“Ота-оналар университети” аъзолари учун ўқув семинари

24 апрель куни "Маҳалла” хайрия жамоат фонди туман бўлинмаси томонидан Фуқаролар йиғини ҳузуридаги "Ота-оналар университети” раҳбарлари, аъзолари, маҳалла фаоллари учун  ушбу тузилманинг фаолияти самарадорлигини ошириш мақсадида ўқув семинари ўтказилди.

Мамлакатимизда  оилалар фаровонлигини таъминлаш, оила муаммоларини ўрганиш, унинг маънавий ва иқтисодий асосларини мустаҳкамлаш, соғлом ва баркамол авлодни вояга етказиш, оналик ва болаликни ҳимоя қилиш бўйича кенг кўламли ишлар амалга оширилмоқда,мазкур муҳим масалага жамоатчиликнинг эътибори ва имкониятини сафарбар этиш масаласига алоҳида эътибор қаратилмоқда.

Айниқса, мустаҳкам ва бахтли оила қуришга йигит-қизларни ёшликдан тайёрлаш, оила муҳитида ҳамда таълимнинг барча босқичларида бу ишларни изчил амалга ошириш мамлакатимизда бу борада олиб борилаётган сиёсатнинг нақадар истиқболга қаратилганлигини кўрсатади.

Шунингдек, мустаҳкам оилани шакллантириш, оилаларда маънавий муҳит барқарорлигини таъминлашда ота-оналар орасида ҳам тушунтириш ва тарғибот ишларини амалга ошириш, ота-оналарнинг оилани ақл билан бошқариш ҳамда фарзанд тарбияси борасида мунтазам билимларини ошириб бориш долзарб масала ҳисобланади.

Фуқаролар йиғини ҳузуридаги "Ота-оналар университети” маҳалла ҳудудидаги оилаларнинг ёш авлодни тарбиялаш бўйича ҳуқуқий, маънавий-ахлоқий, психологик-педагогик ва физиологик билимларини оширишга кўмаклашувчи жамоатчилик тузилмаси ҳисобланади.  Жорий йилнинг ўтган даврида мазкур тузилма томонидан муайян ишлар амалга оширилди. Жумладан,  ота-оналарнинг фарзанд тарбияси борасидаги ҳуқуқий билимларини ошириш бўйича 38 марта,  маънавий-ахлоқий билимларини ошириш бўйича 31 марта,  психологик-педагогик ва физиологик билимларини ошириш бўйича 24 марта машғулотлар олиб борилди.

Ўқув семинари оилаларни мустаҳкамлаш, фарзанд тарбияси илмини эгаллашда ота-оналарда фарзанд тарбиясига масъуллик ва жавобгарлик ҳиссини кучайтириш, ёш авлодни тарбиялаш бўйича ҳуқуқий, маънавий-ахлоқий ва физиологик билимларини ошириш, тузилма раҳбари ва аъзолари масъулиятини кучайтириш, бу борада илғор тажрибаларни оммалаштириш мақсадида ташкил қилинди.

Мазкур семинарда «Ота-оналар университети» раҳбарлари ва маҳалла маслаҳатчилари, "Қайноналар кенгаши” раҳбарлари иштирок этдилар. Унда жамоатчилик тузилмасининг маҳаллада ижтимоий-маънавий муҳит барқарорлигини таъминлашдаги аҳамияти, унинг имкониятларидан самарали фойдаланишда ижтимоий ҳамкорлик масалалари, ота-оналарнинг фарзанд тарбияси борасидаги билимдонлиги – оилада маънавий муҳит барқарорлиги таъминлаш ва оилаларни мустаҳкамлашнинг муҳим омили эканлиги каби мавзулар бўйича кенг тушунтиришлар берилди.

Бундан ташқари, дунёнинг айрим минтақаларида турли қарама-қаршиликлар ва можароларнинг кучайиб бораётганлиги, барқарорлик ва хавфсизликка таҳдид солаётган турли ёт ва бузғунчи ғояларнинг мақсади, жамиятимиз ҳаётига турли йўллар билан сингдиришга қаратилган уринишларнинг мазмун-моҳияти ҳамда маҳаллаларда аҳолига, биринчи навбатда, ёшларнинг маънавий оламини юксалтириш, уларни она Ватанга юксак муҳаббат, миллий ва умуминсоний қадриятлар руҳида тарбиялаш, қалби ва онгида мафкуравий иммунитетни янада кучайтириш борасида университет аъзолари олдида турган долзарб вазифаларга атрофлича тўхталиб ўтилди.

(Фото - terdu.uz)