Амударё қишлоқ хўжалик касб-ҳунар коллежида асаларичиликни ривожлантириш бўйича маҳорат дарси ўтказилди
Асаларичилик қишлоқ хўжалигининг муҳим тармоғи ҳисобланади. Мазкур соҳа асалари оилаларини кўпайтириш, асал, мум, гул чанги ва бошқа асаларичилик маҳсулотларини етиштириш, қишлоқ хўжалик ўсимликларини чанглантириб, ҳосилдорликни ошириш ва мевали дарахтлар ҳосили сифатини яхшилашга хизмат қилади.
Юртимизда ушбу соҳа, яъни асаларичиликни янада ривожлантириш мақсадида “Ўзбекистон асаларичилари” уюшмаси ташкил этилди. Унинг асосий вазифалари асал маҳсулотлари ишлаб чиқаришнинг технологик жараёнларини тизимли ташкил этиш, асалари пакетлари етиштириш ва озуқа базасини мустаҳкамлаш, табиий ресурслардан оқилона фойдаланиш, шунингдек, асал етиштириш жараёнига илмий асосланган усуллар ва замонавий технологияларни жорий этишдан иборат. Туманда ҳам асаларичиликни ривожлантиришга алоҳида эътибор қаратилиб, тегишли чора-тадбирлар амалга оширила бошлади.
17 январь куни туманимиздаги Амударё қишлоқ хўжалиги касб-ҳунар коллежида ўқитувчилар ҳамда коллежнинг ветеринария йўналиши ўқувчилари учун маҳорат дарси ташкил қилинди.
Ўзбекистон Республикаси бош прокурори ўринбосари ташаббуси билан Тошкент давлат аграр университети Нукус филиали “Зооинженерия ва ветеринария” кафедраси ассистентлари А.Тлеумуратов ва П.Ансатбаевлар “Асаларичилик соҳасини ривожлантириш” мавзусида маҳорат дарсини ўтказдилар. Тадбирни коллеж директори Мақсуд Йўлдошев очиб берди ҳамда меҳмонларни таништирди. Масъуллар асаларичилик сир-асрорлари, юртимизда асаларичилик соҳасини ривожлантиришнинг аҳамияти ҳамда соҳага қаратилаётган эътибор ҳақида йиғилганлар билан фикр алмашдилар.
Маҳорат дарсида асаларичиликни халқимиз етти хазинанинг бири деб аташини, ер юзининг барча қитъасида ривож топган ушбу соҳага бўлган эътибор ва қизиқиш йилдан-йилга ортиб бораётгани, Давлатимиз раҳбарининг “Республикамизда асаларичилик тармоғини янада ривожлантириш чора-тадбирлари тўғрисида” Қарори муҳим асос бўлаётгани ҳақида сўз юритилди. Шунингдек, мазкур Қарор асосида асал етиштириш, уни қайта ишлаш ҳажмларини кўпайтиришга, асалари пакетлари билан хўжаликларни таъминлашга, асал етиштиришнинг замонавий усулларини жорий этишга йўналтирилган 2017−2021 йилларда асаларичилик тармоғини комплекс ривожлантириш бўйича чора-тадбирлар дастури тасдиқлангани айтиб ўтилди.
Юқори савияда ташкил қилинган маҳорат дарси иштирокчиларнинг асаларичиликка бўлган қизиқишларини янада оширди. Ветеренария йўналиши ўқувчиларининг кўпчилигида келгусида ушбу соҳа билан шуғулланиш истаги пайдо бўлди. Ўқувчилар ушбу соҳа билан шуғулланиш сир-асрорлари ҳақида берилган саволларига тўлиқ жавоблар олдилар. Бундай қизиқарли дарсни ташкил қилганлари учун коллеж маъмурияти масъулларга миннатдорчилик билдирдилар.
Таълим соҳасининг ҳамда қишлоқ хўжалиги тармоқларининг янада ривожланиши учун амалга оширилаётган бу каби тадбирлар, албатта, ўзининг ижобий самарасини беради ва соҳа ривожи янада ортади.
Чарос Арслонова, туман ҳокимлигининг ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
