ASL MILLIY BAYRAM TADORIGI

Navroʻz! Asrlar osha bizgacha yetib kelgan, oʻzida asl milliy qadriyatlarimizni, urf-odatlarimizni ifoda etuvchi moʻʼtabar bayram! U mustaqillik yillarida ayniqsa qadr topmoqda, yildan-yilga oʻziga xos maʼno va mazmun bilan boyimoqda.

Qadim ajdodlarimiz Navroʻzni tengkunlik, yasharish bayrami, tabiatning uygʻonishi bilan bogʻliq yangi kunning boshlanishi, deya hisoblashgan.

Navroʻz bilan bogʻliq bir qancha udumlarimiz borki, ularning jozibasi yillar oʻtgani sayin tobora yaqqol namoyon boʻlmoqda. Qoʻni-qoʻshnilar jamul-jam boʻlib, sumalak qaynatish, qozon-oʻchoq boshida xalq ogʻzaki ijodi namunalaridan ijro etish urf boʻlgan.

Qadim anʼanalarimizga sodiq qolgan bugungi avlod vakillari ham bebaho maʼnaviy merosimiz – umrboqiy qoʻshiq-kuylarni yuksak qadrlab kelmoqda.

"2017 yilgi Navroʻz umumxalq bayramiga tayyorgarlik koʻrish va uni oʻtkazish toʻgʻrisida”gi Oʻzbekiston Respublikasi Prezidentining Qaroriga muvofiq butun mamlakatimizda boʻlgani kabi tumanimizda ham yaqinlashib kelayotgan Navroʻz ayyomini munosib nishonlash uchun qizgʻin tayyorgarlik koʻrilmoqda.

Renat Safarboyev badiiy rahbarlik qilayotgan "Ofarin” folklor-etnografik jamoasi ham mazkur bayram sayillarida namoyish qilish uchun maxsus kompozitsiya tayyorlamoqda. Kompozitsiya "Navroʻz sayli” deb nomlanadi va unda jamoa eng avvalo hashar bilan chor-atrofni obodonlashtirish, keyin bugʻdoy undirib sumalak pishirish, arqon tortish, yigit-qizlarning lapar aytishuvi, shuningdek, gul bazmi, choʻgirma oʻyini kabi xalq qoʻshiq, raqslarini ijro etadi. Bunda jamoa aʼzolarining 2005-yildan beri mamlakatimiz miqyosida folklor jamoalari orasida oʻtkazib kelinayotgan turli madaniy-maʼrifiy koʻrik-tanlovlarda qatnashib, gʻolib boʻlib, qolaversa, koʻpgina folklor jamoalar ijodini kuzatib kelayotgani juda qoʻl kelmoqda. Qolaversa, "Ofarin” folklor-etnografik jamoasi musiqa rahbari Sarvar Xudoyberganov, baletmeyster Xayrulla Habibullayev va barcha aʼzolarining hududimizga xos milliy oʻyinlar, marosim qoʻshiqlarini va boshqada xalq ogʻzaki ijodi namunalarini izlab topib, oʻrganib, oʻziga xos tarzda xalqimiz eʼtiboriga havola etishga harakat qilmoqda.

Bu saʼy-harakatlari natijasida ularning Navroʻz bayrami uchun maxsus tayyorlayotgan "Navroʻz sayli” deb nomlangan kompozitsiyasi yurtdoshlarimizga manzur boʻladi, degan umiddamiz.

Oygul RAJABOVA.

(Foto: OʻzA)