ЯНГИ ҚУРИЛИШЛАРДА ЁНҒИН ХАВФСИЗЛИГИ ТАЪМИНЛАНМОҚДА

Бирон бир бино ёки иншоот қурилиши, энг аввало, лойиҳадан бошланади. Қурилаётган иморатнинг қанчалар мустаҳкам, пишиқ, кўримли ва ҳар жиҳатдан фойдаланишга яроқлилик асоси лойиҳа ҳисобланади. Лойиҳада бино ёки иншоотнинг барча техник жиҳатлари қатори ёнғин хавфсизлиги талаблари ҳам эътиборга олинган бўлиши лозим.

Кейинги йилларда туман ҳудудида барпо этилган кўпгина бино ва иншоотларда ана шу талаблар эътиборга олинганлиги кўзга ташланади. Бугунги кунда туманимизда улкан қурилиш-ободонлаштириш ишлари амалга оширилиб, кўҳна шаҳримиз янада гўзал ва тароватли бўлиб бормоқда.

Албатта, шундай улкан меҳнат маҳсулларини ёнғиндан муҳофаза қилиш нафақат соҳа ходимлари, балки айни пайтда ҳар бир кишининг вазифасидир.

Жойларда янги қурилаётган, қайта реконструкция қилинаётган ва капитал таъмирланаётган масканларнинг лойиҳа ҳужжатларига киритилган ёнғинларнинг олдини олишга қаратилган тадбирларнинг қурилиш-таъмирлаш ишлари жараёнида бажарилишини назорат қилиш, содир бўлиши мумкин бўлган ёнғинлар туфайли юз берадиган бахтсиз ҳодисаларнинг олдини олиш, газ ва иситиш мосламаларидан хавфсиз фойдаланишни тартибга солиш мақсадида Ўзбекистон Республикаси Вазирлар Маҳкамасининг махсус қарорига асосан 2016 йил 10 ноябрдан 2017 йил 10 январгача ёнғин хавфсизлиги кунлари ўтказилди. Ушбу тадбир давомида тумандаги аҳоли пунктларини замонавий шаҳарсозлик талаблари ва меъёрларига ҳамда миллий анъаналарга мувофиқ комплекс ривожлантиришга эътиборни қаратиш, тарихий-маданий обидаларни сақлаш, қурилиш масканлари учун ер танлаш ва ишлаб чиқилаётган лойиҳалар сифатини ошириш устидан назоратни кучайтиришга алоҳида эътибор қаратилди.

Туман ИИБ ЁХБ ходимлари томонидан шундай самарали ишлар олиб борилишига қарамасдан, 2016 йил 23 ноябрь куни Нукус кўчаси, 10-уйда яшовчи Қурбаниязов Бахтиёрга тегишли уйнинг ошхонасида ўрнатилган иситиш печь мўрисининг носозлиги оқибатида ёнғин содир бўлиб, бостирмаси ва уйдаги буюм, жиҳозлари ёниб зарарланган. Туман ИИБ ЁХБ жамоаси томонидан олиб борилган тезкор тадбир туфайли хонадоннинг асосий қисми ёнғин хавфидан сақлаб қолинди. Юртдошларимиздан доимо огоҳ ва ҳушёр бўлиб, ёнғинларнинг олдини олишга ҳисса қўшишларини сўраб қоламиз.

Рахат ХУДОЙБЕРГАНОВ, туман ИИБ ЁХБ инспектори, сержант.

Руслан Ҳамроев,

Ёнғин хавфсизлиги хизмати ходими, сержант.

(Фото - http://vtshpb.uz)