Жайхун илҳомлари

            Юрт соғинчи

Кўнглинг тўқ, қаддинг тик – юрсанг элингда,
Шукрингни ҳар куни минг бор айтасан.
Соғинчин сезарсан кетсанг дилингда,
Қизилчоли, Куйкўпирим қайдасан?

Кимлардир фикрини айтар олиб тан,
Қайда қорнинг тўйса – шу ердир Ватан.
Мен эса ҳар сафар шошиб қайтаман –
Қизилчоли, Куйкўпирим қайдасан?

Менда ҳам бир талай бўлганди имкон,
Қай бир шаҳарларни тутмоққа макон.
Нетай, фақат шунда ором олар жон —
Қизилчоли, Куйкўпирим қайдасан?

Балким айтишарлар қилишиб таъна,
Бизлар обрў топдик Тошкентда, мана.
Сизга қанот берган ЮРТ дейман яна,
Қизилчоли, Куйкўпирим қайдасан?

Майли, довруғингиз оламни тутсин,
Ҳар ким синовлардан муқаррар ўтсин.
Лекин сизни қайда интиқроқ кутсин,
Қизилчоли, Куйкўпирим қайдасан?

Уч кун бўлсам ҳамки шаҳри азимда,
Соғинч аломати балқир юзимда.
Меҳринг сабаб Аҳмад доим таъзимда –
Қизилчоли, Куйкўпирим қайдасан?
Аҳмад Нафасов

***       

       ШУКР АЙЛАБ

Шукр айлаб, айтайин шуни,
Бугун — ёзнинг ёқимли куни.
Кечаги кун ҳарорат неча
Эди, қани тушса бир эсга!

Туни бўйи ва куни билан
Яшагандик омонлик тилаб.
Мана бугун яйради жонлар,
Жонландилар тиллар, забонлар.

Шеър машқига сатрлар хўби
Топилмоқда, хуш келса ўқи...
Безантирар барча гулларин,
Майсаларга ҳам бериб ўрин.

Саховати, ёзнинг, билинди,
Одамларга ошкор қилинди.
Завқинг тошиб ёнбошласанг ҳам,
Дўстлар билан чеккан қайғу-ғам
Қайга кетди, билмассан энди,
Дунё кўнгил мулкидай кенгдир...

Жумабой ҲИДОЯТОВ,
"Жайхун илҳомлари" ННТ аъзоси.

***

            Соғинч
Қизим Адолатхонга

Ёз ўтиб, куз келди ташвишлар ила,
Қалбимга соғинчни тоғ билан тенглаб.
Митти вужудингни суратинг бирла,
Жоним ҳалқасига қўйгум муҳрлаб.

Мунис кўзларингда Қуёш чарақлаб,
Кун бўйи кутишдан чарчагандирсан.
Тунлари ухламай ненидир излаб,
Балки эртакларим соғингандирсан.

Шамол силаганда сочинг толасин,
Дадамнинг қўли, деб фараз этақол.
Қўмсасанг, қалбимнинг меҳр қалъасин,
Жавонда шеърларим ўқиб чиқақол.

Атрофга қарагин – фасли олтин куз,
Жилвакор дарахтнинг барги сарғайган.
Мени тошюрак деб ўйлама ҳаргиз,
Соғинчдан отангнинг кўзи сарғайган.

Туш бўлиб кирайин ширин уйқунгга,
Гўзал тонгларингдан бири отганда.
Ё насиб, шодлик-ла бориб уйингга,
Бағримга босаман яқин кунларда.

Одил Шомуродов. Астрахань, 2001 йил