МУРҒАК КЎНГИЛЛАРГА МУҲРЛАНГАН ЛАҲЗАЛАР
Илк бор мактаб остонасига қадам қўйган кунини, ўқитувчиси илк бор қўлига қалам тутқазиб, ёзишни, ўқишни ўргатган дамларини кўнглида ширин орзиқиш билан, соғинч билан эсламайдиган одам бўлмаса керак. Чунки ўша кун ҳар биримизнинг оиламиз оламидан чиқиб, умумга, тенгқурларимизга қўшилишиб, илм эгаллашимиз йўлида илк пиллапоя бўлган. Она тилимиз алифбосини тўла эгаллаш эса маърифат дунёсининг калитидир.
Шу боис, алифбони тўла ўзлаштириб, саводхон бўлиб олган болажонлар "Алифбе” китоби билан шоду хуррамликда хайрлашадилар, ҳарфларни ўргатгани учун китобга, устозига миннатдорлик билдирадилар.
22 декабрь куни 16-сонли мактаб мажлислар хонасида бўлиб ўтган 1”б” синф ўқувчиларининг "Саводхонлик байрами”да ҳам "Алифбе” китобини ўзлаштириб олган 26 нафар болажонларнинг қувончлари яққол акс этди. Устозларига ҳурмат-эҳтиромини, болаларнинг таълим-тарбия олишлари учун бугунгидай шароитларни яратиб берган давлатимизга миннатдорчилигини ифодаловчи шеърлар, қўшиқлар, рақсларни маҳорат билан ижро этиб, устозларини, ота-оналарини хушнуд этдилар.
Байрамона безатилган улкан хонага ўрнатилган арча атрофида Қорбобо ва Қорқиз болажонларни Алифбени ўзлаштириб олганликлари билан қутлаб, бирга ўйнаб-кулганлари айниқса завқли бўлди. Рамзий "Алифбе” китоби даврага кириб келди ва болажонларга ўзидаги мавжуд ҳарфларни яхши ўзлаштириб олганликлари учун раҳмат айтди, дўстона хайрлашиб, ўрнини она тили китобига беришини эълон қилди. Барча дарсликларни ҳам пухта ўзлаштириб боришларини тилади.
Яна навбат куй-қўшиқларга, рақсларга берилди.
– Мен бугунги ўтказилган тадбирдан жуда улкан таассуротлар олдим. Чунки саҳнада томоша намойиш этган 26 нафар боланинг мактабга қадам қўйганига кўп вақт бўлмади. Ҳар қайсиси бир оиланинг ардоғида ўсган 26 нафар болани дўстлаштириб, қисқа фурсатда саводини чиқариб, шунча нарсаларни ўргатиш синф ўқитувчиси Гўзал Ҳожиевага осон бўлмагани аниқ. Бунинг учун мактаб маъмуриятига, Гўзал Ҳожиевага раҳмат, – дейди синфнинг аълочи ўқувчиларидан Умиджон Соатбоевнинг онаси Раъно.
Тадбир болажонларнинг ҳам кўнглида бир умр муҳрланиб қолса ажаб эмас.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
