САЙЛОВЧИЛАР ХУРСАНД БЎЛИШДИ

Мамлакатимизда Ўзбекистон Республикаси Президенти сайлови ўтказиладиган кун – 4 декабрь тонги барча жойдаги каби Амударё туманида ҳам зўр шодиёналар билан қарши олинди. Барча сайлов участкалари эрта тонгданоқ истиқболга интилган кишилар – эртанги тинчлигимизни, нурафшон ҳаётимизни таъминлашга қодир бўлган номзодни Президентликка сайлашни ният қилган сайловчилар билан гавжум бўлди.

Биз эрта тонгда Манғит шаҳрининг "Бойовул” маҳалласида жойлашган 80-сонли сайлов участкасига етиб келганимизда бу ерда сайлов жараёни қизғин тус олаётганининг гувоҳи бўлдик.

– Сайлов участкамизда 2400 дан зиёд сайловчи рўйхатга олинган, – деди участка сайлов комиссияси раиси Шуҳрат Жуманиёзов бизни комиссия фаолияти билан таништирар экан. – Шундан 79 нафари биринчи марта сайловда овоз берадиган ёшлар ҳисобланади. 28 нафар сайловчимизнинг бу ерга келиб, овоз бериш имкониятлари йўқ. Шу сабабдан ҳам биз уларга сайловда иштирок этишлари учун имконият яратиб бериш мақсадида, сайлов  қутилари билан уларнинг яшаш жойларига ташриф буюраяпмиз. Ўзларингиз гувоҳи бўлаётганинингдек, сайловчиларимиз бу сайловда фаол иштирок этаяптилар. Уларнинг кайфиятлари жуда яхши.

– Бу галги сайловнинг ўзгачалиги сайловчиларнинг ҳар қачонгидан ҳам оғизбирчилик билан фаол ҳаракат қилишаётганлигида яққол кўриниб  турибди, – дейди 82 ёшли онахон – сайловчи Валентина Кузнецова. – Мен ҳам сайловга эрта тонгда келиб, элдошларим қатори ўзим муносиб деб ҳисоблаган номзодга овоз бердим. Биз эртанги кунимизнинг, ёшларимиз келажагининг порлоқ бўлишини истаймиз.

– Биз бемор сайловчи Қизларгул Жуманиёзова яшаётган хонадонга ташриф буюрганимизда бу сайловчи аёлнинг қувончи ичига сиғмай кетди, – дейди участка сайлов комиссияси раиси ўринбосари Бозорбой Холимбетов. – Кейин у: "Мен бетоблигим сабабли бу  галги сайловда иштирок қила олмасам керак, деб умидсизликка тушгандим. Аммо участка сайлов  комиссияси ходимлари – Сиз сайлов қутисини  уйимга олиб келиб, менинг Ўзбекистон Республикаси Президентлигига номзод учун овоз беришимга шароит яратиб бердингиз. Мен бундан бениҳоя хурсанд бўлдим”, дея миннатдорчилик билдирди.

Сайлов жараёнида сайлов участкасида фаол сайловчиларни тақдирлаш маросимлари ҳам ўтказилди.

80-сонли участка сайлов комиссияси томонидан сайловда биринчи марта иштирок этаётган 3 нафар ёш сайловчига, 10 нафар фаол сайловчига  қимматбаҳо совғалар топиширилди. 10 нафар сайловчи аёл-қизларга туман ҳокимлиги томонидан тайёрланган гулдасталар ва 5 нафар ёш сайловчига бадиий китоблар совға қилинди.

Алламберган ЖУМАНИЁЗОВ,

"Тараққиёт кўзгуси” газетаси мухбири.

(Фото - ЎзА)