СОҒЛОМ МУҲИТ – ЖАМИЯТ ТАРАҚҚИЁТИНИНГ АСОСИЙ ОМИЛИ

Маълум бир давлатнинг ривожланиши, тараққий этиши аввало шу мамлакат фуқароларининг ҳамжиҳатлиги ва аҳиллигига, жамиятдаги бирдамлик ва иноқликка кўп жиҳатдан боғлиқ. Шу сабабли истиқлолнинг илк йилларидан бошлаб жамиятда тинчлик ва тотувликни, турли миллат ва элат вакиллари ўртасида ўзаро меҳр-оқибат ва ҳамжиҳатликни, ҳар хил динга эътиқод қилувчилар ўртасида бағрикенглик ва ўзаро ҳурмат тамойилларини қарор топтириш йўлида кенг кўламли ишлар амалга оширилди. Шу сабабли ҳам, Яратганга беҳисоб шукурлар бўлсинки, юртимиз тинч, осмонимиз мусаффо, кун сайин турмушимиз фаровон бўлиб бормоқда.

Аммо, ҳар бир даврда бўлганидек, бугунги глобаллашув ва ахборот асрида ана шу тинчлигимиз ва фаровонлигимизга турли хил таҳдидлар пайдо бўлмоқдаки, уларга қарши курашиш бугун ўзини ватанпарварман, деган ҳар бир фуқаронинг бурчидир. Мен шу йилнинг 15 июнь куни Тошкент шаҳрида "Ижтимоий барқарорликни таъминлаш, муқаддас динимизнинг софлигини асраш – давр талаби” мавзусида ўтказилган анжуманда иштирок этиб, шу нарсага амин бўлдимки, бугунги кунда ижтимоий-маънавий муҳитни ва аҳоли турмуш шароитларини яхшилаш, ёшларни турли диний экстремистик оқимлар таъсиридан асраш масаласи барчамиз учун энг асосий масаладир.

Ушбу анжуманда иштирок этган муҳтарам Президентимиз таъкидлаганидек, "... ислом фақат нурли ҳаётга, илм-маърифатга, яхшиликка ундайди. Ҳеч қачон хунрезлик, қотиллик, зўравонликка чақирмайди. Ана шу ҳақиқатни тан олмасдан, сохта ғояларга алданиб, зарарли оқимларга кириш, террорчи бўлиш – бу Ўзбекистон халқига мутлақо тўғри келмайди”.

Муҳтарам Юртбошимиз ўз нутқида бизнинг зиммамизга масъулиятли вазифа қўйдилар. Аниқроғи, ўз бурчимизни фидойилик билан бажаришга чақирдилар. Чиндан ҳам, маҳалламизда, овулимизда бирор бола зарарли диний оқимга кириб қолган бўлса, уни нотўғри йўлдан қайтариш – аввало бизнинг вазифамиз. Уни тўғри йўлга солиш, ота-боболаримиз эътиқод қилган муқаддас ислом динимизнинг ҳеч қандай бузғунчиликка буюрмаслигини, аксинча, ислом тинчлик ва эзгулик дини эканини уқтириш – авваламбор дин пешвосининг, қолаверса, ҳар бир имонли одамнинг бурчидир. 

Инсоннинг қалби, мияси, онгу тафаккури ҳеч қачон ахборот олишдан, фикрлашдан, таъсирланишдан тўхтамайди. Шу сабабли инсонга доимий равишда маънавий озиқ керак. Агар биз – дин пешволари, маҳалла фаоллари, кенг жамоатчилик бу борада сусткашликка йўл қўйсак, яъни ёшлар ўртасида тушунтириш-тарғибот ишларини ўз ҳолига ташлаб қўйсак, ёт иллатларга ружу қўйган ёшларни кўриб, кўрмаганликка олсак, мактаб ёки коллежга бормаётган, дарс пайтида кўчада ёки бошқа кўнгилочар жойларда санғиб юрган болани тўхтатиб, уни саволга тутмасак, қўлидан етаклаб, ота-онасининг олдига олиб бормасак нима бўлади? Президентимиз айтганидек, эртага четда пайт пойлаб турган қабиҳ ёв келиб, ёшларимизни ёлғон ғоялар, пуч ваъдалар билан алдаб, уни ўз ортидан эргаштириб кетмаслигига ҳеч ким кафолат бера олмайди.

Шундай экан, мен туман бош имом-хатиби сифатида туманимиздаги барча дин пешволарига, маҳалла имомлари, отинойиларга қарата айтмоқчиманки, бизнинг бефарқлигимиз давлат ва жамиятга, келажак авлодга жуда қимматга тушади. Келинг, бир ёқадан бош чиқариб, жамиятда соғлом муҳит яратиш, ёшларимизни ёт ғоя ва оқимлардан ҳимоя қилиш, халқимиз ўртасида маърифат ёйишдек савобли ишга ҳисса қўшайлик! Зеро, Ватан, келажак авлод тақдирига дахлдорлик – бу улкан шараф ва масъулиятдир!