Тенгдошларимга гапим бор

ЎЙИНЧОҚМИ, ОВУНЧОҚ?

Атрофга назар солсак, деярли ҳаммада қўл телефони мавжуд. Биров мусиқа тинглаётган, биров баланд овозда телефонда гаплашаётган, бошқаси эса турли хил отишмали ўйинларнинг овозини баланд қўйиб ўйнаётган бўлади.

Ҳозирги кунда ўн ёшга тўлмаган болаларнинг қўлида ҳам катта планшетларни кўрасиз. Буларни албатта, ота-оналари фалонча сўмга сотиб олиб бераяпти. Хўш, ўйлаб кўрайлик, улар бундан нима мақсадда фойдаланишаяпти? Албатта кўпчилиги ўйинлар ўйнашади. Ўйинлар деганда бир-бирини отишаётган, ўлдираётган ўйинларни ўйнашади. Бу болаларнинг онгига салбий таъсир кўрсатмай қолмайди. Яна баланд овозда мусиқалар тинглашади, баъзилари эса "наушник”ларни тақиб олишадида атрофида нималар бўлаётганига эътибор бермайди. Тиббиётнинг гувоҳлик беришича, "наушник”ларда мусиқа эшитиш инсоннинг асаб тизимини ишдан чиқариши, хотира пасайиши ҳамда қулоқнинг эшитиш қобилиятини пасайтириши мумкин экан. Баъзи ёшлар "WhatsApp”, "Telegram”, "Viber” каби тармоқларга кириб, бўлмағур одатларни ўзлаштириб олишмоқда.

Ўйлаб қарайлик тенгдошлар, бу кичкина овунчоқ бизга нима фойда бераяпти. Нега биз ундан кун-у тун бошимизни кўтармаяпмиз? Наҳотки шу ўйинчоққа шунчалик боғланиб қолган бўлсак? Бу ўйинчоқнинг ўрнига бирор-бир китоб сотиб олиб, ўқиб-ўргансак ҳаётимизда асқотмасмиди? Мен бу фикрларим билан вақтимизни беҳуда сарфламайлик, ўқийлик, изланайлик, бир ҳунарнинг эгаси бўлайлик, демоқчиман. Ана шунда биз ҳаётда ўз ўрнимизни топишга эришишимиз мумкин.