агарда,

Кўпаяди таъна, пичинг-у зарда.

Кетган билан учрашмоққа маҳшарда,

Навбат етди – тобут сўқтир, тенгдошим.

Саъдулла ХЎЖАНИЁЗОВ.

БАҲОР

Боғларнинг чиройи тортар қўйнига,

Куртак, гул очарлар уйғоқ дарахтлар.

Мен қалбим навосин битмасман нега,

Борлиқни тўлдиргач саодат, бахтлар.

Турфа гиёҳлар-да очибди кўркин,

Тароватли еллар ҳамдамлигида

Бунда роҳат кўрдим, ҳаловат кўрдим,

Чопқиллаб югургим келяпти жуда.

Кўзни қувнатмасми, тошқин сой – ёплар

Кўзга нур етказур, кўлларга-қанот.

Бўлса, юракларда шахду шитоблар,

Боғ ичра макон ҳам бўлгуси обод!

Боғларнинг чиройи тортар қўйнига,

Мафтункор баҳордан саховат-бугун.

Қарагин, кўкдаги қушлар ўйнига

Кутган эмасмидик ойлаб кун-у тун.

Жумабой ҲИДОЯТОВ,

"Жайҳун илҳомлари” ННТ аъзоси.

Бахтга етдик биз

Истиқлол, сен бизга нур ила келдинг,

Халқимга, юртимга шон ила келдинг.

Дилларга ҳурликнинг нурларин сочиб,

Тугалланмас ризқ-у нон ила келдинг.

"Шериклик ошини ит ҳам ичмайди”, -

деган доно халқим мақоллари бор.

Энди мустақиллик мағлуб бўлмайди,

Ҳар қадамда озодлик ниҳоллари бор.

Мозийларга нигоҳ ташласак агар,

Неча хунрезликлар турар безрайиб.

Эрк, дея курашиб жонин тикканлар,

Устидан кулишар юзсиз хўмрайиб.

Озодлик йўлида шамдай сўнганлар,

Армони ушалиб, Эркка етдик биз.

Бизнинг бахтимизга эгов бўлганлар,

Дилларига тикон бўлиб ботдик биз.

Ҳавасда боқади бизларга жаҳон,

Равнақ топаётир ҳур Ўзбекистон!

Муҳаббат, "Дўрман” овули.

Жажжи набирам

Оиламга қувонч, шодлик улашиб,

Шу жажжи набирам дунёга келди.

Қалбимда порлатиб меҳр қуёшин,

Уйимиз шодликка лиммо-лим тўлди.

Соғлом она, соғлом бола йилида,

Гард қўнмасин сенга, Шодия қизим.

Беғубор қизалоқ бўлиб ўсгайсан,

Қанча таърифласам, ожиздир сўзим.

Сенинг болалигинг, сенинг ёшлигинг,

Қувончларга доим тўла бўлсин, деб.

Бувинг тилар сенга доимо соғлик,

Болалигинг энг беғубор бўлсин, деб.

Тинч осмонга кўрк бергандай камалак,

Сочларингга тақиб қўяй жамалак.

Ҳаётимга завқ бахш этиб ўсавер,

Шодияхон, сен – малика, сен – малак.

Инобат ОТАЖОНОВА, ННТ аъзоси.

Дўст

Дўст танлашда адашма,

Бу ишда асло шошма.

Кўп нарса ўтар, қолар,

Дўст эса абадий бўлар.

Дўст бўлар тан-у жонинг,

Ёмон кунда қўллашган.

Ҳамроҳ бўлиб ҳаётда,

Сенга қувонч улашган.

Насибахон ЙЎЛДОШЕВА.