ТУМАН ҲАФТА ИЧИДА

9 август

Амударё қишлоқ хўжалик касб-ҳунар коллежида "Фуқаролар йиғинлари фаолиятининг асосий йўналишлари бўйича комиссиялари ишини самарали ташкил этиш ва амалга ошириш тартиб-тамойиллари” мавзусида ўқув-семинари ўтказилди.

Семинарда жамоатчилик асосида иш юритувчи комиссиялар ишини самарали ташкил қилиш юзасидан мутахассислар маъруза қилдилар.

Семинарда иштирокчилар ўзларини қизиқтирган саволларга жавоблар олди.

11 август

9-сонли Болалар мусиқа ва санъат мактабида мамлакатимиз мустақиллигининг 25 йиллигига бағишланган тарғибот тадбири ўтказилди.

"Кеча ким эдигу бугун ким бўлдик, эртага қандай янги марраларни эгаллашимиз керак” мавзусида ўтказилган тадбирда Бердақ номидаги Қорақалпоқ Давлат университети профессор-ўқитувчилари ўз маърузалари билан иштирок этдилар.

Тадбирда туманимиздаги овул ва маҳаллалардан таклиф қилинган маҳалла фаоллари, зиёлилар, ўқитувчилар иштирок этди.

11 август

Ўрта қалъа овулидаги "Арна бўйи” маҳалласида мамлакатимиз мустақиллигининг 25 йиллиги муносабати билан 1982-2000 йиллар оралиғида туғилган ўсмирлар ва ёшлар ўртасида футбол бўйича маҳалла биринчилиги мусобақаларига старт берилди.

Ёшларнинг бўш вақтларини мазмунли ташкил қилиш ва уларни спортга ошно қилиш мақсадида ташкил қилинган мусобақаларда маҳалла ёшларидан иборат 17 та жамоа иштирок этмоқда.

Ғолиблар истиқлол байрами арафасида аниқланади ва МФЙ томонидан рағбатлантирилади.

12 август

Амир Темур номли овулнинг "Меҳнаткаш” аҳоли пунктида яшайдиган, турмуш ўртоғи Оллабой Гижиров вафот этгач, фарзандларининг ташвиши ёлғиз ўзига қолган Омонгул Саидованинг 2009 йилда туғилган ўғли Ёдгорнинг суннат тўйини ўтказиш орзуси амалга ошди. ОФЙ раҳбарияти, овулдаги фермерлар тўй харажатларини ўз зиммаларига олишиб, ёлғиз онага кўмакдош бўлишди. "Юсупов Ибодулла” фермер хўжалиги ишчиси Омонгул Саидова овулдошларининг истиқлол байрами арафасидаги бу саҳоватидан чуқур миннатдор бўлди.

14 август

Қипчоқ овули, "Дарё бўйи” маҳалласида "Маҳалла” хайрия жамоат фонди туман бўлинмаси ташаббуси билан "Маҳаллам қиёфаси 25 йил ичида” шиори остида байрам тадбири ўтказилди.

Тадбирда йиғилганларга мустақиллик йилларида туманимиздаги овул ва маҳаллаларда юз берган ўзгаришлар, қурилиш ва бунёдкорлик ишлари, халқимиз турмуш тарзида рўй берган юксалишлар муҳрланган фотосуратлар намойиш қилинди.

Она Ватанимизни, истиқлол ва озодликни мадҳ этувчи куй-қўшиқлар дилларга хушнудлик бахш этди.