ЮТУҚЛАР САРҲИСОБ ҚИЛИНИБ, ЯНГИ РЕЖАЛАР БЕЛГИЛАНДИ
Мустақиллик йилларида мамлакатимизда мислсиз ютуқларга эришилди. Илм-фан, маданият спорт соҳаларида, соғликни сақлаш тизими, аграр соҳа ҳамда иқтисодиётнинг барча бўғинларида буюк ўзгаришлар, янгиланишлар юз берди.
Иқтисодий-ижтимоий ҳамда маданий-маърифий ҳаётимизда рўй бераётган жаҳон андозаларига мос юксалишлар, ўзгариш ва янгиланишларнинг асосий мезони – бу бутун дунёда тараққиётнинг "Ўзбек модели” сифатида ҳавас уйғотган Кадрлар тайёрлаш Миллий дастури, "Таълим тўғрисида”ги Ўзбекистон Республикаси Қонунининг халқимиз ҳаётига изчил татбиқ этилганидир. Таълим соҳасида эришилаётган бу каби муваффақиятлар айни кунларда бутун мамлакатимизда бўлиб ўтаётган ўқитувчи ва мураббийларнинг анъанавий август Кенгашларида алоҳида эътироф этилмоқда. 26 август куни туман ҳокимлигининг катта мажлислар хонасида кўтаринки руҳда ўтказилган туманимиз ўқитувчиларининг анъанавий август Кенгашида янги ўқув йили олдидан қилинган ишлар сарҳисоб этилиб, галдаги вазифалар белгилаб олинди. Анжуманда туман ҳокимининг ўринбосарлари, ҳокимлик мутахассислари, туманимизда фаолият олиб бораётган сиёсий партияларнинг вакиллари, таклиф этилган ўқитувчи ва мураббийлар, ОАВ вакиллари иштирок этдилар.
Анжуман делегатлари кун тартибидаги асосий масала – "Сифатли таълим-тарбия - бош вазифамиз” мавзусидаги туман ХТМФМТТЭ бўлими мудири А.Қўшаевнинг маърузасини эътибор билан тингладилар. Маърузачи ўз нутқида таълим-тарбия соҳасига татбиқ этилаётган инновацион педтехнологиялар, тобора янгиланиб бораётган таълим масканлари, янгидан барпо этилган мактаб ва спорт иншоотлари ҳамда уларда яратилган шарт-шароитлар туфайли бугунги ўқувчи-ёшлар эришаётган муваффаиятлар замирида устоз ва мураббийларнинг улкан меҳнати, билим ва салоҳияти, фидойилиги борлигини таъкидлади. Соҳада фидойилик кўрсатаётган устоз-мураббийларнинг номларини ҳурмат билан тилга олиб, миннатдорчилик билдирди.
Маъруза юзасидан қизғин музокаралар бўлди. Музокараларда иштирок этган 16-сонли ихтисослаштирилган давлат умумтаълим мактаби директори Шуҳрат Жуманиёзов, 2-сонли умумтаълим мактаб ўқитувчиси Райҳон Абдуллаева, 15-сонли умумтаълим мактаби ўқитувчиси Наргиза Матлатипова, "Камолот” ЁИҲ туман Кенгаши раиси Мансур Ўрозбоевлар туманимиз мактабларида олиб борилаётган ибратли ишлар билан бир қаторда ечимини кутаётган муаммолар хусусида ҳам сўз юритдилар.
Анжуманда туман ҳокими ўринбосари, хотин-қизлар қўмитаси раиси Марям Аҳмедова туман ҳокимлиги номидан устоз ва мураббийларни анъанавий август Кенгаши, яқинлашиб келаётган мамлакатимиз мустақиллигининг 25 йиллик байрами ҳамда "Билимлар куни” байрамлари билан самимий табриклади. Шунингдек у ўз сўзида соҳада эришилаётган ютуқларга ҳаққоний баҳо бериб, йўл қўйилаётган камчиликларга ҳам тўхталиб ўтди ва бу камчиликларни бартараф этиш юзасидан фикр-мулоҳазаларини билдирди.
Анжумунда ёш авлодни ҳар томонлама етук ва баркамол инсонлар қилиб тарбиялашда юксак натижаларга эришаётган бир гуруҳ ўқитувчи ва мураббийларга Ўзбекистон Республикаси ва Қорақалпоғистон Республикаси халқ таълими Вазирлигининг ҳамда туман ҳокимлигининг фахрий ёрлиқлари, туман ҳокимлиги ҳамда ХТМФМТТЭ бўлими томонидан тайёрланган эсдалик совғалари топширилди.
Туманимиз ўқитувчиларининг анъанавий август Кенгаши якунида кўрилган масала юзасидан тегишли қарор қабул қилинди.
Анжуман сўнгида туманимиздаги 9-сонли ҳамда 21-сонли болалар мусиқа ва санъат мактабларининг ўқувчилари томонидан тайёрланган байрамона концерт дастури намойиш этилди.
Робия ЙЎЛДОШЕВА.
Суратда: (чапдан) Қорақалпоғистон Республикаси халқ таълими аълочилари - 15-сонли мактаб ўқитувчиси Наргиза Матлатипова, 9-сонли мактаб директори Хайрулла Ўтаганов, 30-сонли мактабнинг бошланғич синф ўқитувчиси Шарофат Қодирова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
