ФАХР

Мен 1986 йил 40-сонли мактабнинг  биринчи синфига қабул қилиниб, 1997 йил уни тугатдим. Олийгоҳни битириб келиб ушбу даргоҳга, ўз устозларим қучоғига шошилдим ва 2005 йил инглиз тили фани ўқитувчиси сифатида ишга қабул қилиндим.

Ушбу кунгача мамлакатимиз таълим соҳасида бўлгани каби мактабимиздаги ўзгаришларни кўриб, кўзингиз қувонади.

Қисқа йиллар давомида мактаб капитал таъмирланди. Иккита катта компьютер хонаси, 2 та инглиз тили хонаси, 2 та рус тили хонаси, қорақалпоқ тили хоналари, кимё ва биология  фанлари хоналари замонавий технология воситалари ва лаборатория анжомлари билан тўлиқ таъминланди.

Айниқса, бошланғич синф хоналарининг ҳар биттасига алоҳида телевизор қўйилганлиги эътиборга молик. Бундай шароит нафақат ўқитувчининг ўз ишига бўлган масъулиятини, балки ўқувчиларнинг илм олишга бўлган қизиқишларини орттириши тайин.

Мамлакатимиз мустақиллигининг 25 йиллиги муносабати билан ўтказиладиган байрам тадбирига  мактабимизда алоҳида тайёргарлик кўрилмоқда.

Мактабимиз атрофидаги ободонлаштириш ишларини, гулзорларни кўриб, беихтиёр дилингиз яйрайди

Мен шундай жаннатмакон юртда туғилиб вояга етганимдан, шундай муқаддас даргоҳда фаолият юритаётганимдан Аллоҳга шукрона айтаман.

Юртдошларимизни энг улуғ байрам - мустақиллик байрами билан чин қалбимдан табриклайман!