Oʻquvchilar “Jayhun ilhomlari” nomli NNT qoshidagi kutubxona bilan tanishdilar

Xabaringiz bor, 21-27-aprel kunlari mamlakatimizdagi barcha hududlarida “Oʻzbekiston – kitobxonlar yurti” shiori ostida V Respublika “Kitobxonlik haftaligi” tadbirlari yuqori saviyada tashkil etildi. Bu yilgi haftalikni yanada mazmunli va boy tarzda tashkil etish maqsadida koʻplab yangi va diqqatga sazovor gʻoyalar amalga oshirildi.

Har yili oʻtkaziladigan “Kitobxonlik haftaligi” davlatimizda kitob mutolaasini ragʻbatlantirish, adabiyotga boʻlgan qiziqishni oshirish, kitobxonlik madaniyatini xalq orasida keng tarqatish maqsadida yoʻlga qoʻyilgan muhim tadbirlardan biridir. Kitobxonlik madaniyati xalq tafakkurini rivojlantirishda muhim rol oʻynaydi. Shuning uchun kitobxonlik haftaligi doirasida oʻtkazilgan tadbirlar aholining har bir qatlamini qamrab olishga qaratilgan edi.

Tadbirlar doirasida 40-sonli maktabning kutubxonachisi Gulchiroy Davlatboyeva boshchiligida bir guruh kitobxon oʻquvchilar “Jayhun ilhomlari” nomli NNT qoshida tashkil etilgan kutubxona bilan tanishdilar. Bu kutubxona oʻzining boy fondi, milliy va zamonaviy oʻzbek hamda jahon adabiyotining nodir namunalari bilan aholining eʼtiborida. Tadbir davomida maktabning 8-sinf oʻquvchilari nodir adabiyotlar bilan yaqindan tanishib, mutolaa ahamiyati va kutubxonaga aʼzo boʻlish tartibi haqida batafsil maʼlumot olishdi. Bu amaliyot oʻquvchilarda kitobga boʻlgan qiziqishni yanada kuchaytirib, ularni intellektual oʻsishga, bilim olishga ragʻbatlantirishga xizmat qiladi.

Kutubxonalardagi bu kabi tadbirlar, albatta, har bir yosh avlodning kitobga boʻlgan qiziqishini va yozuvchilarga, mualliflarga ehtiromini yuksaltirishga yordam beradi. Kitobxonlik haftaligi doirasida tashkil etilgan bunday tadbirlar xalq tafakkuri va madaniyatini rivojlantirishning muhim vositasi boʻlib xizmat qilmoqda.