ҲАР БИР БОЛА – БИР ОЛАМ

Тобора ривожланиб бораётган мамлакатимизни янада равнақ топтириш – бугунги ёш авлоднинг билим ва салоҳиятига боғлиқ. Бунда, албатта, бугунги ёшларга берилаётган таълим-тарбия муҳим аҳамиятга эга. Чунки яхши таълим-тарбия олган ёшларгина эл-юртга фидойи бўладилар, ўзларини она Ватан тинчлигига, келажагига дахлдор деб биладилар. Шунинг учун ҳам  мамлакатимизда таълим-тарбия соҳасига энг устувор вазифа сифатида қаралади.

Сўнгги икки йил ичида таълим-тарбия соҳасига қаратилаётган эътибор туфайли мактабгача таълим тизимида амалга оширилаётган ўзгаришлар салмоғи ҳам, муассасалар сони ҳам кескин ошди. Натижада 6 ёшгача бўлган болаларни мактабгача таълим такшилотларига қамраб олиш бўйича ижобий натижаларга эришилди.
Биргина бизнинг туманимизда ўтган йил давомида 1 та давлат хусусий шериклик асосида, 27 та оилавий нодавлат мактабгача таълим ташкилоти янгидан ташкил қилинди ва мактабгача таълим ташкилотлари сони 82 тага етказилди. Яна 22 нафар тадбиркор томонидан нодавлат МТТлар ташкил этиш юзасидан битим тузиш учун ҳужжатлар тайёрланиб,  Мактабгача таълим вазирлигига тақдим  этилган. Айни пайтда туманда 45,5 фоиз 3-6 ёшли болалар мактабгача таълим ташкилотларига қамраб олинган.

Тумандаги 40-сонли мактабгача таълим ташкилоти 1991 йилда қурилган бўлиб, 140 нафар кичкинтойни тарбиялашга мўлжалланган. Давлатимизнинг соҳага қаратаётган эътибори ва кун сайин ошиб бораётган талаблар боис, 2016 йилда муассаса биноси капитал таъмирланди ва қўшимча, қулай шароитлар яратилди. Натижада янги гуруҳлар ташкил этилиб, ҳудуддаги болаларни қамраб олиш кўрсаткичи ҳам ошди.

Бугунги кунда ташкилотда 9 та гуруҳда 250 нафар жажжи болажонлар тарбияланмоқда. 16 нафар педагог-тарбиячиларнинг 4 нафари олий, 2 нафари тугалланмаган олий маълумотга эга. 10 нафар ходимлар эса ўрта махсус маълумотли мутахассислардир. Тарбиячи-педагоглар Нафиса Исмоилова, Альбина Эшназарова, Шоҳиста Жамоловаларнинг  “ўрган-ўргат” тамойили асосида иш юритишлари туфайли тарбияланувчилар ўртасида туман миқёсида ўтказиладиган “Соғломжон-Полвонжон”, “Билағон болажонлар” каби беллашувларда 40-сонли  мактабгача таълим ташкилоти ҳамиша пешқадам.

Болажонларнинг соғлом ва эпчил, интилувчан бўлиб улғайишларида бош ошпаз Саида Жумамуродованинг ҳиссаси катта. Бири-биридан ширин, тотли таомлар тайёрлаб, болажонларни сийлагувчи пазанда опани болажонлар “ўзимизнинг ширин момомиз”, дея севишади. Ҳамшира Дилбар Қурбонбоева эса болажонларнинг саломатлигини доимий кўрикдан ўтказиб туришни асло канда қилмайди.

Жорий йилнинг январь ойида туманимизда бўлган Ишчи гуруҳи аъзолари ушбу муассасада бўлишиб, олиб борилаётган таълим-тарбия сифати билан танишдилар ва ходимларнинг иш тажрибалари, эришаётган ютуқларини таҳлил қилишди. Иш самарасини ижобий баҳоладилар ва тарбияланувчилар учун келтирган совғаларини топширдилар.

Муассасадаги гуруҳларда болаларнинг ёши, қизиқишлари бўйича таълимий машғулотлар олиб бориш, қобилиятли болажонлар иштирокида алоҳида тарбиявий соатлар ташкил этиш, уларнинг жисмоний етуклик сари қадам қўйишларини шакллантириш мақсадида чиниқтирувчи машқлар, қизиқарли спорт ўйинлари ўтказилади. Айниқса, 6 ёшли болалар гуруҳларида бола нутқини ривожлантириш, диққатни жамлаш, нолдан 10гача, 10дан 100 гача рақамларни ёддан айтиш, рақамларни ёддан қўшиш, айириш, кўпайтириш каби машғулотлар жуда қизиқарли тарзда олиб борилади. Тоза ҳавода сайр  қилиш, табиат бағрига саёҳат, “Дадам, ойим ва мен оилавий спортчилармиз”, “Мен катта бўлсам...” каби ўйин-машғулотлари жараёнида болажонлар ўзларини эркин, мустақил ҳис этишни ўрганишади.
Ташкилот ходимларининг барчаси учун ҳар бир бола – бир олам. Ана шу оламнинг янада баркамол, метин, мустаҳкам алп қўрғонга айланиши бугунги таълим-тарбия жараёнига, ҳаракатга боғлиқ эканлигини улар юракдан ҳис этадилар. Шунингдек, Президентимиз томонидан соҳа ходимлари олдига қўйилаётган улуғвор вазифалар ижросини таъминлаш ҳамда виждонан бажаришга интиладилар.

Робия ЙЎЛДОШЕВА.