“Қалдирғоч” болалар оромгоҳида болажонлар ёзги таътилнинг ҳар бир кунини мазмунли ўтказишмоқда

Қиличбой замини Амударё туманининг табиати гўзал ва сўлим гўшаларидан бири. Айниқса, ўзининг мусаффо ҳавоси, серҳосил боғ-у чаманлари, йўл бўйларида саф тортган осмонўпар тераклари-ю ям-яшил арчазорлари билан кўнгилларни ром этувчи Дўрман қишлоғи манзаралари бу ҳудудда бир бора бўлган кишининг хотирасида абадий сақланиб қолади. Қўшни туманлардан, Хоразм вилояти ва Қорақалпоғистоннинг турли ҳудудларидан Дўрманга ташриф буюрган меҳмонлар бу мафтункор қишлоқни бекорга: “Амударё туманининг марвариди” деб аташмаган. Турли саналар муносабати билан ўтказиладиган туман миқёсидаги маънавий-маърифий тадбирлар бу гўзал ошёнга янада фусункорлик бағишлаши ҳам шундан!

Қишлоқ марказидаги 84-сонли умумтаълим мактаби биносида деярли ҳар йили ёз ойларида ташкил этиладиган ва Амударё туман Мактабгача ва мактаб таълими бўлими тасарруфидаги умумтаълим мактаблари ўқувчи-ёшларини ўз бағрига оладиган “Қалдирғоч” оромгоҳи эса қишлоқ тонгларига файз, кўнгилларга кўтаринки кайфият бағишлайди. Чунки оромгоҳда дам олаётган болаларнинг қувноқ кулгулари, улар иштирокидаги маданий-мусиқий дам олиш дастурлари, интеллектуал ўйинлар, спорт мусобақалари ўтаётган ҳар бир кунга ўзига хос маъно-мазмун олиб киради.

Айни пайтда пайтда “Қалдирғоч” болалар оромгоҳининг биринчи мавсумида туман Мактабгача ва мактаб таълими бўлими тасарруфидаги умумтаълим мактабларидан 7 ёшдан 14 ёшгача бўлган 100 нафар болалар ёзги таътилни мароқли ўтказишмоқда. Ёзги таътил даврида, 5та мавсумда 500 нафар болани ўз бағрига олиш ва уларни миллий-маънавий қадриятлар асосида тарбиялаш, муҳтарам Президентимиз ташаббуси билан бутун мамлакатимиз бўйлаб кенг қулоч ёйган “Долзарб 90 кун” лойиҳаси доирасида таълимий ва тарбиявий тадбирлар ташкил этиш орқали ўқувчи-ёшларнинг интеллектуал салоҳиятини юксалтиришга қаратилган режавий тадбирлар ишлаб чиқилиб, амалиётга жорий этилмоқда. Оромгоҳда болаларнинг ҳар бир кунни кўнгилли ўтказишлари учун барча шароитлар яратилган.

Хусусан, уларнинг интеллектуал салоҳиятларини ривожлантириш, иқтидор ва қобилиятларини юзага чиқариш, ақлан ва жисмонан етуклик сари қўйган ҳар бир қадамини рағбатлантириш мақсадида ташкил этилган турли йўналишлардаги тўгараклар фаолияти йўлга қўйилган бўлиб, бу тўгаракларда 12 нафар малакали педагоглар томонидан қизиқарли машғулотлар олиб борилади. Шунингдек, тарбияланувчиларнинг осойишталигини таъминлаш, саломатлигини муҳофаза қилиш мақсадида тиббий ходимлар, туман Ички ишлар бўлими ва Миллий гвардия ходимлари ҳам жалб қилинган.

Оромгоҳ тарбияланувчиларининг бўш вақтларини мазмунли ўтказишга қаратилган китобхонлик кечалари, таниқли шоир ва ёзувчилар билан учрашувлар болаларбоп китоб жамғармасига бой оромгоҳ кутубхонасида ўтказилади. Маънавий-маърифий мавзудаги учрашувлар ва давра суҳбатларида тарбияланувчилар фаол иштирок этишиб, албатта, тадбир меҳмонларига она Ватанни, мустақилликни, дўстлик ва тинчликни, миллатлараро тотувликни мадҳ этувчи шеърлар, қўшиқлар айтиб беришади.

“Баркамол авлод” болалар мактаби томонидан ташкил этилган бичиш-тикиш ва тўқиш тўгараги машғулотлари эса ушбу ҳунарга қизиқувчи қиз болаларни касб-ҳунарга йўналтириш, уларнинг бу борадаги қизиқишларини рағбатлантириш имконини бермоқда.

Шунингдек, оромгоҳда ўтказиладиган турли спорт мусобақалари, маданий дам олиш дастурлари, туман Маданият бўлими тасарруфидаги маданият марказлари санъаткорлари томонидан намойиш этиладиган кўнгилочар концерт дастурлари болаларнинг мароқли дам олишларини таъминламоқда.

Айниқса, она табиат бағрига сайр, туманнинг тарихий жойларига, “Чилпиқ” қалъа-қўрғонига, Амударё устига қурилган Дўстлик кўприги ҳамда Амударё тарихий-ўлкашунослик музейига уюштирилаётган саёҳатлар болалар қалбида она табиатга меҳр, Ватанга муҳаббат, миллий-маънавий қадриятларга чуқур ҳурмат ва эҳтиром туйғуларини мустаҳкамлашга хизмат қилаётгани янада қувонарли.

Шунингдек, оромгоҳда болаларининг сифатли озиқ-овқат маҳсулотлари билан таъминланаётгани, оромгоҳ пазандаларининг ўз ишига масъулият билан ёндашаётгани боис, тарбияланувчилар шинам ва ораста ошхонада таомланиб, озода, ҳавоси мўътадил оромхоналарда дам олиб, ҳар бир кунини мазмунли ўтказишмоқда.

РОБИЯ ЙЎЛДОШЕВА.