“Qaldirgʻoch” bolalar oromgohida bolajonlar yozgi taʼtilning har bir kunini mazmunli oʻtkazishmoqda

Qilichboy zamini Amudaryo tumanining tabiati goʻzal va soʻlim goʻshalaridan biri. Ayniqsa, oʻzining musaffo havosi, serhosil bogʻ-u chamanlari, yoʻl boʻylarida saf tortgan osmonoʻpar teraklari-yu yam-yashil archazorlari bilan koʻngillarni rom etuvchi Doʻrman qishlogʻi manzaralari bu hududda bir bora boʻlgan kishining xotirasida abadiy saqlanib qoladi. Qoʻshni tumanlardan, Xorazm viloyati va Qoraqalpogʻistonning turli hududlaridan Doʻrmanga tashrif buyurgan mehmonlar bu maftunkor qishloqni bekorga: “Amudaryo tumanining marvaridi” deb atashmagan. Turli sanalar munosabati bilan oʻtkaziladigan tuman miqyosidagi maʼnaviy-maʼrifiy tadbirlar bu goʻzal oshyonga yanada fusunkorlik bagʻishlashi ham shundan!

Qishloq markazidagi 84-sonli umumtaʼlim maktabi binosida deyarli har yili yoz oylarida tashkil etiladigan va Amudaryo tuman Maktabgacha va maktab taʼlimi boʻlimi tasarrufidagi umumtaʼlim maktablari oʻquvchi-yoshlarini oʻz bagʻriga oladigan “Qaldirgʻoch” oromgohi esa qishloq tonglariga fayz, koʻngillarga koʻtarinki kayfiyat bagʻishlaydi. Chunki oromgohda dam olayotgan bolalarning quvnoq kulgulari, ular ishtirokidagi madaniy-musiqiy dam olish dasturlari, intellektual oʻyinlar, sport musobaqalari oʻtayotgan har bir kunga oʻziga xos maʼno-mazmun olib kiradi.

Ayni paytda paytda “Qaldirgʻoch” bolalar oromgohining birinchi mavsumida tuman Maktabgacha va maktab taʼlimi boʻlimi tasarrufidagi umumtaʼlim maktablaridan 7 yoshdan 14 yoshgacha boʻlgan 100 nafar bolalar yozgi taʼtilni maroqli oʻtkazishmoqda. Yozgi taʼtil davrida, 5ta mavsumda 500 nafar bolani oʻz bagʻriga olish va ularni milliy-maʼnaviy qadriyatlar asosida tarbiyalash, muhtaram Prezidentimiz tashabbusi bilan butun mamlakatimiz boʻylab keng quloch yoygan “Dolzarb 90 kun” loyihasi doirasida taʼlimiy va tarbiyaviy tadbirlar tashkil etish orqali oʻquvchi-yoshlarning intellektual salohiyatini yuksaltirishga qaratilgan rejaviy tadbirlar ishlab chiqilib, amaliyotga joriy etilmoqda. Oromgohda bolalarning har bir kunni koʻngilli oʻtkazishlari uchun barcha sharoitlar yaratilgan.

Xususan, ularning intellektual salohiyatlarini rivojlantirish, iqtidor va qobiliyatlarini yuzaga chiqarish, aqlan va jismonan yetuklik sari qoʻygan har bir qadamini ragʻbatlantirish maqsadida tashkil etilgan turli yoʻnalishlardagi toʻgaraklar faoliyati yoʻlga qoʻyilgan boʻlib, bu toʻgaraklarda 12 nafar malakali pedagoglar tomonidan qiziqarli mashgʻulotlar olib boriladi. Shuningdek, tarbiyalanuvchilarning osoyishtaligini taʼminlash, salomatligini muhofaza qilish maqsadida tibbiy xodimlar, tuman Ichki ishlar boʻlimi va Milliy gvardiya xodimlari ham jalb qilingan.

Oromgoh tarbiyalanuvchilarining boʻsh vaqtlarini mazmunli oʻtkazishga qaratilgan kitobxonlik kechalari, taniqli shoir va yozuvchilar bilan uchrashuvlar bolalarbop kitob jamgʻarmasiga boy oromgoh kutubxonasida oʻtkaziladi. Maʼnaviy-maʼrifiy mavzudagi uchrashuvlar va davra suhbatlarida tarbiyalanuvchilar faol ishtirok etishib, albatta, tadbir mehmonlariga ona Vatanni, mustaqillikni, doʻstlik va tinchlikni, millatlararo totuvlikni madh etuvchi sheʼrlar, qoʻshiqlar aytib berishadi.

“Barkamol avlod” bolalar maktabi tomonidan tashkil etilgan bichish-tikish va toʻqish toʻgaragi mashgʻulotlari esa ushbu hunarga qiziquvchi qiz bolalarni kasb-hunarga yoʻnaltirish, ularning bu boradagi qiziqishlarini ragʻbatlantirish imkonini bermoqda.

Shuningdek, oromgohda oʻtkaziladigan turli sport musobaqalari, madaniy dam olish dasturlari, tuman Madaniyat boʻlimi tasarrufidagi madaniyat markazlari sanʼatkorlari tomonidan namoyish etiladigan koʻngilochar kontsert dasturlari bolalarning maroqli dam olishlarini taʼminlamoqda.

Ayniqsa, ona tabiat bagʻriga sayr, tumanning tarixiy joylariga, “Chilpiq” qalʼa-qoʻrgʻoniga, Amudaryo ustiga qurilgan Doʻstlik koʻprigi hamda Amudaryo tarixiy-oʻlkashunoslik muzeyiga uyushtirilayotgan sayohatlar bolalar qalbida ona tabiatga mehr, Vatanga muhabbat, milliy-maʼnaviy qadriyatlarga chuqur hurmat va ehtirom tuygʻularini mustahkamlashga xizmat qilayotgani yanada quvonarli.

Shuningdek, oromgohda bolalarining sifatli oziq-ovqat mahsulotlari bilan taʼminlanayotgani, oromgoh pazandalarining oʻz ishiga masʼuliyat bilan yondashayotgani bois, tarbiyalanuvchilar shinam va orasta oshxonada taomlanib, ozoda, havosi moʻʼtadil oromxonalarda dam olib, har bir kunini mazmunli oʻtkazishmoqda.

ROBIYa YOʻLDOShEVA.