32 МИНГ 840 ТОННАЛИК “ОҚ ОЛТИН” ХИРМОНИ ТАЙЁР!
Меҳнатда тобланган, ер билан тиллашиб, ишнинг кўзини биладиган фидойи ва миришкор пахтакорларимиз бу йил ҳам анъанага содиқ қолган ҳолда Республикамизда биринчи бўлиб давлатга пахта сотиш бўйича шартномавий режасини ортиғи билан бажардилар. 2016 йил 27 сентябрь куни, 17 иш кунида давлат хазинасига топширилган Амударё "оқ олтин”и 32 минг 840 тоннадан ошиб кетди.
Айтиш керакки, Ўзбекистон Республикасининг Биринчи Президенти Ислом Каримов раҳбарлигида аграр соҳада амалга оширилган ислоҳотлар, ҳукуматимиз ва Республика раҳбарияти томонидан соҳада янги тизимнинг жорий қилиниши, пахта етиштиришни янада такомиллаштириш борасида олиб борилаётган кенг кўламли ишлар ва деҳқонларимизнинг фидойи меҳнатлари пахтадан мўл ҳосил олишга замин яратди.
Ерларни экишга тайёрлаш, чигит экиш, далаларни бегона ўтлардан тозалаш ва яганалаш, ғўза қатор ораларига ишлов бериш, ғўза ниҳолларини озиқлантириш ва зараркунандалардан ҳимоя қилиш, чилпиш, дефолиация каби агротехник тадбирларнинг ўз вақтида ва сифатли ўтказилгани бугунги юксак хирмоннинг асоси бўлди.
Энг муҳими, йиғим-терим ишлари уюшқоқлик билан, янги тизим асосида ташкил қилинди. Бунда теримнинг отряд усулида олиб борилиши катта самара берди. Фермер хўжаликларининг ишчилари ва пудратчилари, муассаса, корхона ва ташкилотларнинг ишчи-хизматчилари, овул ва маҳаллалардаги уюшмаган аҳоли ва Нукус давлат педагогика институти талабаларидан иборат теримчилар заҳматли меҳнатлари билан юксак хирмон бунёд этдилар.
Теримчилар ва ҳашарчиларга ишлаш ва дам олиш учун барча зарур шароитлар яратилгани, терим пулларининг ўз вақтида берилиши, ҳосилнинг тўлиқ юқори навларга топширилиши пудратчи ва ҳашарчиларнинг моддий манфаатдорлигини, фермер хўжаликларининг иқтисодий қудратини янада юксалтирди. Жумладан, тижорат банклари томонидан шу кунгача жами 9 миллиард 359 миллион сўмдан ортиқ нақд пул маблағлари терим пули сифатида тарқатилди, фермер хўжаликларимизнинг пахтадан олган даромадлари 43 миллиард 773 миллион сўмдан ошиб кетди.
Туманимиз пахтакорлари далаларимиздаги мўл ҳосилнинг бир мисқолини ҳам нобуд қилмасдан, яна қўшимча 12 минг 500 тонна "оқ олтин” топшириб, мамлакатимизнинг улкан хирмонига ўзларининг муносиб ҳиссаларини қўшиш ниятида меҳнат қилмоқдалар.
Фурсатдан фойдаланиб, пахта етиштириш ва йиғиб-териб олишда фаол иштирок этган фидойиларни бугунги меҳнат зафари билан чин қалбимиздан муборакбод этамиз! Ҳалол меҳнатингизнинг роҳатини кўринг, азизлар!
Анвар ЮЛДАШЕВ,
туман Қишлоқ ва сув хўжалиги бўлими бошлиғи, Қорақалпоғистон Республикаси Жўқорғи Кенгеси депутати, Ўзбекистон Республикасида хизмат кўрсатган пахтакор.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
