BUGUNGI OʻQUVChI – ERTAGA ASKAR
Biz 14-yanvar – Vatan himoyachilari kuni munosabati bilan tuman mudofaa ishlari boʻlimining chaqiriluvchilarni harbiy xizmatga tayyorlash boʻlinmasi boshligʻi Zokirjon Saʼdullayev bilan uchrashib, chaqiriluvchi yoshlarni harbiy xizmatga tayyorlash boʻyicha suhbatlashdik.
– Yoshlarni harbiy xizmatga tayyorlash va taʼlim muassasalari oʻquvchilarini harbiy vatanparvarlik ruhida tarbiyalash boʻyicha amalga oshirilayotgan ishlar haqida gapirib bersangiz?
– Oʻquvchilarni harbiy xizmatga tayyorlashda chaqiriqqa qadar tayyorlash muhim ahamiyat kasb etadi. Bu borada oʻziga xos imtihon hisoblangan "Shunqorlar” va "Yosh chegarachilar” harbiy-sport oʻyinlari koʻrik-tanlovlariga hamma kasb-hunar kollejlari jiddiy tayyorgarlik koʻrayotir va bu muhim tadbirlarda faol qatnashayotir, deb boʻlmaydi. Bu borada oʻzlarining bor kuchini koʻrsatishga intilib, jon-jahdi bilan urinayotgan bir necha taʼlim muassasalari bor, xolos. Shulardan, "Doʻrman” qishloq xoʻjalik kasb-hunar kolleji, Amudaryo maishiy xizmat koʻrsatish kasb-hunar kolleji va Amudaryo akademik litseyi oʻqituvchilari va oʻquvchilari mazkur tanlovlarda faol qatnashib, oʻz bilimlari, koʻnikmalari va mahoratlarini toʻla namoyish qilishga harakat qilmoqdalar hamda sovrinli oʻrinlarni egallamoqdalar. Boshqa taʼlim muassasalari ham ularga ergashib, ulardan ibrat olib, tajribalarini oʻrgangan holda yetakchilar safidan oʻrin olishlari lozim. Yana bu boradagi taʼlim jarayonlarida va amaliy mashgʻulotlarda mudofaaga koʻmaklashuvchi "Vatanparvar” tashkilotining biron marta ham boʻy koʻrsatmayotganligini qanday baholash mumkin?
– Maʼlumki, milliy armiyamizga bilimli, malakali yetuk harbiy ofitser kadrlar suv va havodek zarur. Ular milliy armiyamizning kuch-qudratidir. Bizning tumanimizda ofitser kadrlarni tayyorlashga chaqiriluvchi yoshlarni yoʻnaltirish qanday bormoqda?
– Bu boradagi ishlarimizdan toʻla qanoat hosil qilishimiz va bundan hatto faxrlanishimiz mumkin. Bunda albatta katta orzular va aniq maqsadlarni koʻzlab mamlakatimizdagi qator oliy harbiy bilim yurtlarida tahsil olayotgan bilimga chanqoq, gʻayrat-shijoatli, qalbi yurt ishqi bilan yonib urayotgan bir necha kursantlarimizning nomlarini iftixor bilan tilga olamiz. Bular jumlasiga "Bosuv” mahallasidan Islombek Karimovning Samarqand oliy harbiy avtomobil qoʻmondonlik-muhandislik bilim yurtida, "Xolimbeg” ovulidan Mirjalol Oqmonovning Chirchiq oliy harbiy tank qoʻmondonlik-muhandislik bilim yurtida va kuyukkoʻpirlik Nizomjon Oʻrozboyevning ham xuddi mana shu oliy harbiy dargohda, "Bobur” ovulidan Oymurod Bozorboyevning Toshkent oliy harbiy qoʻmondonlik bilim yurtida, Mangʻit shahridan Sirojiddin Qozoqboyevning Toshkent axborot texnologiyalari universitetining maxsus fakultetida, "Oʻrta qalʼa” ovulidan Eldor Kamolovning Toshkent tibbiyot Akademiyasining harbiy tibbiyot fakultetida qunt bilan tahsil olib, harbiy bilimlarni puxta oʻzlashtirayotganligi va harbiy dala taktik mashgʻulotlarida faol qatnashib, zarur koʻnikma hamda malaka oshirayotganligi ularning ertaga eng munosib harbiy ofitser kadr boʻlib yetishishlaridan darak beradi. Ularning koʻpchiligi joriy 2017-yil yozida oʻzlari bilim olayotgan oliy harbiy bilim yurtlarini muvaffaqiyatli tamomlab, Qurolli kuchlarimiz safida oʻz burchlarini bajarishga kirishadilar.
Biz ularga omad, baxt-saodat va kelgusi ishlarida muvaffaqiyatlar tilab qolamiz.
Suhbatdosh Qobul ShOMURODOV.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
