SOGʻLOM MUHIT – JAMIYaT TARAQQIYoTINING ASOSIY OMILI

Maʼlum bir davlatning rivojlanishi, taraqqiy etishi avvalo shu mamlakat fuqarolarining hamjihatligi va ahilligiga, jamiyatdagi birdamlik va inoqlikka koʻp jihatdan bogʻliq. Shu sababli istiqlolning ilk yillaridan boshlab jamiyatda tinchlik va totuvlikni, turli millat va elat vakillari oʻrtasida oʻzaro mehr-oqibat va hamjihatlikni, har xil dinga eʼtiqod qiluvchilar oʻrtasida bagʻrikenglik va oʻzaro hurmat tamoyillarini qaror toptirish yoʻlida keng koʻlamli ishlar amalga oshirildi. Shu sababli ham, Yaratganga behisob shukurlar boʻlsinki, yurtimiz tinch, osmonimiz musaffo, kun sayin turmushimiz farovon boʻlib bormoqda.

Ammo, har bir davrda boʻlganidek, bugungi globallashuv va axborot asrida ana shu tinchligimiz va farovonligimizga turli xil tahdidlar paydo boʻlmoqdaki, ularga qarshi kurashish bugun oʻzini vatanparvarman, degan har bir fuqaroning burchidir. Men shu yilning 15-iyun kuni Toshkent shahrida "Ijtimoiy barqarorlikni taʼminlash, muqaddas dinimizning sofligini asrash – davr talabi” mavzusida oʻtkazilgan anjumanda ishtirok etib, shu narsaga amin boʻldimki, bugungi kunda ijtimoiy-maʼnaviy muhitni va aholi turmush sharoitlarini yaxshilash, yoshlarni turli diniy ekstremistik oqimlar taʼsiridan asrash masalasi barchamiz uchun eng asosiy masaladir.

Ushbu anjumanda ishtirok etgan muhtaram Prezidentimiz taʼkidlaganidek, "... islom faqat nurli hayotga, ilm-maʼrifatga, yaxshilikka undaydi. Hech qachon xunrezlik, qotillik, zoʻravonlikka chaqirmaydi. Ana shu haqiqatni tan olmasdan, soxta gʻoyalarga aldanib, zararli oqimlarga kirish, terrorchi boʻlish – bu Oʻzbekiston xalqiga mutlaqo toʻgʻri kelmaydi”.

Muhtaram Yurtboshimiz oʻz nutqida bizning zimmamizga masʼuliyatli vazifa qoʻydilar. Aniqrogʻi, oʻz burchimizni fidoyilik bilan bajarishga chaqirdilar. Chindan ham, mahallamizda, ovulimizda biror bola zararli diniy oqimga kirib qolgan boʻlsa, uni notoʻgʻri yoʻldan qaytarish – avvalo bizning vazifamiz. Uni toʻgʻri yoʻlga solish, ota-bobolarimiz eʼtiqod qilgan muqaddas islom dinimizning hech qanday buzgʻunchilikka buyurmasligini, aksincha, islom tinchlik va ezgulik dini ekanini uqtirish – avvalambor din peshvosining, qolaversa, har bir imonli odamning burchidir. 

Insonning qalbi, miyasi, ongu tafakkuri hech qachon axborot olishdan, fikrlashdan, taʼsirlanishdan toʻxtamaydi. Shu sababli insonga doimiy ravishda maʼnaviy oziq kerak. Agar biz – din peshvolari, mahalla faollari, keng jamoatchilik bu borada sustkashlikka yoʻl qoʻysak, yaʼni yoshlar oʻrtasida tushuntirish-targʻibot ishlarini oʻz holiga tashlab qoʻysak, yot illatlarga ruju qoʻygan yoshlarni koʻrib, koʻrmaganlikka olsak, maktab yoki kollejga bormayotgan, dars paytida koʻchada yoki boshqa koʻngilochar joylarda sangʻib yurgan bolani toʻxtatib, uni savolga tutmasak, qoʻlidan yetaklab, ota-onasining oldiga olib bormasak nima boʻladi? Prezidentimiz aytganidek, ertaga chetda payt poylab turgan qabih yov kelib, yoshlarimizni yolgʻon gʻoyalar, puch vaʼdalar bilan aldab, uni oʻz ortidan ergashtirib ketmasligiga hech kim kafolat bera olmaydi.

Shunday ekan, men tuman bosh imom-xatibi sifatida tumanimizdagi barcha din peshvolariga, mahalla imomlari, otinoyilarga qarata aytmoqchimanki, bizning befarqligimiz davlat va jamiyatga, kelajak avlodga juda qimmatga tushadi. Keling, bir yoqadan bosh chiqarib, jamiyatda sogʻlom muhit yaratish, yoshlarimizni yot gʻoya va oqimlardan himoya qilish, xalqimiz oʻrtasida maʼrifat yoyishdek savobli ishga hissa qoʻshaylik! Zero, Vatan, kelajak avlod taqdiriga daxldorlik – bu ulkan sharaf va masʼuliyatdir!