“Обод турмуш йили“ янгиликлари

Маҳаллада озиқ-овқат дўкони

Узоқ йиллар халқ таълими тизимида математика фани ўқитувчиси, юқори малакали услубчи, мактаб директори вазифаларида ишлаб, нафақага чиққан Манғит шаҳрининг Ойбек номли  маҳалласи фаоли Розия Қутлимуродова жамоатдан узилиб, уйида ўтириб қолишни ўзига эп кўрмади. Маҳалладошларига бирон енгиллик яратишни ўйлади. Маҳалла гузарида озиқ-овқат маҳсулотлари билан савдо қилувчи дўкон очиб, савдо-сотиқ ишларини йўлга қўйди. Маҳалла аҳлининг кундалик эҳтиёж молларини келтириб, уларнинг, оғирини енгил қилди. Дўконда харидорлар учун яратилган шарт-шароитдан маҳалладошлари мамнун.

Мактаб ҳудуди ободонлаштирилди

Янги 2013-2014 ўқув йили учун пухта тараддудни кўриб қўйган 22-сонли умумтаълим мактабида айни кунларда кенг қамровли ободонлаштириш ишлари олиб борилди. Мактабнинг очиқ стадиони, йўлаклар таъмирланиб, дарахтларга шакл берилиб, оқланди. Бундан ташқари, мактаб жойлашган ҳудуддаги Манғит-Қипчоқ гузар йўлининг мактаб ҳудудига яқин қисми мактабнинг техник ходимлари томонидан ободонлаштирилди.

Чет тили хонаси жиҳозланди

Қорақалпоғистон Республикаси халқ таълими вазирлигига қарашли 8-сонли ихтисослаштирилган Давлат умумтаълим мактабида янги ўқув йилига тайёргарлик ишларига бу йил алоҳида аҳамият қаратилди. Айниқса, чет тиллари бўйича фан хоналарини  жиҳозлашда янги инновацион лойиҳаларга кенг ўрин берилди. 2012 йил 10 декабрда қабул қилинган "Чет тилларни ўрганиш тизимини янада такомиллаштириш чора-тадбирлари тўғрисида”ги Президент Фармони мактаб чет тиллар ўқитувчилари учун бу борада дастуриламал бўлмоқда.

- Ўқитувчиларнинг тил ўрганишида услубий ва кўргазмали ўқув қуролларининг ўрни катта, - дейди мактабнинг инглиз тили фани ўқитувчиси Раъно Давлетова. - Шу боис, чет тили синфхонасини ўзбек ва инглиз тилларидаги суратли плакатлар, савол-жавоблар орқали акс эттирилган суратли лавҳалар билан безатдик.

Чунки бундай усуллар ўқувчиларнинг чет тилини ўрганиш имкониятини янада оширади.

Ўқувчилар касб-ҳунарли бўлишади

"Бўз ёп” ОФЙ ҳудудидаги 10-сонли умумтаълим мактабида ўқувчиларни кейинги узлуксиз касб-ҳунар таълимига жалб қилиш билан қамраб олишга алоҳида эътибор қаратилгани боис, мактабнинг 51 нафар битирувчи-ўқувчилари янги 2013-2014 ўқув йилида ўзлари танлаган касб-ҳунар йўналишлари бўйича ва академик лицейларда ўқишни давом эттириш имконига эга бўлдилар.

"Маҳалла китоби” қўл келмоқда

"Чой кўл” ОФЙ раиси Рашид Йўлдошев раҳбарлигида тез-тез ОФЙ фаоллари билан учрашувлар, "Фуқароларнинг ўзини-ўзи бошқариш органлари тўғрисида”ги янги таҳрирдаги Ўзбекистон Республикаси Қонунининг мазмун-моҳияти хусусида суҳбатлар ўтказиб, тушунтириш ишлари олиб борилади.

- Учрашувларда йиғин аҳолиси ҳаётига оид муаммоларни ҳал этиш чоралари кўрилади, - дейди диний маърифат ва маънавий-ахлоқий тарбия масалалари бўйича маслаҳатчи Р.Орзибоева. – Бунда бизга "Маҳалла китоби” қўл келмоқда.

Кун тартибида инсон соғлиги

Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва  фуқаролик жамиятининг бошқа  институтларини қўллаб-қувватлаш жамоат фонди томонидан ташкил этилган кўрик-танловда "Аҳолининг экологик ва тиббий маданиятини янада яхшилашда, аҳоли орасида, айниқса ёшларга соғлом турмуш тарзини тарғиб қилишда ОАВларнинг ролини ошириш”  мавзусидаги лойиҳаси билан иштирок этиб, Давлат гранти соҳиби бўлган "Тараққиёт кўзгуси” газетаси таҳририяти ушбу лойиҳа асосидаги режавий ишлар ва тадбирларни муваффақиятли бажаришга киришди.

Шу йилнинг 26 июль куни мазкур лойиҳа доирасида Манғит шаҳрининг Беруний маҳалласи аҳолиси, тиббиёт ходимлари, туман хотин-қизлар қўмитаси ходимлари иштирокидаги "Соғлом турмуш тарзи – саломатлигимиз гарови” мавзусида давра суҳбати ўтказилди.

Давра суҳбатида Беруний МФЙ раиси Ш.Нуримбетов, туман хотин-қизлар қўмитаси раиси М.Аҳмедова, туман "Саломатлик” маркази директори Ж.Явқашов, марказ шифокори И.Сарибоев, туман ДСЭНМ шифокори М.Норбоев, туман тиббиёт бирлашмаси туғруқхона бўлими шифокори Ш.Ёқубовалар маҳалла аҳолисини қизиқтирган саволларга жавоб бериш билан бирга, жамиятимизда соғлом турмуш тарзини қарор топтиришда ҳар бир шахснинг тутган ўрни ҳақида қизиқарли суҳбатлар ўтказишди. Лойиҳа мувофиқлаштирувчиси А.Жуманиёзов ва лойиҳа нозири О.Ражабовалар давра суҳбати иштирокчиларини қизиқтирган саволларга жавоб бердилар.