36-сонли мактабда адабий кеча ўтказилди

Таълим мазмунини такомиллаштириш, фанларни ўқитишда юқори самарадорликка эришиш, ўқитувчиларга амалий ва методик ёрдам беришни мунтазам йўлга қўйиш мақсадида мактабларда ҳар ойда фан ойликлари ташкил қилинади.

Ўтган ойда тумандаги барча умумтаълим мактаблари қатори 36-сонли мактабда ҳам қорақалпоқ тили фан ойлиги ўтказилди ва қорақалпоқ тилига давлат тили мақоми берилганининг 30 йиллиги муносабати билан турли тадбирлар ташкиллаштирилди. Ойлик давомида очиқ ўқув машғулотлари, фанга доир кўрик-танловлар, қорақалпоқ ёзувчи-шоирлари ижодига бағишланган адабий кечалар ўтказилди. Бу жараёнлар янги маълумотлар билан тўлдирилиб, таълим олувчиларнинг билимлари мустаҳкамланди. Кириш тестлари, диктант ва иншолар олиниб, ҳар бир ўқувчининг билим самарадорлиги аниқланди.

Яқинда мазкур фан ойлиги якунига бағишланган адабий кеча ўтказилди. Қорақалпоқ адабиёти намояндаларининг бадиий асарлари асосида тайёрланган кечани мактабнинг маънавият ва маърифат ишлари бўйича директор ўринбосари Сарвар Қутлимуродов очиб берди. 

Мактабнинг қорақалпоқ тили фани ўқитувчилари Зейнигул Сейтимова, Салтанат Сейтимова, Мақсуда Отажонова, Нилуфар Алланиёзова, Насиба Одиловалар томонидан ташкиллаштирилган ушбу кечада ўқувчилар фаол иштирок этдилар.

Кечада бошловчилар дастлаб миллатга хос бўлган қадимий анъаналар, урф-одатлар ва қорақалпоқ тилининг ниҳоятда жозибали, маънодош сўзларга бой тил эканлиги,  халқ оғзаки ижоди намуналари, шу тилда яратилган бадиий асарларнинг қадр-қиммати, 1989 йил 1 декабрь санасида қорақалпоқ тилига давлат тили мақоми берилганининг тарихий аҳамияти ҳақида гапирдилар.

Ундан ташқари, Қорақалпоғистонда ўзбек тили билан биргаликда давлат тили мақомида келаётган қорақалпоқ тилида таълим берилаётган мактаблар, ушбу тил ўргатилаётган олий ўқув юртлари, бошқа вилоятлардаги шу тилда сўзлашувчи эллар ҳамда юртимиздаги уни ўрганишга бўлган эътибор ҳақида ўқувчилар фахр билан сўзлалар. Шундан сўнг, ўқувчилар қорақалпоқ шоирлари ижодига мансуб шеърларни ифодали ўқиб, ёд айтиб берди.

Кеча давомида қорақалпоқ халқ эртаги асосида тайёрланган саҳна кўриниши намойиш этилди. Ўқувчилар ижобий ва салбий эртак қаҳрамонларини маҳорат билан ижро қилдилар ва уларнинг турли воқеаларга бой саргузаштларини, эртаклар доим яхшилик билан тугашини, эзгуликка етаклашини кўрсатиб бердилар.

Эртакдан сўнг тақдим этилган дилрабо қўшиқ ва шўх рақслар томошабинларга янада кўтаринки кайфият улашди.  Pаққоса қизлар “Бизинг елдинг қизлари” қўшиғига, йигитлар эса “Чағала” қўшиғига рақсга тушди. Йигит ва қизлар ижросидаги қорақалпоқча айтишув, “Айсенем”, “Кел гулим” қўшиқлари барчага завқ бағишлади. Ўқувчилар бу чиқишлари билан қорақалпоқ миллий маданиятининг нақадар бой ва сержило эканини амалда кўрсатиб бердилар.

Адабий кечада ва қорақалпоқ тили фан ойлиги давомида фаол қатнашган ўқувчилар мактаб маъмурияти томонидан тайёрланган фахрий ёрлиқ ва совғалар билан тақдирландилар.

Озода ХУДОЙБЕРГАНОВА.