СОҒЛОМ АВЛОДГИНА ЮРТ КЕЛАЖАГИНИ ЯРАТИШГА ҚОДИР

Ўзбекистон дунё мамлакатлари орасида хотин-қизлар учун қулай шароитлар яратиш, оналик ва болаликни муҳофаза қилиш борасида етакчи ўринлардан бирида туради.

Мустақиллик йилларида давлатимиз томонидан хотин-қизларнинг маънавий-маърифий, ижтимоий-иқтисодий, сиёсий ислоҳотларда фаол иштирок этиши учун кенг имкониятлар яратилмоқда. Натижада хотин-қизларнинг кучли  фуқаролик жамиятига ўтиш шароитида давлат ва жамият қурилишидаги ўрни ва роли тобора ошиб бормоқда. Чунки хотин-қизлар ҳам эркаклар билан  бир қаторда жамият ҳаётини ривожлантиришда фаол иштирок этиш имконияти ва қобилиятига эгадирлар. Қолаверса, жамиятнинг кичик бир бўлаги бўлган оила мустаҳкамлигига эришишда, маънавий-ахлоқий қадриятларимизнинг барқарор бўлишида ҳам аёлларнинг ўрни беқиёсдир.

Ўзбекистоннинг истиқлол йилларида қўлга киритган салмоқли ютуқларининг энг муҳими оналар ва болалар соғлиги муҳофазасига катта эътибор қаратилганлиги ва яхши натижаларга эришилаётганидир. Давлатимиз ва муҳтарам Юртбошимиз томонидан ушбу йўналишда қабул қилинаётган қатор қарорлар ва дастурлар бунга асос бўлмоқда.

Ўзбекистон Республикаси Президентининг 2014 йил 1 августдаги "2014-2018 йилларда Ўзбекистонда аҳолининг репродуктив саломатлигини янада мустаҳкамлаш, оналар, болалар ва ўсмирлар соғлигини муҳофаза қилиш борасидаги Давлат дастури тўғрисида”ги 2221-сонли қарори ҳам айнан шу мақсадларга қаратилгандир.

Туман тиббиёт бирлашмасида ҳам бу борада кўпгина ибратли ишлар амалга оширилмоқда.

Айни кунда туманимиз аҳолиси 184 999 нафардан ошиб, кетди. Шуларнинг  51 339 нафари туғиш ёшидаги аёллардир. Улар орасида соғлом турмуш тарзини тарғиб қилиш, ўзининг ва фарзандларининг соғлиги учун жавобгарлик ҳиссини тарбиялаш, соғлом фарзандларни дунёга келтириши борасида олиб бораётган тарғибот-ташвиқот ишларимиз ўзининг ижобий самараларини бераётир. Натижада аёллар кутилмаган ҳомиладорликдан ўзлари онгли равишда сақланиб, фарзанд кўришни оила аъзолари билан маслаҳатлашиб, соғлигини мустаҳкамлаган ҳолда режалаштирмоқдалар.

Шунингдек, туғиш ёшидаги аёлларнинг соғлигини назорат қилиб боришга ҳам эътибор берилаётир.

Туманимизда 2016 йилнинг  ўтган 7 ойи давомида 49567 нафар туғиш ёшидаги аёллар тиббий текширувлардан ўтказилди ва ҳомиладорликка монелиги аниқланган аёллар даволаниб, соғломлаштирилди.

Ўзбекистон Республикаси Вазирлар Маҳкамасининг 2010 йил 22 июлдаги 156-сонли "Республиканинг қишлоқ туманларида оналар ва болаларнинг репродуктив саломатлигини мустаҳкамлашга доир қўшимча чора-тадбирлар тўғрисида”ги қарорига мувофиқ, 2011 йилнинг апрель ойидан бошлаб ҳомиладор аёлларга поливитамин комплекси  бепул берилмоқда, унинг аҳамияти кенг тушунтирилмоқда. Натижада жорий йилимизнинг ўтган 7 ойи давомида туққан 2017 нафар аёлларимиз ушбу жараённи меъёрида ўтказдилар.

Оналар ва болалар саломатлигига эришишда никоҳгача тиббий кўрикнинг  жорий этилгани ҳам мустаҳкам асос бўлиб хизмат қилмоқда.

Давлатимиз, Президентимиз томонидан қабул қилинаётган янги ижтимоий дастурлар ва қарорларда аёллар ва болалар соғлигини сақлашга қаратилган вазифалар устувор эканлиги билан аҳамиятлидир. Буларнинг замирида фарзандларнинг соғлом дунёга келиши ва соғлом ўсиб-улғайиб, камолга етишидек эзгу ниятлар мужассамдир. Чунки  соғлом авлодгина юрт келажагини яратишга қодир бўлади.

Муҳаббат ЮСУПОВА, 

туман тиббиёт бирлашмасининг бош акушер-гинекологи.