“Obod turmush yili“ yangiliklari

Mahallada oziq-ovqat doʻkoni

Uzoq yillar xalq taʼlimi tizimida matematika fani oʻqituvchisi, yuqori malakali uslubchi, maktab direktori vazifalarida ishlab, nafaqaga chiqqan Mangʻit shahrining Oybek nomli  mahallasi faoli Roziya Qutlimurodova jamoatdan uzilib, uyida oʻtirib qolishni oʻziga ep koʻrmadi. Mahalladoshlariga biron yengillik yaratishni oʻyladi. Mahalla guzarida oziq-ovqat mahsulotlari bilan savdo qiluvchi doʻkon ochib, savdo-sotiq ishlarini yoʻlga qoʻydi. Mahalla ahlining kundalik ehtiyoj mollarini keltirib, ularning, ogʻirini yengil qildi. Doʻkonda xaridorlar uchun yaratilgan shart-sharoitdan mahalladoshlari mamnun.

Maktab hududi obodonlashtirildi

Yangi 2013-2014 oʻquv yili uchun puxta taraddudni koʻrib qoʻygan 22-sonli umumtaʼlim maktabida ayni kunlarda keng qamrovli obodonlashtirish ishlari olib borildi. Maktabning ochiq stadioni, yoʻlaklar taʼmirlanib, daraxtlarga shakl berilib, oqlandi. Bundan tashqari, maktab joylashgan hududdagi Mangʻit-Qipchoq guzar yoʻlining maktab hududiga yaqin qismi maktabning texnik xodimlari tomonidan obodonlashtirildi.

Chet tili xonasi jihozlandi

Qoraqalpogʻiston Respublikasi xalq taʼlimi vazirligiga qarashli 8-sonli ixtisoslashtirilgan Davlat umumtaʼlim maktabida yangi oʻquv yiliga tayyorgarlik ishlariga bu yil alohida ahamiyat qaratildi. Ayniqsa, chet tillari boʻyicha fan xonalarini  jihozlashda yangi innovatsion loyihalarga keng oʻrin berildi. 2012-yil 10-dekabrda qabul qilingan "Chet tillarni oʻrganish tizimini yanada takomillashtirish chora-tadbirlari toʻgʻrisida”gi Prezident Farmoni maktab chet tillar oʻqituvchilari uchun bu borada dasturilamal boʻlmoqda.

- Oʻqituvchilarning til oʻrganishida uslubiy va koʻrgazmali oʻquv qurollarining oʻrni katta, - deydi maktabning ingliz tili fani oʻqituvchisi Raʼno Davletova. - Shu bois, chet tili sinfxonasini oʻzbek va ingliz tillaridagi suratli plakatlar, savol-javoblar orqali aks ettirilgan suratli lavhalar bilan bezatdik.

Chunki bunday usullar oʻquvchilarning chet tilini oʻrganish imkoniyatini yanada oshiradi.

Oʻquvchilar kasb-hunarli boʻlishadi

"Boʻz yop” OFY hududidagi 10-sonli umumtaʼlim maktabida oʻquvchilarni keyingi uzluksiz kasb-hunar taʼlimiga jalb qilish bilan qamrab olishga alohida eʼtibor qaratilgani bois, maktabning 51 nafar bitiruvchi-oʻquvchilari yangi 2013-2014 oʻquv yilida oʻzlari tanlagan kasb-hunar yoʻnalishlari boʻyicha va akademik litseylarda oʻqishni davom ettirish imkoniga ega boʻldilar.

"Mahalla kitobi” qoʻl kelmoqda

"Choy koʻl” OFY raisi Rashid Yoʻldoshev rahbarligida tez-tez OFY faollari bilan uchrashuvlar, "Fuqarolarning oʻzini-oʻzi boshqarish organlari toʻgʻrisida”gi yangi tahrirdagi Oʻzbekiston Respublikasi Qonunining mazmun-mohiyati xususida suhbatlar oʻtkazib, tushuntirish ishlari olib boriladi.

- Uchrashuvlarda yigʻin aholisi hayotiga oid muammolarni hal etish choralari koʻriladi, - deydi diniy maʼrifat va maʼnaviy-axloqiy tarbiya masalalari boʻyicha maslahatchi R.Orziboyeva. – Bunda bizga "Mahalla kitobi” qoʻl kelmoqda.

Kun tartibida inson sogʻligi

Oʻzbekiston Respublikasi Oliy Majlisi huzuridagi Nodavlat notijorat tashkilotlarini va  fuqarolik jamiyatining boshqa  institutlarini qoʻllab-quvvatlash jamoat fondi tomonidan tashkil etilgan koʻrik-tanlovda "Aholining ekologik va tibbiy madaniyatini yanada yaxshilashda, aholi orasida, ayniqsa yoshlarga sogʻlom turmush tarzini targʻib qilishda OAVlarning rolini oshirish”  mavzusidagi loyihasi bilan ishtirok etib, Davlat granti sohibi boʻlgan "Taraqqiyot koʻzgusi” gazetasi tahririyati ushbu loyiha asosidagi rejaviy ishlar va tadbirlarni muvaffaqiyatli bajarishga kirishdi.

Shu yilning 26-iyul kuni mazkur loyiha doirasida Mangʻit shahrining Beruniy mahallasi aholisi, tibbiyot xodimlari, tuman xotin-qizlar qoʻmitasi xodimlari ishtirokidagi "Sogʻlom turmush tarzi – salomatligimiz garovi” mavzusida davra suhbati oʻtkazildi.

Davra suhbatida Beruniy MFY raisi Sh.Nurimbetov, tuman xotin-qizlar qoʻmitasi raisi M.Ahmedova, tuman "Salomatlik” markazi direktori J.Yavqashov, markaz shifokori I.Sariboyev, tuman DSENM shifokori M.Norboyev, tuman tibbiyot birlashmasi tugʻruqxona boʻlimi shifokori Sh.Yoqubovalar mahalla aholisini qiziqtirgan savollarga javob berish bilan birga, jamiyatimizda sogʻlom turmush tarzini qaror toptirishda har bir shaxsning tutgan oʻrni haqida qiziqarli suhbatlar oʻtkazishdi. Loyiha muvofiqlashtiruvchisi A.Jumaniyozov va loyiha noziri O.Rajabovalar davra suhbati ishtirokchilarini qiziqtirgan savollarga javob berdilar.