Келажакда жамият равнақига муносиб ҳиссамизни қўшамиз

Бугунги кунда ёшлар тарбияси, таълим соҳасига бўлган эътибор давлат миқёсидаги масалалардан бирига айланган. Буни муҳтарам Президентимиз Шавкат Мирзиёев томонидан илгари сурилган бешта муҳим ташаббусда ҳам кўришимиз мумкин. Бизнинг мактабимизда ҳам бу муҳим беш ташаббуснинг ижросини таъминлаш мақсадида салмоқли ишлар амалга оширилмоқда.

 Мен Амударё туманидаги  Қиличбой қишлоғининг қоқ марказида жойлашган 15-сонли мактабда таълим-тарбия олиб келмоқдаман. Мактабимизда кўп йиллардан буён келажак авлодга, Ватанимизнинг эртанги куни эгаларига таълим-тарбия берилиб келмоқда. Устозларимиз бизни олға интилишга, изланишга, ҳаракат қилишга ундайди. Шу сабабли биз доим аъло ўқишга, фаол бўлишга интиламиз. Чунки ҳаракат қилган, албатта,  мақсадига етади.

Ёшларнинг маънавиятини юксалтириш ва уларнинг бўш вақтини мазмунли ташкил этиш мақсадида  мактабимизда мусиқа ва санъат, спорт, китобхонлик, компьютер саводхонлиги, касбга йўналтириш бўйича турли тўгараклар ташкил қилиниб, фаолият юритмоқда. Устозларимиздан Замира Абдуллаева “Ёш ижодкорлар”,  Матлуба Акбарова “Рус тилини ўрганамиз”,  Азиза Раҳимова “Ёш тилшунос”,  Дилмурод Бобожонов “Ёш информатик”,  Дилдора Матюсупова “Ёш рассом”, Ўринбой Шомуродов “Ёш мусиқачилар”, Гуласал Собирова “Моҳир қўллар”, Муборак Йўлдошева  “Ёш гимнастикачилар”, Баҳодир Раҳимов “Ёш спортчилар”,  Сурайё Адамбоева ”Инглиз тилини ўрганамиз” номли тўгаракларда ўқувчи ёшларимизнинг  билим ва салоҳиятини ривожлантирмоқдалар. Шунингдек,  “Ўзбек жанг санъати” тўгараги ўқувчилари турли спорт мусобақаларида қатнашиб, ютуқларни қўлга киритиб келаётганлиги билан барчамиз фахрланамиз.

     Ўқувчиларга билим бериб, уларнинг илм бўстонини безаётган ўқитувчиларимизга минг бор ташаккур айтсак ҳам оздир.  Биз ёшлар ҳам ўз навбатида азиз устозларимиз ва ота-оналаримизнинг ишончини оқлаб, келажакда жамият равнақига муносиб ҳисса қўшишга бор куч-ғайратимизни сарфлаймиз.

 Мухлиса Олимова, 15-сонли мактабнинг 

“Ёш ижодкорлар”тўгараги аъзоси.