YaNGI QURILIShLARDA YoNGʻIN XAVFSIZLIGI TAʼMINLANMOQDA

Biron bir bino yoki inshoot qurilishi, eng avvalo, loyihadan boshlanadi. Qurilayotgan imoratning qanchalar mustahkam, pishiq, koʻrimli va har jihatdan foydalanishga yaroqlilik asosi loyiha hisoblanadi. Loyihada bino yoki inshootning barcha texnik jihatlari qatori yongʻin xavfsizligi talablari ham eʼtiborga olingan boʻlishi lozim.

Keyingi yillarda tuman hududida barpo etilgan koʻpgina bino va inshootlarda ana shu talablar eʼtiborga olinganligi koʻzga tashlanadi. Bugungi kunda tumanimizda ulkan qurilish-obodonlashtirish ishlari amalga oshirilib, koʻhna shahrimiz yanada goʻzal va tarovatli boʻlib bormoqda.

Albatta, shunday ulkan mehnat mahsullarini yongʻindan muhofaza qilish nafaqat soha xodimlari, balki ayni paytda har bir kishining vazifasidir.

Joylarda yangi qurilayotgan, qayta rekonstruktsiya qilinayotgan va kapital taʼmirlanayotgan maskanlarning loyiha hujjatlariga kiritilgan yongʻinlarning oldini olishga qaratilgan tadbirlarning qurilish-taʼmirlash ishlari jarayonida bajarilishini nazorat qilish, sodir boʻlishi mumkin boʻlgan yongʻinlar tufayli yuz beradigan baxtsiz hodisalarning oldini olish, gaz va isitish moslamalaridan xavfsiz foydalanishni tartibga solish maqsadida Oʻzbekiston Respublikasi Vazirlar Mahkamasining maxsus qaroriga asosan 2016-yil 10-noyabrdan 2017-yil 10-yanvargacha yongʻin xavfsizligi kunlari oʻtkazildi. Ushbu tadbir davomida tumandagi aholi punktlarini zamonaviy shaharsozlik talablari va meʼyorlariga hamda milliy anʼanalarga muvofiq kompleks rivojlantirishga eʼtiborni qaratish, tarixiy-madaniy obidalarni saqlash, qurilish maskanlari uchun yer tanlash va ishlab chiqilayotgan loyihalar sifatini oshirish ustidan nazoratni kuchaytirishga alohida eʼtibor qaratildi.

Tuman IIB YoXB xodimlari tomonidan shunday samarali ishlar olib borilishiga qaramasdan, 2016 yil 23-noyabr kuni Nukus koʻchasi, 10-uyda yashovchi Qurbaniyazov Baxtiyorga tegishli uyning oshxonasida oʻrnatilgan isitish pech moʻrisining nosozligi oqibatida yongʻin sodir boʻlib, bostirmasi va uydagi buyum, jihozlari yonib zararlangan. Tuman IIB YoXB jamoasi tomonidan olib borilgan tezkor tadbir tufayli xonadonning asosiy qismi yongʻin xavfidan saqlab qolindi. Yurtdoshlarimizdan doimo ogoh va hushyor boʻlib, yongʻinlarning oldini olishga hissa qoʻshishlarini soʻrab qolamiz.

Raxat XUDOYBERGANOV, tuman IIB YoXB inspektori, serjant.

Ruslan Hamroyev,

Yongʻin xavfsizligi xizmati xodimi, serjant.

(Foto - http://vtshpb.uz)