“Жайхун илҳомлари” нодавлат нотижорат ташкилотининг грант лойиҳаси доирасида Нукусда спектакль намойиш этилди

Жорий йилнинг февраль ойида “Жайхун илҳомлари” нодавлат нотижорат ташкилоти Қорақалпоғистон Республикаси Жўқорғи Кенгеси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан эълон қилинган танловда ўз лойиҳаси билан иштирок этиб, давлат гранти соҳиби бўлган эди. Грант лойиҳаси иш режасига кўра ташкилот Қорақалпоғистон Республикаси Маданият вазирлиги билан ҳамкорликда коррупцияга қарши курашишнинг замонавий усулларидан фойдаланган ҳолда ушбу иллатнинг олдини олишга кўмаклашиш мақсадида энг сара саҳна асарини аниқлаш бўйича сценарийлар танловини эълон қилди. Жорий йилнинг май ойида эса ҳакамлар ҳайъати томонидан Байжан Узақов қаламига мансуб “Давр дарди” номли спектакль сценарийси танлов ғолиби деб эълон қилинди.

Коррупциянинг давлат ва жамият тараққиётига салбий таъсирини ва порахўр ҳамда таъмагир инсонларнинг тақдири қанчалик аянчли тугашини ҳаётий мисоллар билан ифода этувчи мазкур саҳна асари икки ой давомида режиссёр Марс Нуратдинов бошчилигидаги ижодкорлар гуруҳи томонидан саҳналаштирилди.

17 июль куни Қорақалпоқ давлат ёш томошабинлар театрида “Давр дарди” номли ушбу спектаклнинг премьераси бўлиб ўтди. Премьерада Қорақалпоғистон Республикаси Жўқорғи Кенгеси, Маданият вазирлиги масъуллари, грант лойиҳасининг ижрочилари ҳамда кенг жамоатчилик вакиллари иштирок этишди.

Коррупция ва таъмагирлик, афсуски, жамият ва давлат ривожига жиддий салбий таъсир кўрсатувчи глобал муаммолардан бири ҳисобланади. Бу иллатлар иқтисодий ўсишни секинлаштиради, инвестицияларни камайтиради ва давлатнинг институционал тизимига путур етказади. Шунингдек, коррупция фуқароларнинг ижтимоий адолатга, ҳақиқатга ва давлат органларига бўлган ишончининг йўқолишига олиб келади.

Ўзбекистон Республикасида коррупцияга қарши курашиш масаласи давлат раҳбариятининг доимий диққат марказида. Давлатимиз коррупциянинг олдини олиш ва унинг илдизларига барҳам бериш мақсадида кўплаб тадбирларни амалга оширмоқда. Жумладан, қонунчилик асосларини такомиллаштириш, давлат органларининг очиқлигини таъминлаш ва ахборотлардан фойдаланиш имкониятларини кенгайтириш борасида муҳим ишлар амалга оширилмоқда. Қорақалпоғистон Республикаси Жўқорғи Кенгеси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан айнан шу масалада давлат гранти ажратилгани ҳам фикримизнинг исботидир.

Байжан Узақов қаламига мансуб ушбу асарда олий таълим муассасаси ўқитувчиларидан бирининг кирдикорлари фош этилади ҳамда унинг аянчли тақдири ибрат сифатида ифода этилади. Асарда таъмагир ўқитувчи талабалардан бирига “Сени ўқишга мен киритдим” деб, ундан пора талаб қилади. Белгиланган пулни бермаса, турли йўллар билан ўқишдан четлатишини айтиб, талабага босим ўтказади. Факультет раҳбарияти, ҳамкасблари ҳамда ҳалол ва тўғрисўз ўқитувчи дўстининг огоҳлантиришлари ва танбеҳларига қарамасдан қинғир йўлдан қайтмаган “қаҳрамон”, ниҳоят ҳуқуқни муҳофаза қилиш органлари ходимлари томонидан қўлга олинади. Спектакль сўнгида унинг фарзандлари ҳамда турмуш ўртоғининг монологлари ҳар қандай томошабинни тўлқинлантириб, таъмагирлик каби иллатга нисбатан кескин муросасизликка чорлайди.

Спектаклдаги барча ролларни Қорақалпоқ давлат ёш томошабинлар театрининг истеъдодли актёр ва актрисалари маромига етказиб ижро қилган.

“Жайхун илҳомлари” ННТнинг грант лойиҳаси иш режасида мазкур саҳна асарини давлат органлари ходимлари ва кенг жамоатчилик учун бир неча ой давомида намойиш қилиш, шу орқали аҳоли онгида коррупцияга қарши муросасизлик туйғусини шакллантиришга ҳисса қўшиш режалаштирилган.

Премьера сўнгида Қорақалпоғистон Республикаси Жўқорғи Кенгесининг қўмита бошлиғи Тажибай Романов сўзга чиқиб, спектаклга долзарб мавзу танлангани, унинг маҳорат билан саҳналаштирилгани, ижро этилгани ҳамда муваффақиятли намойиши билан лойиҳа ижрочиларини, ижодий гуруҳни табриклади ва келгуси ишларига муваффақиятлар тилади.

Х.Айтбоева, лойиҳа координатори