FANLAR OLIMPIADASINING TUMAN BOSQIChIDA BILIMDONLAR SARALANDI

Umumtaʼlim maktablari oʻquvchilari oʻrtasida oʻtkaziladigan Fanlar olimpiadalari nafaqat ularning bilimlarini charxlaydi, balki kelajakdagi orzulariga qanot bagʻishlaydi.

5-10-yanvar kunlari tumandagi umumtaʼlim maktablarida taʼlim olayotgan oʻquvchilar orasidan ana shunday bilimdon va iqtidorlilarni aniqlash maqsadida tuman Xalq taʼlimi boʻlimining 2019-yil 23-dekabr kungi 235-m-sonli buyrugʻi asosida Fanlar olimpiadasining tuman bosqichi oʻtkazildi. 40-sonli maktabda boʻlib oʻtgan ushbu Fanlar olimpiadasida maktab bosqichida gʻolib boʻlgan 9-11-sinf oʻquvchilaridan 609 nafari ishtirok qilishi rejalashtirilgan edi. Lekin 26 nafar oʻquvchi turli sabablarga koʻra, ishtirok qila olmadilar.

Ushbu tadbirda 9-11-sinf oʻquvchilari jami 55 ta fan boʻyicha oʻz bilimlarini sinab koʻrdilar. Har bir fan boʻyicha 55 nafar auditoriya rahbari, 55 nafar kuzatuvchi, 165 nafar hakamlar hayʼatidan iborat guruh belgilangan mezon asosida oʻquvchilar bilimini baholab bordilar. Baholashda oʻquvchilar va ularning ota-onalari tomonidan bildirilgan noroziliklar appellyatsiya komissiyasi tomonidan tegishli tartibda koʻrib chiqilib, natijalari oʻzlariga tanishtirildi.

Tadbir yakuniga koʻra, 256 nafar 9-sinf oʻquvchilari orasidan 20 ta fan boʻyicha 40 nafar gʻolib aniqlandi. Shundan, iqtisodiy bilim asoslari fani boʻyicha oʻquvchilar keyingi bosqichda ishtirok qilish uchun yetarli ball toʻplay olmadilar. Fanlar olimpiadasida 17 ta fandan ishtirok qilgan 168 nafar 10-sinf oʻquvchilari orasidan 15 ta fan boʻyicha 32 nafar gʻoliblar aniqlandi. Qolgan 2 ta, yaʼni qoraqalpoq tili hamda rus tili va adabiyoti fanlaridan oʻquvchilar yetarli ball toʻplay olmaganligi sababli gʻoliblar aniqlanmadi. Shuningdek, 159 nafar 11-sinf oʻquvchilari 17 ta fan boʻyicha ishtirok qilishib, 38 nafar gʻoliblar aniqlandi va keyingi bosqichga yoʻllanmani qoʻlga kiritdilar.
Fanlar olimpiadasining tuman bosqichi yakuniga koʻra, 9-11-sinf oʻquvchilaridan jami 110 nafari  Qoraqalpogʻiston Respublikasi bosqichida ishtirok qilish huquqini qoʻlga kiritdilar.

Fanlar olimpiadasining 3-bosqichiga ixtisoslashtirilgan davlat umumtaʼlim maktablarining 10 nafar oʻquvchilari oʻzbek tili va adabiyoti, ingliz tili va  matematika fanlaridan toʻgʻridan-toʻgʻri ishtirok etish huquqiga ega boʻldilar.  Bundan tashqari, 2018-2019 oʻquv yilida Fanlar olimpiadasining 3-bosqichida birinchi oʻrinni egallagan 3 nafar 10-sinf oʻquvchisi ham 2019-2020 oʻquv yilida 11-sinf oʻquvchilari bilan birga toʻgʻridan-toʻgʻri 3-bosqichga qatnashish huquqiga ega boʻlishdi.

Umumiy hisobda 2019-2020 oʻquv yilida tuman umumtaʼlim maktablaridan Fanlar olimpiadasining 3-bosqichida 123 nafar oʻquvchi ishtirok etib, tumanimiz sharafini himoya qiladilar.
Biz tumanimizning bilimdon oʻquvchi-yoshlariga Fanlar olimpiadasining Qoraqalpogʻiston Respublikasi bosqichida ham gʻoliblar safidan joy olishlarida omad tilaymiz.

Robiya YOʻLDOShEVA.