ТАРИХ ФАНИ ОЙЛИГИ МАЪЛУМОТЛАРГА БОЙ ВА ЖУДА ҚИЗИҚАРЛИ ЎТДИ

Шукурки, халқимиз мустақилликка эришганидан сўнг, ўзининг тарихини, дунё илм-фани ривожига муносиб ҳисса қўшган аллома, фозил-фузалолари маънавий меросини ўрганиш бахтига мушарраф бўлди. Шу жумладан, улуғ саркарда, жаҳонгир, турк, араб, форс халқлари тарихини, диний, дунёвий ва фалсафий билимларни чуқур эгаллаган Амир Темур ибн амир Тарағай ҳаёти ва фаолияти билан ҳам чуқур танишиш ва ибрат олиш бахтига эришдик.

 Туманимиздаги 65-сонли умумий ўрта таълим мактабида 29 январь куни январь – тарих, давлат ва ҳуқуқ асослари фанлари ойлиги деб белгиланганлиги муносабати билан ўтказилган “Тарихни англаш ўзликни англашдир” деб номланган маърифий-маънавий кечада ҳам бу борада батафсил сўз юритилди.

Амир Темур 1360-1385 йилларда Мовароуннаҳрни мўғул хонлигидан озод қилиб, ягона марказлашган давлат тузди, 1370 йилда Мовроуннаҳр тахтига ўтирди ва Самарқандни ҳокимият пойтахти этиб белгилади. Кейинчалик Сирдарёнинг қуйи ҳавзасидаги ерларни – Тошкент вилоятини, Фарғона водийсини, Хоразмни ўз ҳукмронлигига қўшди. Ҳаётининг сўнгги йилларида Эрон, Ироқ, Закавказье мамлакатлари, Ҳиндистон, Олтин Ўрда ва Туркияни ҳам ишғол қилиб, салтанат ҳудудини шарқда Хитой деворига, ғарбда Ўрта ер денгизигача, жанубда Ҳиндистон чегараларига қадар кенгайтирди. Ушбу йирик марказлашган давлатни адолат билан бошқарди, ўзини оддий халқ вакилидан улуғ санамади. У илм аҳилларини, шоирларни жуда қадрлади ва фаолиятига ғамхўрлик қилди. Шунингдек, халқ фаровонлиги, мамлакат ободлиги учун курашди. “Темур тузуклари” асари бугунги давр ёшлари учун улкан маънавий меросдир. Уни ўрганиш ҳар биримиз учун ҳам фарз, ҳам қарздир.

Мактабнинг тарих фани ўқитувчиси Шаҳло Сафарбоева, давлат ва ҳуқуқ асослари фани ўқитувчиси Омонгул Жумабоевалар томонидан фан ойлиги якунига бағишлаб ўтказилган мазкур тадбирда ўқувчилар соҳибқирон Амир Темур бобомиз амалга оширган ана шу буюк ва оламшумул ишлар ҳақида батафсил маълумотга эга бўлдилар. Тадбирда иштирок этган 9-синф ўқувчилари Амир Темур ҳаётига доир саҳналаштирилган кўринишда олис тарихимизнинг бир парчасини ўз ижролари орқали жонлантиришди. Ўқувчиларнинг тарихий шахслар образини ўзгача виқор ва маҳорат билан ижро этгани уларнинг улуғ бобокалонларимиз ҳаётини чуқур ўқиб, ўрганини яққол кўрсатиб берди. Шунингдек, 5-синф ўқувчилари “Темур тузуклари”дан намуналарни зўр иштиёқ билан ёд айтдилар. Шундан сўнг, 8-синф ўқувчилари ҳозирги даврдаги Конституциямизнинг ўқувчи ёшларга тааллуқли моддаларини ёд айтиб, шарҳлаб беришди.

Тадбирда мамлакатимизнинг биринчи Президенти Ислом Каримов ҳаёти ва фаолиятига оид кўргазма ҳам намойиш этилди.

Фан ойлиги доирасида ўтказилган энг муҳим ишлардан бири мактаб музейи ташкил этилганлиги бўлди. Эндиликда музейни томоша қилган ўқувчилар ўзлари таълим-тарбия олаётган мактаб ҳақида кўпгина билимларга эга бўладилар. Фан ойлиги ўқитувчилар учун ҳам, ўқувчилар учун ҳам қизиқарли ва таассуротларга бой бўлиб ўтди.

О.РАЖАБОВА.