Амударё туманида Конституция куни кенг нишонланди

Конституция – ҳуқуқий давлатнинг асосий белгиси ҳисобланади. Унда жамиятнинг ижтимоий-сиёсий хусусиятлари, тараққиётининг бош мезонлари, мамлакат ички ва ташқи сиёсатининг асосий йўналишлари ўз ифодасини топади. Ушбу асосий қонун ҳар бир мамлакатнинг тараққиёт йўлини белгилаб берувчи муҳим ҳужжат саналади.

Асосий қомусимиз - Ўзбекистон Республикаси Конституцияси қабул қилинган кун, яъни  8 декабрь санаси мамлакатимизда ҳар йили тантанали равишда кенг нишонланади. 6 декабрь куни туман маданият бўлимида бўлиб ўтган тадбир ҳам шулар жумласидандир.

Тадбирда туман ҳокими Султонбой Йўлдошев, ҳоким ўринбосарлари, депутатлар, ҳуқуқни муҳофаза қилиш органлар, таълим муассасалари раҳбарлари, овул ва маҳалла фуқаролар йиғинлари раислари ҳамда кенг жамоатчилик вакиллари қатнашдилар.

Тадбирда туман ҳокими Султонбой Йўлдошев сўзга чиқиб, бош қомусимизнинг ҳуқуқий демократик давлат ва кучли фуқаролик жамиятини барпо этиш, халқимизнинг тинч, обод ва фаровон ҳаётини таъминлаш, Ўзбекистоннинг халқаро майдондаги обрў-эътиборини юксалтириш, миллий қонунчилик тизимини шакллантириш ҳамда мамлакатимиз ҳаётининг барча соҳаларида ислоҳотларни муваффақиятли амалга оширишдаги ўрни ва аҳамияти ҳақида тўхталиб ўтди.

Дарҳақиқат, Ўзбекистон Республикаси Конституцияси Инсон ҳуқуқлари умумжаҳон декларацияси ва бошқа халқаро ҳужжатлар талабларига тўла мос ҳолда, инсон ҳуқуқ ва эркинликларини кафолатлаш билан бирга, шахснинг маънавий камол топиши ва ҳар томонлама уйғун ривожланиши учун зарур шарт-шароитлар яратди. Конститутция юртимизнинг ҳар бир фуқароси учун нафақат ҳуқуқ ва эркинликлари кафолати, айни пайтда давлат ва жамият олдидаги бурчларини ҳам белгилаб берди.

Байрам тадбирида 31- ҳамда 40-сонли умумтаълим мактабларининг маънавият ва маърифат ишлари бўйича директор ўринбосарлари Элдор Ўразимбетов ва Муяссар Раҳматуллаевалар сўзга чиқиб, Конституциямизнинг мазмун-моҳияти, асосий қонунимизнинг жаҳон ҳамжамиятида тутган ўрни, уни ёшларга ўргатишнинг аҳамияти ҳақида сўзладилар.

Тадбир давомида туман маданият бўлими санъаткорларининг концерт дастури намойиш қилинди. Концерт дастурида мактаб ўқувчилари томонидан бош қомусимизнинг қатор моддаларига таърифлар берилди ҳамда маданият хонандаларининг ватанни мадҳ этувчи, тичлик, эзгуликни тараннум этувчи куй-қўшиқлари янгради.

Шуни алоҳида таъкидлаш керакки, Конституциямиз асосида мамлакатимизда миллий қонунчилик тизими, давлат органлари, фуқаролик жамияти институтлари шаклланди, бугунги кунда барча жабҳаларда кенг кўламли ислоҳотлар амалга оширилмоқда. Ижтимоий-иқтисодий, сиёсий ва ҳарбий салоҳиятимиз юксалиб, фуқароларимизнинг дунёқараши тобора ўсиб бормоқда. Буларнинг барчаси, энг аввало, бош қомусимизнинг ҳаётбахш куч-қудрати натижасидир.

Шунингдек, асосий қонунимизда юртдошларимизнинг келажак авлодларга озод ва обод Ватан қолдириш, уларнинг бахту камолини кўришдек орзу-ҳаваслари ўз ифодасини топганлиги билан бирга унда жамики дунёвий неъматлар орасида энг улуғи – Инсон деган фикр илгари сурилган ва шу асосда фуқаро – жамият – давлат ўртасидаги ўзаро муносабатнинг оқилона ҳуқуқий ечими белгилаб берилган.

Мамлакатимиз ижтимоий-сиёсий ҳаётидаги энг муҳим саналардан бири – Конституция қабул қилинганлигининг 27 йиллиги арафасида шуни алоҳида эътироф этиш лозимки, Конституциямиз вақт ўтган сари ўз нуфузини, халқаро миқёсдаги обрў-эътиборини мустаҳкамлаб бормоқда. Шу сабабли ҳам Конституциямиз – аҳамияти беқиёс бўлган ҳужжатдир.

Фурсатдан фойдаланиб барча юртдошларимизни ушбу байрам –Конституциямизнинг 27 йиллиги муносабати билан табриклаймиз!

Чарос Арслонова, туман ҳокимлиги ахборот хизмати раҳбари