АСЛ МИЛЛИЙ БАЙРАМ ТАДОРИГИ
Наврўз! Асрлар оша бизгача етиб келган, ўзида асл миллий қадриятларимизни, урф-одатларимизни ифода этувчи мўътабар байрам! У мустақиллик йилларида айниқса қадр топмоқда, йилдан-йилга ўзига хос маъно ва мазмун билан бойимоқда.
Қадим аждодларимиз Наврўзни тенгкунлик, яшариш байрами, табиатнинг уйғониши билан боғлиқ янги куннинг бошланиши, дея ҳисоблашган.
Наврўз билан боғлиқ бир қанча удумларимиз борки, уларнинг жозибаси йиллар ўтгани сайин тобора яққол намоён бўлмоқда. Қўни-қўшнилар жамул-жам бўлиб, сумалак қайнатиш, қозон-ўчоқ бошида халқ оғзаки ижоди намуналаридан ижро этиш урф бўлган.
Қадим анъаналаримизга содиқ қолган бугунги авлод вакиллари ҳам бебаҳо маънавий меросимиз – умрбоқий қўшиқ-куйларни юксак қадрлаб келмоқда.
"2017 йилги Наврўз умумхалқ байрамига тайёргарлик кўриш ва уни ўтказиш тўғрисида”ги Ўзбекистон Республикаси Президентининг Қарорига мувофиқ бутун мамлакатимизда бўлгани каби туманимизда ҳам яқинлашиб келаётган Наврўз айёмини муносиб нишонлаш учун қизғин тайёргарлик кўрилмоқда.
Ренат Сафарбоев бадиий раҳбарлик қилаётган "Офарин” фольклор-этнографик жамоаси ҳам мазкур байрам сайилларида намойиш қилиш учун махсус композиция тайёрламоқда. Композиция "Наврўз сайли” деб номланади ва унда жамоа энг аввало ҳашар билан чор-атрофни ободонлаштириш, кейин буғдой ундириб сумалак пишириш, арқон тортиш, йигит-қизларнинг лапар айтишуви, шунингдек, гул базми, чўгирма ўйини каби халқ қўшиқ, рақсларини ижро этади. Бунда жамоа аъзоларининг 2005 йилдан бери мамлакатимиз миқёсида фольклор жамоалари орасида ўтказиб келинаётган турли маданий-маърифий кўрик-танловларда қатнашиб, ғолиб бўлиб, қолаверса, кўпгина фольклор жамоалар ижодини кузатиб келаётгани жуда қўл келмоқда. Қолаверса, "Офарин” фольклор-этнографик жамоаси мусиқа раҳбари Сарвар Худойберганов, балетмейстер Хайрулла Ҳабибуллаев ва барча аъзоларининг ҳудудимизга хос миллий ўйинлар, маросим қўшиқларини ва бошқада халқ оғзаки ижоди намуналарини излаб топиб, ўрганиб, ўзига хос тарзда халқимиз эътиборига ҳавола этишга ҳаракат қилмоқда.
Бу саъй-ҳаракатлари натижасида уларнинг Наврўз байрами учун махсус тайёрлаётган "Наврўз сайли” деб номланган композицияси юртдошларимизга манзур бўлади, деган умиддамиз.
Ойгул РАЖАБОВА.
(Фото: ЎзА)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
