“Jayxun ilhomlari” NNT tomonidan kam taʼminlangan oilalarga 1000 tup koʻchat tarqatildi

Bugungi kunda atrof-muhit muhofazasi va aholining ekologik madaniyatini yuksaltirish nafaqat davlat tashkilotlarining, balki fuqarolik jamiyati institutlarining ham asosiy vazifalaridan biriga aylandi. Xususan, nodavlat notijorat tashkilotlarining ijtimoiy sheriklik asosida amalga oshirayotgan loyihalari hududlardagi ekologik vaziyatni barqarorlashtirish hamda aholi turmush farovonligini oshirishda muhim ahamiyat kasb etmoqda.

Yaqinda “Jayxun ilhomlari” nodavlat notijorat tashkiloti Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan eʼlon qilingan grant tanlovida ishtirok etib, gʻoliblikni qoʻlga kiritdi. “Aholining ekologik ongi va madaniyatini yuksaltirish va sohada amaliy ishlarni targʻib qilish” yoʻnalishi boʻyicha taqdim etilgan "Ekologik madaniyat – sogʻlom kelajak asosi" loyihasi komissiya tomonidan yuqori baholanib, moliyalashtirildi. Bu esa Qoraqalpogʻistonning Amudaryo tumanida keng koʻlamli xayrli ishlarni boshlash uchun huquqiy va moliyaviy zamin yaratdi.

Mazkur grant loyihasi doirasida amalga oshirilayotgan ilk yirik tadbirlardan biri — "Oilamiz bogʻini yaratamiz!" aktsiyasi boʻldi. Taʼkidlash joizki, ushbu tashabbus shunchaki koʻchat ekish tadbiri emas, balki aniq maqsadga yoʻnaltirilgan ijtimoiy qoʻllab-quvvatlash loyihasidir. Amudaryo tumani Mahallalar uyushmasi hamda “Inson” ijtimoiy xizmatlar markazi bilan hamkorlikda tashkil etilgan aktsiya davomida tumandagi ijtimoiy himoyaga muhtoj, kam taʼminlangan va “Ijtimoiy himoya” yagona reyestriga kiritilgan oilalar tanlab olindi.

Loyiha doirasida tuman boʻyicha 50 ta ehtiyojmand oilaning har biriga 20 tupdan, jami 1000 tup sara mevali daraxt koʻchatlari bepul tarqatildi. Jarayonning shaffof va manzilli boʻlishini taʼminlash maqsadida koʻchatlar “Inson” ijtimoiy xizmatlar markazining joylardagi xodimlariga topshirildi. Ijtimoiy xodimlar esa oʻz navbatida nafaqat koʻchatlarni egalariga yetkazib berish, balki uni ekish ishlariga ham yaqindan koʻmaklashadilar.

Orolboʻyi mintaqasida, xususan, Amudaryo tumanida yashillikni koʻpaytirish, havo musaffoligini taʼminlash va tuproq shoʻrlanishining oldini olishda har bir tup daraxtning oʻrni beqiyos. 1000 tup yangi daraxt ekish — bu kelajakda toza havo manbai va moʻʼtadil mikroiqlimga kichik boʻlsada hissa qoʻshish deganidir. Shu oʻrinda loyihaning iqtisodiy samaradorligini ham unutmaslik kerak. Mevali daraxtlar bir necha yildan soʻng hosilga kirgach, ushbu oilalar uchun qoʻshimcha daromad manbaiga aylanadi. Bu “kambagʻallikni qisqartirish” umummilliy harakati bilan hamohang boʻlib, aholining tomorqadan samarali foydalanish koʻnikmasini shakllantiradi va oila byudjetiga foyda keltiradi.

Loyiha faqat koʻchat ekish bilan cheklanib qolmaydi. Uning doirasida aholining ekologik huquqiy savodxonligini oshirishga qaratilgan tizimli ishlar ham rejalashtirilgan. Xususan, ovul va mahallalarda fuqarolar bilan uchrashuvlar oʻtkazilib, unda ekologiya va atrof-muhitni muhofaza qilishga oid qonunchilik yangiliklari tushuntiriladi.

Yosh avlod tarbiyasi ham loyihaning diqqat markazida boʻladi. "Yosh ekolog" toʻgaragi aʼzolari uchun tabiat bagʻriga sayohatlar uyushtirish ham koʻzda tutilgan boʻlib, bu bolalarda ona tabiatga mehr uygʻotishning eng samarali usulidir. Shuningdek, umumtaʼlim maktablari oʻquvchilari oʻrtasida "Yashil tabiatni asrash – oʻz qoʻlimizda" mavzusida insholar tanlovi, turli ijodiy ishlar, sheʼr va rasmlar tanlovlarini oʻtkazish reja qilingan. Bu tadbirlar yoshlarda ekologik ongni shakllantirishga, ularni tabiatga nisbatan masʼuliyatli boʻlishga undaydi.

Xulosa oʻrnida aytganda, “Jayxun ilhomlari” nodavlat notijorat tashkiloti tomonidan amalga oshirilayotgan mazkur loyiha davlat va jamoat tashkilotlari hamkorligining yorqin namunasidir. U bir vaqtning oʻzida ham ijtimoiy, ham ekologik muammolar yechimiga xizmat qilishi bilan ahamiyatlidir.