Янгича методлар ва таълимий ўйинлар таълим-тарбияда самарадорликни оширади

Педагогик фаолият, аввало, ижодкорликдир. Мен ҳам ўз ишимга ижодий ёндашган ҳолда педагогик фаолиятим жараёнида ўқувчиларимга сидқидилдан таьлим-тарбия бериш,  уларнинг келгусида ҳар томонлама баркамол авлод бўлиб етишишлари учун бор билим ва куч-ғайратимни сафарбар этиш, соҳада ҳеч ким қилмаган янгиликларни яратиш мақсадида ҳаракат қилмоқдаман. Бу мақсадларимни амалга оширишда менга энг катта маслакдош ва ёрдамчи бўладиган инсонлар бу, албатта, ўқувчиларимнинг ота-оналардир.

Ота-оналарга фарзандларининг мактабда ва дарс жараёнида ўзларини қандай тутишлари, дарс  машғулотларида қанчалик фаол ва қизиқувчан иштирок этишини кўрсатиш мақсадида, улар иштирокида  она тили фанидан “Нима қилди? Нима қиляпти? Нима қилади? сўроқларига жавоб бўлган сўзлар” мавзусида, математика фанидан эса “ 100 сони ичида кўпайтириш ва бўлиш”   мавзусида бир соатлик очиқ дарс ташкил қилдим. Очиқ дарсга деярли барча ота-оналар қатнашишди.
Она тили дарсида “Кичик гуруҳларда ишлаш”, “Кимники тўғри”, “Ўз ўрнингни топ” методларидан, “Мўжизалар олами” таълимий ўйинидан фойдаландим. Математика фанини эса  ўқиш фани билан интеграциялаштирган ҳолда қуйидагича  ўтдим:  

 “ Бор экан-да, йўқ экан, Нолвой қоровул экан, Бирвой ясовул экан. Элликхон малика, Юз сонларнинг подшоҳи экан. Оч эмас, тўқ эканлар, ажралмас, аҳил эканлар. Арчазорлар орасида ажойиб ўрмон бор экан. Ажойиблиги шундаки, бу ерда фақат 1дан 100гача бўлган сонлар шод-у хуррам яшар экан. Ўрмоннинг суви тиниқ, ҳавоси тоза, меваларга бой экан. Бу ўрмонга кўпгина ҳайвон-у паррандаларнинг ҳаваси келаркан-у, бироқ ўрмон шоҳи Юздан жуда қўрқишар экан. Чунки шоҳ математикадан мисол ва масалаларни еча оладиган зукко, ҳозиржавоб жонзотларни хуш кўрар экан. Унинг таърифини эшитган ҳайвонлар бир куни ўрмонга ташриф буюрибди. Уларни кутиб олган Нолвой шоҳ Юзнинг қасрига бошлабди. Бироқ бунинг учун уларга “100 сони ичида кўпайтириш ва бўлиш” мавзусида берилган  мисол ва масалаларни ечиш кераклиги айтилибди.”

Топағон ва зукко ўқувчиларим уларга мисолларни ечишда ёрдам бериб, ўрмонга кириб бахтли яшашларига ёрдам беришди.   
    Бу каби методлар ва таълимий ўйинлар ўқувчиларнинг дарсга  қизиқишини, мисолларни тўғри бажаришга бўлган интилишини оширишга ёрдам беради. Дарс машғулотларидан сўнг, ота-оналар ўзларининг ижобий фикр-мулоҳазаларини айтдилар ва миннатдорчилик билдирдилар.

    Синф хонасида “Фарзандинг – давлатинг. Фазилатинг – зийнатинг”  ҳикматли сўзи остида ота-оналар бурчагини ташкил қилдим. Бурчакда 25 нафар ўқувчимнинг ҳар бирига алоҳида гул ясадим ва шу гулнинг расмини қўйдим. Ҳар чоракда ўтказиладиган синф йиғилишларига келган ота-оналар ўз фарзандининг битта гул баргини бўяб кетади.  Ўқув йили якунида барча гул барглари ўз рангларига эга  бўлади. Агарда гул барглари тўлиқ рангга кирмаган бўлса, шу ўқувчининг ота-онаси синф йиғилиши ва машғулотларига тўлиқ қатнашмаганлигини англатади.

Шу боисдан ҳам ота-оналар синф йиғилишларига мунтазам қатнашишга ҳаракат қилишмоқда. Ўз навбатида мен ҳам ўқувчиларимнинг гуллари кундан-кунга ўз рангини топаётганидан ва қўллаётган педагогик усулларим самара бераётганидан жуда хурсандман.

Дилдор Каримбоева, 50-сонли мактабнинг бошланғич синф ўқитувчиси.