БУГУНГИ ЎҚУВЧИ – ЭРТАГА АСКАР
Биз 14 январь – Ватан ҳимоячилари куни муносабати билан туман мудофаа ишлари бўлимининг чақирилувчиларни ҳарбий хизматга тайёрлаш бўлинмаси бошлиғи Зокиржон Саъдуллаев билан учрашиб, чақирилувчи ёшларни ҳарбий хизматга тайёрлаш бўйича суҳбатлашдик.
– Ёшларни ҳарбий хизматга тайёрлаш ва таълим муассасалари ўқувчиларини ҳарбий ватанпарварлик руҳида тарбиялаш бўйича амалга оширилаётган ишлар ҳақида гапириб берсангиз?
– Ўқувчиларни ҳарбий хизматга тайёрлашда чақириққа қадар тайёрлаш муҳим аҳамият касб этади. Бу борада ўзига хос имтиҳон ҳисобланган "Шунқорлар” ва "Ёш чегарачилар” ҳарбий-спорт ўйинлари кўрик-танловларига ҳамма касб-ҳунар коллежлари жиддий тайёргарлик кўраётир ва бу муҳим тадбирларда фаол қатнашаётир, деб бўлмайди. Бу борада ўзларининг бор кучини кўрсатишга интилиб, жон-жаҳди билан уринаётган бир неча таълим муассасалари бор, холос. Шулардан, "Дўрман” қишлоқ хўжалик касб-ҳунар коллежи, Амударё маиший хизмат кўрсатиш касб-ҳунар коллежи ва Амударё академик лицейи ўқитувчилари ва ўқувчилари мазкур танловларда фаол қатнашиб, ўз билимлари, кўникмалари ва маҳоратларини тўла намойиш қилишга ҳаракат қилмоқдалар ҳамда совринли ўринларни эгалламоқдалар. Бошқа таълим муассасалари ҳам уларга эргашиб, улардан ибрат олиб, тажрибаларини ўрганган ҳолда етакчилар сафидан ўрин олишлари лозим. Яна бу борадаги таълим жараёнларида ва амалий машғулотларда мудофаага кўмаклашувчи "Ватанпарвар” ташкилотининг бирон марта ҳам бўй кўрсатмаётганлигини қандай баҳолаш мумкин?
– Маълумки, миллий армиямизга билимли, малакали етук ҳарбий офицер кадрлар сув ва ҳаводек зарур. Улар миллий армиямизнинг куч-қудратидир. Бизнинг туманимизда офицер кадрларни тайёрлашга чақирилувчи ёшларни йўналтириш қандай бормоқда?
– Бу борадаги ишларимиздан тўла қаноат ҳосил қилишимиз ва бундан ҳатто фахрланишимиз мумкин. Бунда албатта катта орзулар ва аниқ мақсадларни кўзлаб мамлакатимиздаги қатор олий ҳарбий билим юртларида таҳсил олаётган билимга чанқоқ, ғайрат-шижоатли, қалби юрт ишқи билан ёниб ураётган бир неча курсантларимизнинг номларини ифтихор билан тилга оламиз. Булар жумласига "Босув” маҳалласидан Исломбек Каримовнинг Самарқанд олий ҳарбий автомобиль қўмондонлик-муҳандислик билим юртида, "Холимбег” овулидан Миржалол Оқмоновнинг Чирчиқ олий ҳарбий танк қўмондонлик-муҳандислик билим юртида ва куюккўпирлик Низомжон Ўрозбоевнинг ҳам худди мана шу олий ҳарбий даргоҳда, "Бобур” овулидан Оймурод Бозорбоевнинг Тошкент олий ҳарбий қўмондонлик билим юртида, Манғит шаҳридан Сирожиддин Қозоқбоевнинг Тошкент ахборот технологиялари университетининг махсус факультетида, "Ўрта қалъа” овулидан Элдор Камоловнинг Тошкент тиббиёт Академиясининг ҳарбий тиббиёт факультетида қунт билан таҳсил олиб, ҳарбий билимларни пухта ўзлаштираётганлиги ва ҳарбий дала тактик машғулотларида фаол қатнашиб, зарур кўникма ҳамда малака ошираётганлиги уларнинг эртага энг муносиб ҳарбий офицер кадр бўлиб етишишларидан дарак беради. Уларнинг кўпчилиги жорий 2017 йил ёзида ўзлари билим олаётган олий ҳарбий билим юртларини муваффақиятли тамомлаб, Қуролли кучларимиз сафида ўз бурчларини бажаришга киришадилар.
Биз уларга омад, бахт-саодат ва келгуси ишларида муваффақиятлар тилаб қоламиз.
Суҳбатдош Қобул ШОМУРОДОВ.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
