“Баркамол авлод” болалар марказида янги ўқув йили олдидан Республика бўйича анъанавий август семинари бўлиб ўтди

Семинар “2018-2019  ўқув  йилида “Баркамол  авлод” болалар  марказлари олдида  турган  долзарб вазифалар” мавзусида Республика  “Баркамол авлод” болалар  маркази  томонидан ташкил қилинди.

Семинар дастлаб туманимиздаги “Баркамол авлод” болалар маркази томонидан тайёрланган  концерт  дастури ҳамда  кўргазма  намойиши билан бошланди.

Қорақалпоғистон миқёсидаги бундай катта тадбирнинг айнан Амударё тумани “Баркамол авлод” болалар марказида ташкил қилинаётгани бежиз эмас. Сабаби, ўтган ўқув йили якунларига кўра, ўқувчилар қўлга киритаётган ютуқлар, ўқитувчи ва мураббийларнинг бой тажрибаси ва мактаб маъмуриятининг ишни тўғри йўлга қўйгани сабабли ушбу таълим муассаси Республикада  энг намунали  деб  топилган эди. 

Айтиш жоизки, Узбекистон Рескаси Вазирлар Маҳкамасининг 2011 йил 28 февралда қабул қилинган “Мактабдан ташқари таълим тизимини янада такомиллаштириш чора-тадбирлари тўғрисида”ги 50-сонли қарори асосида ташкил қилинган мазкур марказда болаларнинг ўз иқтидор ва қобилиятларини тўлиқ рўёбга чиқаришлари учун барча шароитлар муҳайё.

Марказда ёшларнинг мактабдан бўш вақтларини бекор ўтказмасликлари учун, ҳамда келажакда ватанимиз корига ярайдиган етук касб эгалари бўлиб етишишлари учун бошланғич касбий малака берилади. Муассасада бугунги кунда мингга яқин ўқувчи бошланғич касб ва ҳунар ўрганаяпти.

Шунингдек бадиий ижодиёти, бошланғич техника ижодиёти ва экология ва ўлкашунослик йўналишларидаги 40 га яқин тўгараклардаги олиб борилаётган намунали иш фаолиятлари ўз натижаларини кўрсатмоқда. Экология ва ўлкашунослик йўналашининг “Ёш эколог” ва “Ёш ўлкашунос” тўгаракларининг ўқувчилари, бошланғич техник ижодиёти йўналашининг “Бошланғич техник моделлаштириш” ва “Карвинг” тўгараклари ҳамда бадиий ижодиёти йўналишининг “Доира” , “Юмшоқ ўйинчоқлар” ва “Ёш журналист ва нотиқ”  тўгараклари Ўзбекистон Республикасининг маркази “Баркамол авлод” болалар марказининг уюштирган кўрик танловларида фаол ва муваффақиятли қатнашиб келмоқдалар. Марказ ёшлари ушбу танловларда яхши натижаларга эришиб, Қорақалпоғистон Республикасидан ғолибликни қўлга киритиб, Ўзбекистон Республикаси босқичида ҳам диплом ва фахрий ёрлиқлар билан тақдирланиб, туманимиз шарафини ҳимоя қилиб келмоқдалар.

Семинар иштирокчилари “Баркамол  авлод” болалар  марказлари  директори,  директор  ўринбосарлари  ва  услубчилар сифатида гуруҳларига бўлинган ҳолда машғулотларда қатнашдилар.

Семинар  давомида  янги  ўқув  йилида “Баркамол авлод” болалар  марказлари  олдида  турган  вазифалар,  ҳужжатлар  билан  ишлашиш  ҳамда  уларнинг  юритилишини  назоратга  олиш  юзасидан  фикрлар алмашилди.  Шунингдек  “Баркамол  авлод”  болалар марказларининг  Республика  миқёсида  ўтказиб  келинаётган  кўрик-танловлардаги иштироки  тўғрисида  сўз юритилди.   

Семинар  якунида  туманимиздаги “Баркамол  авлод” болалар  маркази  дирекотри Хонимжон Ражабова  Қорақалпоғистон  Республикаси Халқ  таълими  вазирлигининг  фахрий  ёрлиғи  билан  тақдирланди.