Аҳоли муаммолари ўрганилмоқда

Ўзбекистон Республикаси Конституцияси қабул қилинганлигининг 24 йиллигига бағишланган тантанали маросимда давлатимиз раҳбари Ш.Мирзиёев 2017 йилни "Халқ билан мулоқот ва инсон манфаатлари йили” деб эълон қилишни таклиф этар экан, йилнинг айнан шундай номланишидан кўзланган мақсад ва вазифаларга тўхталиб: «...давлат органларининг фуқаролар билан ўзаро муносабатлари юзасидан ёндашувни тубдан қайта кўриб чиқиш зарур. Бу борада аҳоли билан доимий мулоқот қилиш, уларни қийнаётган муаммоларни ҳал этишнинг янги механизмлари ва самарали усулларини жорий этишимиз даркор», дея таъкидлаган эдилар.

Халқ билан мулоқотдан кўзланган мақсад халқ ичига кириш, уларнинг муаммоларини тинглаш, манфаатларини ишончли ҳимоя қилишдир. Инсон манфаатларини таъминлаш учун эса аввало одамлар билан, халқ билан мулоқот қилиш, уларнинг дарду ташвишлари, орзу-ниятлари, ҳаётий муаммо ва эҳтиёжларини яхши билиш керак.

Шу муносабат билан Қорақалпоғистон Республикаси Вазирлар Кенгаши ва қатор жамоат ташкилотларининг қўшма қарорига асосан халқ билан мулоқот ва инсон манфаатларини таъминлаш борасидаги долзарб масалаларни ўрганиш тизими йўлга қўйилди.

Бу масалада туманимизда ҳам амалий ишлар бошлаб юборилди. Ўрганиш ишларини мувофиқлаштириб бориш мақсадида туман ҳокимлигида 9 кишидан иборат штаб ташкил этилди. Туман Хотин-қизлар қўмитаси, Касаба уюшмаси ташкилотларининг туман Кенгашлари, "Нуроний” жамғармаси, "Маҳалла” хайрия жамоат фонди туман бўлинмалари, "Камолот” ЁИҲ туман Кенгаши ходимлари оилалар билан мулоқотлар ташкил этган ҳолда уларнинг ижтимоий-иқтисодий аҳволи, турмуш даражаси, маҳаллалардаги ижтимоий-маънавий муҳитни ўрганмоқдалар.

Ўрнатилган тартибга мувофиқ мазкур ишчи гуруҳлар тумандаги 47 та овул ҳамда маҳаллалардаги 28 мингдан ортиқ хонадонларда бўлиб, муаммоли масалаларни ўрганиб чиқадилар. Шу кунгача ишчи гуруҳлар аъзолари туманимиздаги аксарият хонадонларда бўлиб, аҳоли билан мулоқот ўтказдилар. Аҳоли томонидан асосан табиий газ, электр энергияси, савдо ва маиший хизмат кўрсатишнинг ҳолати, савдо дўконларини банк терминаллари билан таъминлаш, қишлоқ жойларда янги иш ўринларини яратиш билан боғлиқ қатор масалалар кўтарилмоқда. Муаммоларнинг аксарияти тегишли муассаса ва ташкилотларни жалб қилган ҳолда туман миқёсида ҳал қилинмоқда. Зарур ҳолларда муаммоли масалаларни Республика ва мамлакат миқёсида ҳал қилиш чоралари кўрилади.

Қолаверса, ишчи гуруҳ аъзолари аҳоли билан суҳбатда уларнинг ҳуқуқий билимларини ошириш, қонунда кафолатланган ҳуқуқ ва бурчларини тушунтириш бўйича тарғибот ишларини ҳам олиб бормоқдалар.

Бу каби тадбирлар аҳолининг давлатга ва эртанги кунга ишончини янада оширмоқда. Сабаби, ҳар бир мурожаат орқасида инсон манфаати, унинг тақдири ётади. Давлат органлари халқнинг дарду ташвишларини тинглаб, муаммоларини ўз вақтида ҳал қилса, юртимиздаги тараққиёт, тинчлик ва фаровонлик янада бардавом бўлади.

Улуғбек АБДУРАҲМОНОВ,