ФАНЛАР ОЛИМПИАДАСИНИНГ ТУМАН БОСҚИЧИДА БИЛИМДОНЛАР САРАЛАНДИ

Умумтаълим мактаблари ўқувчилари ўртасида ўтказиладиган Фанлар олимпиадалари нафақат уларнинг билимларини чархлайди, балки келажакдаги орзуларига қанот бағишлайди.

5-10 январь кунлари тумандаги умумтаълим мактабларида таълим олаётган ўқувчилар орасидан ана шундай билимдон ва иқтидорлиларни аниқлаш мақсадида туман Халқ таълими бўлимининг 2019 йил 23 декабрь кунги 235-м-сонли буйруғи асосида Фанлар олимпиадасининг туман босқичи ўтказилди. 40-сонли мактабда бўлиб ўтган ушбу Фанлар олимпиадасида мактаб босқичида ғолиб бўлган 9-11-синф ўқувчиларидан 609 нафари иштирок қилиши режалаштирилган эди. Лекин 26 нафар ўқувчи турли сабабларга кўра, иштирок қила олмадилар.

Ушбу тадбирда 9-11-синф ўқувчилари жами 55 та фан бўйича ўз билимларини синаб кўрдилар. Ҳар бир фан бўйича 55 нафар аудитория раҳбари, 55 нафар кузатувчи, 165 нафар ҳакамлар ҳайъатидан иборат гуруҳ белгиланган мезон асосида ўқувчилар билимини баҳолаб бордилар. Баҳолашда ўқувчилар ва уларнинг ота-оналари томонидан билдирилган норозиликлар аппелляция комиссияси томонидан тегишли тартибда кўриб чиқилиб, натижалари ўзларига таништирилди.

Тадбир якунига кўра, 256 нафар 9-синф ўқувчилари орасидан 20 та фан бўйича 40 нафар ғолиб аниқланди. Шундан, иқтисодий билим асослари фани бўйича ўқувчилар кейинги босқичда иштирок қилиш учун етарли балл тўплай олмадилар. Фанлар олимпиадасида 17 та фандан иштирок қилган 168 нафар 10-синф ўқувчилари орасидан 15 та фан бўйича 32 нафар ғолиблар аниқланди. Қолган 2 та, яъни қорақалпоқ тили ҳамда рус тили ва адабиёти фанларидан ўқувчилар етарли балл тўплай олмаганлиги сабабли ғолиблар аниқланмади. Шунингдек, 159 нафар 11-синф ўқувчилари 17 та фан бўйича иштирок қилишиб, 38 нафар ғолиблар аниқланди ва кейинги босқичга йўлланмани қўлга киритдилар.
Фанлар олимпиадасининг туман босқичи якунига кўра, 9-11-синф ўқувчиларидан жами 110 нафари  Қорақалпоғистон Республикаси босқичида иштирок қилиш ҳуқуқини қўлга киритдилар.

Фанлар олимпиадасининг 3-босқичига ихтисослаштирилган давлат умумтаълим мактабларининг 10 нафар ўқувчилари ўзбек тили ва адабиёти, инглиз тили ва  математика фанларидан тўғридан-тўғри иштирок этиш ҳуқуқига эга бўлдилар.  Бундан ташқари, 2018-2019 ўқув йилида Фанлар олимпиадасининг 3-босқичида биринчи ўринни эгаллаган 3 нафар 10-синф ўқувчиси ҳам 2019-2020 ўқув йилида 11-синф ўқувчилари билан бирга тўғридан-тўғри 3-босқичга қатнашиш ҳуқуқига эга бўлишди.

Умумий ҳисобда 2019-2020 ўқув йилида туман умумтаълим мактабларидан Фанлар олимпиадасининг 3-босқичида 123 нафар ўқувчи иштирок этиб, туманимиз шарафини ҳимоя қиладилар.
Биз туманимизнинг билимдон ўқувчи-ёшларига Фанлар олимпиадасининг Қорақалпоғистон Республикаси босқичида ҳам ғолиблар сафидан жой олишларида омад тилаймиз.

Робия ЙЎЛДОШЕВА.