“Jayxun ilhomlari” nodavlat notijorat tashkilotining grant loyihasi doirasida Nukusda spektakl namoyish etildi

Joriy yilning fevral oyida “Jayxun ilhomlari” nodavlat notijorat tashkiloti Qoraqalpogʻiston Respublikasi Joʻqorgʻi Kengesi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan eʼlon qilingan tanlovda oʻz loyihasi bilan ishtirok etib, davlat granti sohibi boʻlgan edi. Grant loyihasi ish rejasiga koʻra tashkilot Qoraqalpogʻiston Respublikasi Madaniyat vazirligi bilan hamkorlikda korruptsiyaga qarshi kurashishning zamonaviy usullaridan foydalangan holda ushbu illatning oldini olishga koʻmaklashish maqsadida eng sara sahna asarini aniqlash boʻyicha stsenariylar tanlovini eʼlon qildi. Joriy yilning may oyida esa hakamlar hayʼati tomonidan Bayjan Uzaqov qalamiga mansub “Davr dardi” nomli spektakl stsenariysi tanlov gʻolibi deb eʼlon qilindi.

Korruptsiyaning davlat va jamiyat taraqqiyotiga salbiy taʼsirini va poraxoʻr hamda taʼmagir insonlarning taqdiri qanchalik ayanchli tugashini hayotiy misollar bilan ifoda etuvchi mazkur sahna asari ikki oy davomida rejissyor Mars Nuratdinov boshchiligidagi ijodkorlar guruhi tomonidan sahnalashtirildi.

17-iyul kuni Qoraqalpoq davlat yosh tomoshabinlar teatrida “Davr dardi” nomli ushbu spektaklning premerasi boʻlib oʻtdi. Premerada Qoraqalpogʻiston Respublikasi Joʻqorgʻi Kengesi, Madaniyat vazirligi masʼullari, grant loyihasining ijrochilari hamda keng jamoatchilik vakillari ishtirok etishdi.

Korruptsiya va taʼmagirlik, afsuski, jamiyat va davlat rivojiga jiddiy salbiy taʼsir koʻrsatuvchi global muammolardan biri hisoblanadi. Bu illatlar iqtisodiy oʻsishni sekinlashtiradi, investitsiyalarni kamaytiradi va davlatning institutsional tizimiga putur yetkazadi. Shuningdek, korruptsiya fuqarolarning ijtimoiy adolatga, haqiqatga va davlat organlariga boʻlgan ishonchining yoʻqolishiga olib keladi.

Oʻzbekiston Respublikasida korruptsiyaga qarshi kurashish masalasi davlat rahbariyatining doimiy diqqat markazida. Davlatimiz korruptsiyaning oldini olish va uning ildizlariga barham berish maqsadida koʻplab tadbirlarni amalga oshirmoqda. Jumladan, qonunchilik asoslarini takomillashtirish, davlat organlarining ochiqligini taʼminlash va axborotlardan foydalanish imkoniyatlarini kengaytirish borasida muhim ishlar amalga oshirilmoqda. Qoraqalpogʻiston Respublikasi Joʻqorgʻi Kengesi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan aynan shu masalada davlat granti ajratilgani ham fikrimizning isbotidir.

Bayjan Uzaqov qalamiga mansub ushbu asarda oliy taʼlim muassasasi oʻqituvchilaridan birining kirdikorlari fosh etiladi hamda uning ayanchli taqdiri ibrat sifatida ifoda etiladi. Asarda taʼmagir oʻqituvchi talabalardan biriga “Seni oʻqishga men kiritdim” deb, undan pora talab qiladi. Belgilangan pulni bermasa, turli yoʻllar bilan oʻqishdan chetlatishini aytib, talabaga bosim oʻtkazadi. Fakultet rahbariyati, hamkasblari hamda halol va toʻgʻrisoʻz oʻqituvchi doʻstining ogohlantirishlari va tanbehlariga qaramasdan qingʻir yoʻldan qaytmagan “qahramon”, nihoyat huquqni muhofaza qilish organlari xodimlari tomonidan qoʻlga olinadi. Spektakl soʻngida uning farzandlari hamda turmush oʻrtogʻining monologlari har qanday tomoshabinni toʻlqinlantirib, taʼmagirlik kabi illatga nisbatan keskin murosasizlikka chorlaydi.

Spektakldagi barcha rollarni Qoraqalpoq davlat yosh tomoshabinlar teatrining isteʼdodli aktyor va aktrisalari maromiga yetkazib ijro qilgan.

“Jayxun ilhomlari” NNTning grant loyihasi ish rejasida mazkur sahna asarini davlat organlari xodimlari va keng jamoatchilik uchun bir necha oy davomida namoyish qilish, shu orqali aholi ongida korruptsiyaga qarshi murosasizlik tuygʻusini shakllantirishga hissa qoʻshish rejalashtirilgan.

Premera soʻngida Qoraqalpogʻiston Respublikasi Joʻqorgʻi Kengesining qoʻmita boshligʻi Tajibay Romanov soʻzga chiqib, spektaklga dolzarb mavzu tanlangani, uning mahorat bilan sahnalashtirilgani, ijro etilgani hamda muvaffaqiyatli namoyishi bilan loyiha ijrochilarini, ijodiy guruhni tabrikladi va kelgusi ishlariga muvaffaqiyatlar tiladi.

X.Aytboyeva, loyiha koordinatori