ТУМАН МАДАНИЯТ МАРКАЗИДА ҚИЛИЧБОЙ МАДАНИЯТ МАРКАЗИ ДРАМА ТЎГАРАГИ АЪЗОЛАРИ СПЕКТАКЛЬ НАМОЙИШ ЭТИШДИ

Президентимиз ёшлар келажагини кўзлаб илгари сурган 5 та ташаббуснинг бутун  мазмун-моҳияти ўсиб келаётган ёш авлод онгида буюк ўзгаришларга нисбатан рағбат уйғотиш, уларнинг бўш вақтларини мазмунли ўтказиш, қобилият ва иқтидорларини юзага чиқариш, ҳаётда илғор фикрли, билимдон, юксак маънавиятли инсонлар сифатида камол топишлари, она Ватанга фидойи ва садоқатли шахс бўлиб вояга етишларига кўмаклашишдан иборат. Шу боис, мамлакатимизда 5 та муҳим ташаббус доирасида амалга оширилаётган тадбирларнинг барчасида ёшларнинг ўзлари ташаббускорлик ва фаоллик кўрсатишмоқда. Мазкур ташаббуслардан бири ёшларга эътиборни кучайтириш, уларни санъат ва маданият масканларига кенг жалб этиш, бу борада қобилиятли ёшларни қўллаб-қувватлашга қаратилгани билан аҳамиятлидир.

Қиличбой Маданият марказида ташкил этилган ёшлар драма тўгараги фаолияти ҳам ёшларни санъат ва маданият масканларига жалб этиш ва бўш вақтларини мазмунли ўтказишга қаратилган бўлиб, тўгарак фаолиятида асосан ёшлар иштирок этишмоқда. Ўз фаолиятини 2019  йилда бошлаган тўгаракда Қиличбой овулининг санъатга қизиқувчи ёшлари дарсдан бўш вақтларида иштирок этишади.

Шуниси эътиборга лойиқки, тўгарак аъзолари томонидан болаларбоп қатор спектакллар саҳналаштирилиб, ҳудуддаги мактабгача таълим ташкилотларида намойиш этилди. “Яхшиликлар олами” деб номланган ўзбек халқ эртаклари асосидаги спектакллар туман ҳудудидаги мактабгача таълим ташкилотлари тарбияланувчилари томонидан катта қизиқиш билан кутиб олинди. Ушбу саҳна асари учун тўгарак жамоаси 2019 йилнинг 27 март санасида – Халқаро театр куни муносабати билан ўтказилган кўрик-танловнинг Республика босқичида “Энг яхши режиссёрлик иши” йўналиши бўйича ғолибликни қўлга киритишди.

Ёшларни миллий ғоя, оила қадриятлари, ўзаро меҳр-оқибат руҳида тарбиялаш мавзуси тўгарак жамоаси фаолиятининг муҳим йўналишларидан бири ҳисобланади.
Яқинда тўгарак аъзолари томонидан туман Маданият марказида Мирсаид Қодиров сценарийси асосида “Кечиккан ўғил” спектакли саҳналаштирилиб, томошабинлар ҳукмига ҳавола этилди.

Ўзи емай едириб, киймай кийдириб, ҳаётининг навқирон фаслини ёлғиз ўғил тарбиясига бағишлаган ота-онанинг орзу-умидлари, соғинчлари ўз  ифодасини топган мазкур спектаклда Қадамбой Матсафоев, Маҳлиё Бозорбоева, эндигина 7 ёшга тўлган Дамиржон Шуҳратов, Нажот Очилбоев, Умиджон Шомуродов ҳамда Дилшод Анваровлардан иборат ҳаваскор актёрлар жамоаси ўз ролларини маҳорат билан ижро этиб, томошабинлар олқишига сазовор бўлдилар. Ҳар бир образ, айниқса, ота-она ва бемеҳр ўғил образининг тўлақонли очиб берилиши учун тўгарак аъзоларининг барчаси ота-она чеккан соғинч ва изтироб онларини қалбан ҳис этиб, гўё саҳнада эмас, балки ҳаётда, қай бир  маҳаллада содир бўлган воқеалар ичида яшаб, фарзанди меҳрсизлиги инсон юрагини емиришини ўзларига топширилган роллар орқали намоён этдилар.

Тўгарак аъзолари доимий ижодий изланишда. Улар яқин кунлар ичида миллий урф-одат ва анъаналаримизни ўзида акс эттирган саҳна асарлари яратиб, туманимизнинг барча Маданият марказларида спектакллар намойиш этиш ниятида ижодий изланишлар олиб боришмоқда. Умид қиламизки, туманимизнинг чекка қишлоғи – Қиличбойда яшаб, ижод этаётган мазкур драма тўгараги аъзолари орасидан мустақил Ватанимизнинг етук театр дарғалари етишиб чиқиб, Ўзбекистоннинг, қолаверса, туманимизнинг номини жаҳонга танитишса, бир вақтлар дунё халқларини ўз санъатлари билан мафтун этган “Қиличбой масхарабозлик мактаби” намояндалари эришган муваффақиятлар яна янгиланса. Чунки, бу замин фарзандлари эзгулик йўлидаги ҳар қандай ишга алоҳида меҳр-муҳаббат, шу баробарида матонат билан киришадилар ва, албатта, уддасидан чиқадилар. Шунинг учун ҳам: “ҳар бир соҳада қандай иш юритишни қиличбойликлардан ўрганинг!” ибораси халқимиз тилидан асло тушмайди.

Робия ЙЎЛДОШЕВА.