БОБОМ ХОТИРАСИ доим қалбимизда
Хотира - аждодларимизни бизга эслатиб турувчи муқаддас туйғудир. Мен бугун кўзимга ёш олиб, бобомни эсладим. Бобом Раҳим Матқурбонов 1915 йил Жумуртов қишлоғида туғилган. Болалик чоғлариданоқ ўқитувчилик касбига меҳр қўйган экан. Шу касбни эгаллаш мақсадида мактабни тугатгандан сўнг, Нукусдаги муаллимлар тайёрлаш олийгоҳини тугатиб, қишлоғига келади ва шу ердаги мактабда болаларга дарс беради. Иш фаолиятини 1937 йили ўқитувчиликдан бошлаган бобом Раҳим Матқурбонов кейинчалик илмий бўлим мудирлигига тайинланади. Орада машъум Иккинчи жаҳон уруши бошланиб қолади.
Она Ватанининг мард ва жасур ўғлони бўлган бобом дарҳол урушга отланади. Кейинчалик ўз Ватанига қайтгач, яна севимли касбини давом эттирган.
Бобом 6-сонли мактабдаги иш фаолияти даврида мактаб директорлигигача бўлган вазифаларда сидқидилдан меҳнат қилган. Шу давр мобайнида кўплаб шогирдлар тайёрлаган ҳамда шу қишлоқ аҳли фарзандларининг таълим олиб, камол топишига катта ҳиссасини қўшган. "Қорақалпоғистонда хизмат кўрсатган ўқитувчи” унвонини олишга сазовор бўлган. Кейинчалик нафақага чиққач, "Зарбдор” жамоа хўжалигида уруш фахрийлари уюшмасида раис вазифасида фаолият кўрсатган.
Бобом оилада меҳрибон ота бўлган. Бувим билан биргаликда фарзандларини эл-юртга фойдаси тегадиган инсонлар қилиб вояга етказишган. Фарзандларининг бири зиёли, бири шифокорлик касбини эгаллаган. Улар ҳозирги кунда бобом ва бувим руҳларини шод қилиб, она Ватанимиз равнақига каттадан-катта ҳисса қўшиб келишмоқда.
Бобожон! Сиздек инсоннинг набираси бўлганимдан фахрланаман ва сизга муносиб бўлишга ҳар доим ҳаракат қиламан.
Гўзал ОТАЖОНОВА, 3-сонли Амударё академик лицейи ўқувчиси.
(Фото - http://turkistonpress.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
