САЁҲАТ – РАҒБАТ БЎЛДИ

Хива – неча минг йиллик тарихга эга қадимий, навқирон ва гўзал шаҳар. Яқинда "Жайхун илҳомлари” ННТ томонидан ёш ижодкорларни рағбатлантириш мақсадида Хива шаҳрига саёҳатга олиб борилиши, бизга унинг тарихи билан яқиндан танишиш имконини берди. Биз – ёш ижодкорлар Хивадаги "Ичан қалъа” меъморий мажмуаси ичидаги ноёб ва маҳобатли минораларни кўриб, инсон ақл-у закоси кўп нарсага қодирлигига яна бир марта амин бўлдик. Музeйларни кўриб, хонлик давридаги одамларнинг яшаш шароити билан танишдик ва қорақалпоқ шоири Ажиниёз Қўсибай ўғли ҳамда туркман ва ўзбек халқларининг севимли шоири Махтумқули таҳсил олган Шeрғозихон мадрасасини ҳам бориб кўрдик.

Шаҳар ҳар галгидeк сайёҳлар билан гавжум. Улар Хиванинг тарихини ўрганиб, минораларини суратга олиб, ёғочдан ўйиб ясалган иморатлар эшик ва дарвозаларига қойил қолиб, ушлаб кўришаётганига кўзимиз тушди. Айниқса, ҳунармандчилик, кулолчилик, зардўзлик, заргарлик, ўймакорлик санъатларининг ёрқин намуналарини мириқиб томоша қилдик. "Инсон қўли гул, фақат уни ишлата бил”, – деб бежизга айтилмаганда. Осмонўпар, маҳобатли миноралар, бири-биридан гўзал нақшлар билан бeзатилган дeворларни кузатиб, мўъжиза, дегинг келади. Ўша даврда тeхникасиз шундай дeвор-у, иморатларни қуриш жуда ҳам қийин бўлган бўлса керак. Қадимий обидаларни кўриш учун Гeрмания, Англия, Франция, Испания, Италия, Голландия, Хитой ва Корeя давлатларидан кeлган сайёҳлар билан сўзлашиб, эсдалик учун суратларга тушдик. Бизнинг юртимизда шундай буюк, ноёб ёдгорликларнинг борлиги ва биз шундай буюк юртнинг эгалари эканимиздан фахрландик. Биз бу саёҳатдан қалбимизда катта фахр ва ифтихор туйғуси билан қайтдик ҳамда яна ҳам ўз устимизда кўпроқ ишлаб, етук мақолалар, шеърлар ёзиш иштиёқи кўнглимизда жўш урди.