Jayxun ilhomlari

            Yurt sogʻinchi

Koʻngling toʻq, qadding tik – yursang elingda,
Shukringni har kuni ming bor aytasan.
Sogʻinchin sezarsan ketsang dilingda,
Qizilcholi, Kuykoʻpirim qaydasan?

Kimlardir fikrini aytar olib tan,
Qayda qorning toʻysa – shu yerdir Vatan.
Men esa har safar shoshib qaytaman –
Qizilcholi, Kuykoʻpirim qaydasan?

Menda ham bir talay boʻlgandi imkon,
Qay bir shaharlarni tutmoqqa makon.
Netay, faqat shunda orom olar jon —
Qizilcholi, Kuykoʻpirim qaydasan?

Balkim aytisharlar qilishib taʼna,
Bizlar obroʻ topdik Toshkentda, mana.
Sizga qanot bergan YuRT deyman yana,
Qizilcholi, Kuykoʻpirim qaydasan?

Mayli, dovrugʻingiz olamni tutsin,
Har kim sinovlardan muqarrar oʻtsin.
Lekin sizni qayda intiqroq kutsin,
Qizilcholi, Kuykoʻpirim qaydasan?

Uch kun boʻlsam hamki shahri azimda,
Sogʻinch alomati balqir yuzimda.
Mehring sabab Ahmad doim taʼzimda –
Qizilcholi, Kuykoʻpirim qaydasan?
Ahmad Nafasov

***       

       ShUKR AYLAB

Shukr aylab, aytayin shuni,
Bugun — yozning yoqimli kuni.
Kechagi kun harorat necha
Edi, qani tushsa bir esga!

Tuni boʻyi va kuni bilan
Yashagandik omonlik tilab.
Mana bugun yayradi jonlar,
Jonlandilar tillar, zabonlar.

Sheʼr mashqiga satrlar xoʻbi
Topilmoqda, xush kelsa oʻqi...
Bezantirar barcha gullarin,
Maysalarga ham berib oʻrin.

Saxovati, yozning, bilindi,
Odamlarga oshkor qilindi.
Zavqing toshib yonboshlasang ham,
Doʻstlar bilan chekkan qaygʻu-gʻam
Qayga ketdi, bilmassan endi,
Dunyo koʻngil mulkiday kengdir...

Jumaboy HIDOYaTOV,
"Jayxun ilhomlari" NNT aʼzosi.

***

            Sogʻinch
Qizim Adolatxonga

Yoz oʻtib, kuz keldi tashvishlar ila,
Qalbimga sogʻinchni togʻ bilan tenglab.
Mitti vujudingni surating birla,
Jonim halqasiga qoʻygum muhrlab.

Munis koʻzlaringda Quyosh charaqlab,
Kun boʻyi kutishdan charchagandirsan.
Tunlari uxlamay nenidir izlab,
Balki ertaklarim sogʻingandirsan.

Shamol silaganda soching tolasin,
Dadamning qoʻli, deb faraz etaqol.
Qoʻmsasang, qalbimning mehr qalʼasin,
Javonda sheʼrlarim oʻqib chiqaqol.

Atrofga qaragin – fasli oltin kuz,
Jilvakor daraxtning bargi sargʻaygan.
Meni toshyurak deb oʻylama hargiz,
Sogʻinchdan otangning koʻzi sargʻaygan.

Tush boʻlib kirayin shirin uyqungga,
Goʻzal tonglaringdan biri otganda.
Yo nasib, shodlik-la borib uyingga,
Bagʻrimga bosaman yaqin kunlarda.

Odil Shomurodov. Astraxan, 2001-yil