36-sonli maktabda adabiy kecha oʻtkazildi

Taʼlim mazmunini takomillashtirish, fanlarni oʻqitishda yuqori samaradorlikka erishish, oʻqituvchilarga amaliy va metodik yordam berishni muntazam yoʻlga qoʻyish maqsadida maktablarda har oyda fan oyliklari tashkil qilinadi.

Oʻtgan oyda tumandagi barcha umumtaʼlim maktablari qatori 36-sonli maktabda ham qoraqalpoq tili fan oyligi oʻtkazildi va qoraqalpoq tiliga davlat tili maqomi berilganining 30-yilligi munosabati bilan turli tadbirlar tashkillashtirildi. Oylik davomida ochiq oʻquv mashgʻulotlari, fanga doir koʻrik-tanlovlar, qoraqalpoq yozuvchi-shoirlari ijodiga bagʻishlangan adabiy kechalar oʻtkazildi. Bu jarayonlar yangi maʼlumotlar bilan toʻldirilib, taʼlim oluvchilarning bilimlari mustahkamlandi. Kirish testlari, diktant va insholar olinib, har bir oʻquvchining bilim samaradorligi aniqlandi.

Yaqinda mazkur fan oyligi yakuniga bagʻishlangan adabiy kecha oʻtkazildi. Qoraqalpoq adabiyoti namoyandalarining badiiy asarlari asosida tayyorlangan kechani maktabning maʼnaviyat va maʼrifat ishlari boʻyicha direktor oʻrinbosari Sarvar Qutlimurodov ochib berdi. 

Maktabning qoraqalpoq tili fani oʻqituvchilari Zeynigul Seytimova, Saltanat Seytimova, Maqsuda Otajonova, Nilufar Allaniyozova, Nasiba Odilovalar tomonidan tashkillashtirilgan ushbu kechada oʻquvchilar faol ishtirok etdilar.

Kechada boshlovchilar dastlab millatga xos boʻlgan qadimiy anʼanalar, urf-odatlar va qoraqalpoq tilining nihoyatda jozibali, maʼnodosh soʻzlarga boy til ekanligi,  xalq ogʻzaki ijodi namunalari, shu tilda yaratilgan badiiy asarlarning qadr-qimmati, 1989-yil 1-dekabr sanasida qoraqalpoq tiliga davlat tili maqomi berilganining tarixiy ahamiyati haqida gapirdilar.

Undan tashqari, Qoraqalpogʻistonda oʻzbek tili bilan birgalikda davlat tili maqomida kelayotgan qoraqalpoq tilida taʼlim berilayotgan maktablar, ushbu til oʻrgatilayotgan oliy oʻquv yurtlari, boshqa viloyatlardagi shu tilda soʻzlashuvchi ellar hamda yurtimizdagi uni oʻrganishga boʻlgan eʼtibor haqida oʻquvchilar faxr bilan soʻzlalar. Shundan soʻng, oʻquvchilar qoraqalpoq shoirlari ijodiga mansub sheʼrlarni ifodali oʻqib, yod aytib berdi.

Kecha davomida qoraqalpoq xalq ertagi asosida tayyorlangan sahna koʻrinishi namoyish etildi. Oʻquvchilar ijobiy va salbiy ertak qahramonlarini mahorat bilan ijro qildilar va ularning turli voqealarga boy sarguzashtlarini, ertaklar doim yaxshilik bilan tugashini, ezgulikka yetaklashini koʻrsatib berdilar.

Ertakdan soʻng taqdim etilgan dilrabo qoʻshiq va shoʻx raqslar tomoshabinlarga yanada koʻtarinki kayfiyat ulashdi.  Paqqosa qizlar “Bizing yelding qizlari” qoʻshigʻiga, yigitlar esa “Chagʻala” qoʻshigʻiga raqsga tushdi. Yigit va qizlar ijrosidagi qoraqalpoqcha aytishuv, “Aysenem”, “Kel gulim” qoʻshiqlari barchaga zavq bagʻishladi. Oʻquvchilar bu chiqishlari bilan qoraqalpoq milliy madaniyatining naqadar boy va serjilo ekanini amalda koʻrsatib berdilar.

Adabiy kechada va qoraqalpoq tili fan oyligi davomida faol qatnashgan oʻquvchilar maktab maʼmuriyati tomonidan tayyorlangan faxriy yorliq va sovgʻalar bilan taqdirlandilar.

Ozoda XUDOYBERGANOVA.