БОЛАЖОН!

Тили ширин, асал, қанд,

Дили дилимга пайванд.

Эл ичра қаддим баланд,

Яшайман энг давлатманд –

Қалбда ардоғим менинг!

Эй, насли Соҳибқирон,

Сеники Ер-у Осмон.

Мустақиллик мангу шон –

Бошингда ЭРК соябон –

Суянган тоғим менинг!

Сен Ватаннинг эркаси

Ва миллатнинг эртаси.

Тинчликнинг харитасин

Тузгувчи фариштаси –

Алпдил сиёғим менинг!

Юртда олтин қоида –

Муқаддасдир Оила.

– Бер, – деб,  – Тангри таоло,

Ватанга соғлом Бола –

Мангу сўроғим менинг!

Тонгларда ажиб виқор,

Ҳар ҳовли, уйда виқор.

Йиллар ўтса-да такрор,

Бу юртдан кетмас баҳор –

Мевазор боғим менинг!

Боғбоним – Онажоним,

Ватан, деган туғёним.

Аллалари ирфоним –

Буюк Ўзбекистоним –

Ўчмас чироғим менинг!

Боболар ёққан чироқ,

Нур сочар! Қаранг, порлоқ!

Қадами дадил, чақмоқ –

Жалолиддин ё Широқ

Янглиғ урпоғим менинг!

Яйраб улғай, Болажон,

Амрингда ЮРТ – жонажон.

Барча миллат бир тан-жон,

«Болам!» – деб эврилган он –

Гуллар ҳар ёғим менинг!

Бир кун кучга тўласан,

Маррани кенг оласан.

Ё олим, фузало – сен

Балки подшоҳ бўласан –

Илми байроғим менинг!

Робия ЙЎЛДОШЕВА.

(Фото - ЎзА)