НОГИРОНЛАР УЧУН ТЕНГ ИМКОНИЯТЛАР ЯРАТИЛДИ
4 декабрь кунги бўлиб ўтган Ўзбекистон Республикаси Президенти сайловида ногиронларга, имконияти чекланган фуқароларга ҳам сайловда фаол иштирок этишлари учун тенг имкониятлар яратилди. Туманимиздаги мавжуд 58 та сайлов участкасининг барчасида ҳам ногиронлар – имконияти чекланган кишиларнинг ўз конституциявий ҳуқуқларидан фойдаланиб, муносиб деб билган номзодларига эмин-эркин овоз беришлари учун етарли шароитлар яратилди. Хусусан, ҳар бир участкада махсус овоз бериш кабинаси тайёрланди, ҳатто ногиронлик аравасида келувчилар учун махсус йўлаклар ҳозирланди, кўзи ожизлар Брайль алифбосидаги сайлов бюллетенларида овоз бердилар. "Дўстлик” маҳалласидан Б.Ўрозбоев, Қипчоқ овулидан М.Раҳимов, Дурунки маҳалласидан А.Ўрозимбетов каби ўнлаб кўзи ожиз фуқароларга Брайль алифбосидаги сайлов бюллетенлари жорий қилингани ўзлари энг муносиб деб билган номзодга овоз беришида жуда қўл келди.
Бу дунёда ҳамманинг ҳам ўйнаб-кулиб, бахтиёр яшагиси келади. Афсуски, орамизда баъзан бахтсиз ҳодисалар туфайли ногирон бўлиб қолган, баъзан туғма ногирон фуқаролар ҳам учрайди. Бироқ бизнинг жамиятимизда улар ҳам бошқа фуқаролар қатори ҳуқуқларга эга. Навоий номли маҳаллада истиқомат қилувчи Дармонжон Ибодуллаеванинг чеварлигига, одамшавандалигига очиғи, кўпчилик ҳавас қилади. Бироқ жисмоний имконияти чекланганлиги туфайли сайловда овоз бериш учун бора олмаслигини ўз ҳудудидаги участка сайлов комиссиясига бир неча кун олдин маълум қилиб қўйганлиги учун участка сайлов комиссияси аъзолари унинг уйига бориб, ўз хоҳиш-иродасини билдиришига имконият яратдилар.
Шунингдек, Бешгужум кўчаси, 48-уйда истиқомат қилувчи Муҳаббат Қодирова ҳам ўз яшаш жойида ўзи танлаган номзод учун овоз берди. "Фуқаролар сайлов ҳуқуқларининг кафолатлари тўғрисида”ги Ўзбекистон Республикаси Қонунининг 19-моддасига асосан уларга бундай имкониятлар яратилгани, 4 декабрь кунги бўлиб ўтган Ўзбекистон Республикаси Президенти сайловида Брайль алифбосидаги сайловга таклифнома ва сайлов бюллетени Мустақил Давлатлар ҳамдўстлиги мамлакатлари орасида илк бор Ўзбекистонда жорий этилгани давлатимиз сиёсатининг адолатпарвар ва инсонпарварлиги намунасидир.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
