Aholi muammolari oʻrganilmoqda

Oʻzbekiston Respublikasi Konstitutsiyasi qabul qilinganligining 24 yilligiga bagʻishlangan tantanali marosimda davlatimiz rahbari Sh.Mirziyoyev 2017-yilni "Xalq bilan muloqot va inson manfaatlari yili” deb eʼlon qilishni taklif etar ekan, yilning aynan shunday nomlanishidan koʻzlangan maqsad va vazifalarga toʻxtalib: «...davlat organlarining fuqarolar bilan oʻzaro munosabatlari yuzasidan yondashuvni tubdan qayta koʻrib chiqish zarur. Bu borada aholi bilan doimiy muloqot qilish, ularni qiynayotgan muammolarni hal etishning yangi mexanizmlari va samarali usullarini joriy etishimiz darkor», deya taʼkidlagan edilar.

Xalq bilan muloqotdan koʻzlangan maqsad xalq ichiga kirish, ularning muammolarini tinglash, manfaatlarini ishonchli himoya qilishdir. Inson manfaatlarini taʼminlash uchun esa avvalo odamlar bilan, xalq bilan muloqot qilish, ularning dardu tashvishlari, orzu-niyatlari, hayotiy muammo va ehtiyojlarini yaxshi bilish kerak.

Shu munosabat bilan Qoraqalpogʻiston Respublikasi Vazirlar Kengashi va qator jamoat tashkilotlarining qoʻshma qaroriga asosan xalq bilan muloqot va inson manfaatlarini taʼminlash borasidagi dolzarb masalalarni oʻrganish tizimi yoʻlga qoʻyildi.

Bu masalada tumanimizda ham amaliy ishlar boshlab yuborildi. Oʻrganish ishlarini muvofiqlashtirib borish maqsadida tuman hokimligida 9 kishidan iborat shtab tashkil etildi. Tuman Xotin-qizlar qoʻmitasi, Kasaba uyushmasi tashkilotlarining tuman Kengashlari, "Nuroniy” jamgʻarmasi, "Mahalla” xayriya jamoat fondi tuman boʻlinmalari, "Kamolot” YoIH tuman Kengashi xodimlari oilalar bilan muloqotlar tashkil etgan holda ularning ijtimoiy-iqtisodiy ahvoli, turmush darajasi, mahallalardagi ijtimoiy-maʼnaviy muhitni oʻrganmoqdalar.

Oʻrnatilgan tartibga muvofiq mazkur ishchi guruhlar tumandagi 47 ta ovul hamda mahallalardagi 28 mingdan ortiq xonadonlarda boʻlib, muammoli masalalarni oʻrganib chiqadilar. Shu kungacha ishchi guruhlar aʼzolari tumanimizdagi aksariyat xonadonlarda boʻlib, aholi bilan muloqot oʻtkazdilar. Aholi tomonidan asosan tabiiy gaz, elektr energiyasi, savdo va maishiy xizmat koʻrsatishning holati, savdo doʻkonlarini bank terminallari bilan taʼminlash, qishloq joylarda yangi ish oʻrinlarini yaratish bilan bogʻliq qator masalalar koʻtarilmoqda. Muammolarning aksariyati tegishli muassasa va tashkilotlarni jalb qilgan holda tuman miqyosida hal qilinmoqda. Zarur hollarda muammoli masalalarni Respublika va mamlakat miqyosida hal qilish choralari koʻriladi.

Qolaversa, ishchi guruh aʼzolari aholi bilan suhbatda ularning huquqiy bilimlarini oshirish, qonunda kafolatlangan huquq va burchlarini tushuntirish boʻyicha targʻibot ishlarini ham olib bormoqdalar.

Bu kabi tadbirlar aholining davlatga va ertangi kunga ishonchini yanada oshirmoqda. Sababi, har bir murojaat orqasida inson manfaati, uning taqdiri yotadi. Davlat organlari xalqning dardu tashvishlarini tinglab, muammolarini oʻz vaqtida hal qilsa, yurtimizdagi taraqqiyot, tinchlik va farovonlik yanada bardavom boʻladi.

Ulugʻbek ABDURAHMONOV,