ВАТАНИМИЗ ОСОЙИШТАЛИГИ ЙЎЛИДАГИ ХИЗМАТЛАР УНУТИЛМАЙДИ

Туманимизнинг Амир Темур номли овулида туғилиб, вояга етган, ўрта махсус маълумот олиб, туман ички ишлар бўлимида намунали хизмат қилиб юрган оиланинг ёлғиз чароғбони Ортиқбой Якубовнинг ҳам ҳали ушалмаган орзулари бисёр эди. Ёлғиз ўғил бўлса-да, ота-онасини ардоқлаб, ҳаётларидан мамнун этишни истарди, фарзандларини бор меҳрини бериб, ҳалол инсонлар қилиб вояга етказмоқчи, умр ҳамдами Гулора билан уларнинг камолидан қувониб яшамоқчи эди.

Афсус, унинг оиласига меҳри чексиз бўлса-да, бу бахтиёр ошёндаги вақти, хизматчилик-да, жуда кам бўларди. Йўлига кўз тикиб бедор ўтирган ота-онасига эшикдан кириб салом бериб, "қандай жазоингиз бўлса, тайёрман”, – дерди ҳазил билан қўлини чаккасига  тираб.

– У кишига нега уй юмушларига қарамайсан, ё нега бизни йўлингга илҳақ қилиб кеч қайтасан, деб қайнотам ҳам, қайнонам ҳам ҳеч танбеҳ бермаган. Эшикдан кириб келиши билан оиламиз учун гўё "олам гулистон” бўлиб кетарди, тинчлик, омонликми, дея сўрардик, холос, – дейди Ортиқбой аканинг турмуш ўртоғи Гулора опа. – Чунки мустақилликнинг илк йилларида халқ орасида бесаранжомлик келтириб чиқаришга уринган, моддий етишмовчиликларни рўкач қилиб, содда одамларни мустақилликка қарши қайрашга ҳаракат қилган ғаламислар, озгина етишмовчиликларга чидамай, бировнинг мол-мулкига кўз олайтирадиганлар ҳам бор эди-да.

Шу боисдан ҳам ўша вақтларда Ортиқбой Якубов сингари ички ишлар идоралари ходимлари вақт билан ҳисоблашмай ишлашига тўғри келган. Буни улар ўзларининг  инсонийлик бурчи, дея ҳисоблашган, ишдан чарчаб келиб, эндигина уйида бамайлихотир дастурхонга қўл узатган вақтида чақириб қолишса, зудлик билан яна хизмат либосини кийиб, ишга боришган.

... Ўша 1992 йилнинг 21 декабрида хизмат вазифасида уч кунгача қолиб кетган Ортиқбой Якубовнинг  уйига қайтганидан қувонган яқинларининг қувончи узоққа чўзилмади: рация орқали хабар олгач, у энди овқат  олиб келаётган хотинига "сизлар еб тураверинглар”, деганича хизмат машинасига ўтирди. Афсус... лагандаги сузилган насибаси сағир қолишини ўша пайтда ким билибди, дейсиз?

34 йилгина умр кўрган Ортиқбой Якубовдан ота-онасига, рафиқасига, фарзандлари Сулаймон, Гулмирза, Рўзимбой, Муборакларга (Ёрқиной отаси вафотидан сўнг дунёга келган) унинг қисқагина дийдори, чексиз меҳр-муҳаббати, ҳалол, фидойи меҳнати туфайли эришган шарафи, айрилиқ доғи мерос бўлиб қолди.

Уни нафақат яқинлари, балки Ватанимиз тинчлиги ва осойишталигини сақлашдек муқаддас бурчини бажариш йўлида жонини аямаган ўғлонини бутун халқимиз ҳеч қачон унутмайди. Ҳамон қутлуғ саналарда Ўзбекистон Республикаси Ички ишлар вазирлиги, Республика ва туман раҳбарияти унинг оила аъзоларини йўқлашади, марҳумнинг хотирасини ёд этиб, руҳини шод қилишади. Чунки Ватан азиз, Ватан осойишталиги йўлидаги жасоратлар ҳеч қачон унутилмайди.

От ўрнини той босиб, Ортиқбой Якубовнинг касбини ҳозир ўғли Сулаймон давом эттирмоқда. Қайнонаси ва қайнотасига ҳам ўғил, ҳам келин бўлиб хизмат қилиб, сўнгги йўлга кузатган Гулора опа фарзандларининг ҳаммасини касб-корли, оилали қилди, қўша-қўша неваралар суйиш бахтига муяссар бўлди, кемтик бўлган бахтини, айрилиқ дардини улар билан овуниб енгди, бир умр тинчлик ҳимоячисининг аёли бўлганлигидан фахрланиб яшаб келмоқда.

Юртимизда 9 май – Хотира ва қадрлаш куни кенг нишонланаётган қутлуғ кунда йигит ёшида бу ҳаётдан кетган, бугунгидай тинч ҳаётимиз учун курашган Ортиқбой Якубовни эслаб, хизматларини эътироф этишни инсонийлик бурчимиз деб билдик.

Ойгул РАЖАБОВА.

Суратда: О.Якубов.